Accueil
Envoyer à un ami
Version imprimable
Partager

10 bone ragione d'esse felice di vede u Sporting stà in segonda divisione

Dop'à un macciacciu d'antulugia in Furiani contr'à Niort (neve, piogia, ventu, pana di lume, dui but incasciati in cinque minuti allora chì Bastia vincia 2 à 0...), sapemu chì u Sporting ùn cullerà micca in liga 1, almenu d'un miràculu. Ma ci sò tante ragione d'esse cuntenti di stà in Liga 2...



10 bone ragione d'esse felice di vede u Sporting stà in segonda divisione
1 - L'annu chì vene ùn passeremu micca à a risa cum'è Metz, ultimu di L1, chì hà solu 15 punti dop'à 27 ghjurnate è chì hà da finisce per pruverbiu. È sapemu ch'elli sò numerosi, in Francia, à vulè ghjucacci à a risa è à vulè vede u Sporting rompesi u mustacciu....

2 - Ùn sò ch'è l'accaniti chì ponu suppurtà e partitacce di L2. È seranu sempre megliu 2 o 3.000 arrabbiati è passiunati ch'è 6.000 fasgioli ch'ùn ci capiscenu nunda è chì stanu muti.

3 - I macci di a L2 si ghjocanu u venneri sera. Cusì semu tranquilli u sabbatu pè pudè sorte o cullà in paese.

4 - Tuttu u mondu a dice, u nivellu di a L1 hè calatu assai è u campiunatu francese passa à a risa in l'Auropa sana. Ùn avemu quantunque micca da participà à a cumedia di l'orrìbile "Ligue 1 Orange", nò ?

5 - Quand'è no ghjuchemu in cuppa di Francia, hè un evenimentu, ancu contr'à e squatre puzzicose.
Fidighjemu quist'annu quand'è no avemu ricevutu è battutu à Auxerre, era quant'è no averiamu vintu a cuppa di u mondu. Allora chì s'è no eramu in L1, ci n'infutteriamu di ghjucà à Auxerre...

6 - In L2 semu siguri di tene i nostri ghjucatori corsi
(Leca, Lorenzi, Cahu...) è speremu vedene lancià d'astri giovani (Gaffory...). Preferite una squatra d'ondeci lonzi in L1 o una squatra chì mena è cun corsi chì mettenu u pede in L2 ?

7 - In L2, avemu a liccia di pudè scopre i belli stadii di Francia prufonda : Dijon (stade Gaston Gérard), Châteauroux (Gaston Petit), Brest (Francis Le Blé), Clermont-Foot (Gabriel Montpied), Niort (René Gaillard) è forse Laval (Francis Le Basser) o Cherbourg (Maurice Postaire). Hè quantunque più esòticu ch'è u Parcu di i Principi è u Velodrome...

8 - A spezialità di u Sporting sò i macci fràcichi
, cù ghjucadori fràcichi chì marcanu but fràcichi contr'à squatre fràciche. Sò ste partite chì anu fattu a nostra gioia quand'eramu più giovani, è ùn appiamu paura di dilla : ci campavamu à vede e prudezze d'Eugène Kabongo, Piotr Rzepka, Franck Burnier, Bruno Lippini, François Mosali, Yves Mangione, Hamid Bourabaa o Philippe Gottardi... Tante zappate, rete faciule messe à cantu, passe immancabili ma mancate è cazzulate... Ci vole à dilla, hè quessa a nostra spezialità, a nostra forza, u nostru patrimoniu è ùn ci vole à perde e tradizioni.

9 - A L2 hè più fìsica ch'è a L1, i colpi piovenu è i sciambuloni, cazzotti è panette sò più faciule à mette ch'è in L1. U bellu ghjocu ? Bof... Bastanu unu o dui ghjucadori tènnichi, ma in Bastia sò di più appreziati quelli chì facenu falà.

10 - S'è no cullavamu in L1, sarianu finiti i derby in Aiacciu. È sapemu chì in Timizzolu, semu ind'è noi è quallà sò sempre i turchini chì vincenu à a fine. Francamente, una vittoria in Aiacciu vale dipiù ch'è un match nul à Valenciennes o in Le Mans, nò ?

Eccu, avemu truvatu dece bone ragione d'esse felici di vede u Sporting stà in Liga 2. À voi di truvanne d'astre lascendu un cummentu...

10 bone ragione d'esse felice di vede u Sporting stà in segonda divisione

Venari u 14 di Marzu 2008
u webmaestru



1.mandatu da GWM u 15/03/2008 00:21
O Webmaè, vi tengu caru. Eccu l'articulu più bellu ch'emu avutu nant'A Piazzetta.

11. A L2, ghjè nostra, cum'è dicia quellu...

2.mandatu da circinelludiguagnenativupèliguagnesusosanguaversatu u 15/03/2008 08:13
o webmaè, spergu ch'è tu sè una donna, chì u ghornu chì ci infattemi ti possi basgià in publiccu !

3.mandatu da u panzarottu u 15/03/2008 20:26
Senza parlà male, què sò articuli chì l'aiaccini ùn ponu micca capì... I corsi. A dice u pruverbiu : Suttanacci, site sottu è ci vole à stà ci... Dura lex, sed lex ! Hè a vita chì hè ingrata !

4.mandatu da Iscia ! u 15/03/2008 20:32
magnificu, biscicatu, face prò di ride à pena,
pà esse statu cusì finu ùn pò esse cà un tippu;;;
Iscia !

5.mandatu da passuinata u 21/03/2008 14:20
manc' un articulu nant'à ronaldo !!!!



vuleria leqhje nutizie in corsu mà un ci hè!!

6.mandatu da renusinca u 26/03/2008 11:42
so mdr in scola aio basta basta!!! felicitazione per st'articulu! ghjè bè di vede i punti pusitivi in sta stagnazione spurtiva ;)

7.mandatu da azassio u 04/08/2008 11:14
Vi stà bè di battevi i seghi trà voi !

8.mandatu da vagabondu u 31/05/2009 01:32
una altra ragione di firmà in liga 2!
Pè sorte o pè entre in Bastia à u giratoghju di Furiani, ùn c'hè più nimu e serate di macci, più panica, più vitture, più trafficu! "passemu haut la main" chi ghjè disertu!
Forza bastia è fatte tuttu pè pudè firmà in liga 2!

9.mandatu da vagabondu u 31/05/2009 01:33
una altra ragione di firmà in liga 2!
Pè sorte o pè entre in Bastia à u giratoghju di Furiani, ùn c'hè più nimu e serate di macci, più panica, più vitture, più trafficu! "passemu haut la main" chi ghjè disertu!
Forza bastia è fatte tuttu pè pudè firmà in liga 2!

Novu cumentu :




Seguitate A Piazzetta nant'à Facebook


Ricircà nant'à A Piazzetta