Accueil
Envoyer à un ami
Version imprimable
Partager

10 idee pè i naziunalisti à u pudere

"Tamanta strada" per ghjunghje à u capu di a CTC. Avà chì i naziunalisti sò à u pudere, chì fà per chì a mandatura ùn diventi una viacruce ? Eccu une poche di VERE piste.




Fabricà a bomba atomica

Viderete chì cù un bomba atomica, ci piglieranu à u seriu.

In u 1960 u guvernu francese hà vulsutu fà e so prove in l'Argentella ("on fera les essais nucléaires l'hiver pour ne pas déranger les touristes"...). Dop'à e pruteste, u statu francese hà sceltu di falle in u desertu algerianu, è dopu à Mururoa. Bon s'ella hè pè u guvernu naziunale corsu, nimu truverà à dì.

U prublemu hè ch'ellu ci vole à truvà un locu. Digà ch'è no simu incapaci di metteci d'accunsentu pè trattà u nostru mullizzu...
10 idee pè i naziunalisti à u pudere

Avè una vera squadra naziunale di ballò

Hè ora di dumandà un'affiliazione à a FIFA. Prima per vutà contr'à Blatter è Platini, dopu per avà una vera squadra naziunale di futbol è ghjucà e qualificazione per l'Euro è a cuppa di u mondu.

Cusì, puderemu biscà dopu à esse stati eliminati contr'à l'Azerbaigian o u Liechtenstein. Ci cambierà appena.
10 idee pè i naziunalisti à u pudere

Scambià d'innu

Siamu onesti. Fora d'una strufata o duie, nimu cunnosce è capisce e parolle di Diu vi Salvi Regina. È in più di quessa e parolle sò in talianu.

Eppo una volta ch'è no averemu una squadra naziunale di ballò à a FIFA, cumu avemu da fà à u mumentu di l'inni ?

Imaginate u Diu vi salvi Regina ghjucatu da una fanfara ? Ùn pò micca andà. Dumandemu à Patrick Bruel è Patrick Fiori di creà un veru innu naziunale.
10 idee pè i naziunalisti à u pudere

Impone unepochi di ghjorni di festa

Hè ora d'avè unepochi di ghjorni festivi in più. Prupunimu :

- U 27 di ferraghju (in u 1967, a Corsica battia a Francia 2 à 0).
- U 27 di dicembre (in u 1729, era u principiu di a rivuluzione).
- L'8 di ghjennaghju (in u 1735, a separazione contr'à Ghjenuva).
- A nascita di Guglielmu Guglielmi, primu scrivanu di lingua corsa (ùn avemu micca a data ma l'inventeremu).

Mandate i vostri mails à Gilles è à Jean-Guy.

(Bella sigura, tenemu dinù i ghjorni di festa francesi).

Dumandà una piazza à l'ONU

L'ONU ricunnosce 193 stati. A FIFA conta 209 associ. Hè vera, u ballò hè di più impurtante. Ma una piazza à l'ONU ci vole quantunqune.

Eppo ci vulerà bè à truvà una piazza à Paul Giacobbi avà.
10 idee pè i naziunalisti à u pudere

Ripiglià à Capraia

U 29 di maghju di u 1767, dop'à trè mesi di guerra è una mubilizazione di 400 Corsi, l'armata di Paoli cun Achille Murati pigliava à l'isula di Capraia. È quessa, hà veramente imbestiatu i Ghjenuvesi.

Aiò ch'è ora di turnà à piglialla.
Fiura : infoelba.it
Fiura : infoelba.it

Ricuperà e case segundarie

L'indiani Mapuche anu ricuperatu unepoche di terre soie in Argentina ch'elli s'avianu compru e multinaziunale.

Perchè micca ripiglà e case segundarie di ricconi è fanne centri culturali, residenze d'artisti, ciucciaghje, musei ? O rasalle è lascià fà a natura.
10 idee pè i naziunalisti à u pudere

Sbandisce e canzone di Claude François

Ma dinù "Femme" di Jean-Luc Lahaye, "Bob Morane" d'Indochine, "Et on démarre une autre histoire" di Gérard Blanc.

Hè tempu di falla finita cun l'orrori di l'anni ottanta.

Dà a doppia naziunalità à Emil Kostadinov

A si merita, nò ?


Organizà a cuppa di u mondu

Bon d'accordu, hè una magagna digià fatta. Ma sta volta a pudemu fà in veru. È serà una manera di rilancià u BTP.

O allora i ghjochi olimpichi in Ascu, ma ùn ci sempre micca neve.

10 idee pè i naziunalisti à u pudere

Scambià di bandera

Siamu onesti : hè quantunque cumplicata è strana a storia di a bandera corsa. A testa di moru ci vene da l'Aragone (ma a Corsica ùn hè mai veramente stata aragunese), ùn era micca cunnisciuta in Corsica sin'à Pasquale Paoli, è a so interpretazione porta spessu à cunfusione. Allora perchè micca scambià di bandera ?

Tè, è s'è no pigliavamu a filetta cum'è bandera naziunale ? Ah nò, hè digià pigliata...


u 21 d'Aprile 2016



1.mandatu da henry smart u 21/04/2016 21:40
occupassi di i disgraziati

2.mandatu da barrack u 21/04/2016 22:41
Dichiara a guerra à l'americani
A sapemu, i paesi chì anu fattu a guerra à l'americani cum'è l'allemania ò u giappone sò diventati dopu propiu ricchi.
Tandu si a corsica face a guerra à l'america, c'hè manera di sorte di a nostra puvertà.
Attenti à ùn vince, dopu simu in i guai !!!!

3.mandatu da CSCdi tandu u 22/04/2016 10:41
una telè sola in lingua corsa.... tene i nostri insignanti corsi...

4.mandatu da zebu u 22/04/2016 10:42
vendita libera di l'arme di guerra....

5.mandatu da sourire u 22/04/2016 10:43
sbandì tutti i gruppi pulitichi di 10 o menu eletti da a CTC....

6.mandatu da JMC u 22/04/2016 10:45
un solu mandatu, una solu travagliu pè l'eletti di a CTC o ch'osinnò mette e paghe di questi in u bugettu...

7.mandatu da almanaccu u 27/04/2016 07:49
ricuperà à JM Mondoloni pè serve u petit dejeuner a mane

Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta