Accueil
Envoyer à un ami
Version imprimable
Partager

10 ragioni per cullà in Timizzolu à u derby

Venneri si ghjoca ACA - Sporting. Ùn site micca mutivatu per andacci ? Casca bè, mancu noi. Eccu quantunque 10 bone ragioni per cullà à vede u derby corsu.



10 ragioni per cullà in Timizzolu à u derby
1. Un derby in L2... Sin'à quandu ? Trà u Sporting (11u) è l'AC Aiacciu (15u), ci pudemu dumandà s'ellu ci serà un derby tutti l'anni. Allora prufittatene ! Ma forse un ghjornu u derby si ghjucherà in "National"...

2. U spetàculu di a magnìfica "Ligue 2 Orange" chì u mondu sanu c'invidia. I dribbli di Stéphane Darbion contr'à i tacles d'Eric Cubilier, Dohin contr'à Dao, Uras contr'à Cherrad, face sunnià, nò ?

3. Un derby, hè megliu ch'è un macciu contr'à Boulogne, Vannes o Amiens. Quessa, hè vera nò ?

4. Per una volta l'ACA hà da vince. Aiò, tuttu u mondu a sà chì u Sporting hà da lascià u macciu à l'ACA per ch'elli si salvinu. Per una volta ch'ellu si pò assiste à una vittoria di i rossi è bianchi...

5. L'aria pura di u Vaziu. Face prò di respirà appena d'aria pura di tantu in tantu.

6. Alain Orsoni.

7. A bellezza di Timizzolu. Truvate chì Furiani face segonda divisione albanese ? Allora chì si puderà dì di Timizzolu...

8. L'insulte. Chì saria un derby senza e tradiziunale insulte ? "O gaulois" è "o sardò" contr'à "o lucchisò" è "o babin" ? Troppu viulente per e vostre arechje ? Aiò, ma hè quessa a "communauté de destin"... Evviva a fratellanza corsa !

9. A definizione di un derby riesciutu segondu l'Inglesi : elli dicenu chì pè riesce un derby ci volenu duie squadre chì ùn si ponu pate, un tempacciu di quelli è un àrbitru orrìbile. Soca un ghjornu ci la feremu ancu noi, à fà cum'è sti tonti d'Inglesi...

10. I ghjucadori corsi ! Ah nò, quessa face un pezzu ch'ella hè finita.

Ma si ne ponu truvà d'altre... à voi di prupone e vostre !

Venari 8 Maghju 2009
Antò Cognak



1.mandatu da Antò u 2009-05-08 11:58
Andemu tutti !

2.mandatu da rughjatore u 2009-05-08 12:54
Impieti u stadiu, ghjovani è vecchji, chì di sta sirata, nimu si ne scurdessi! FORZA AIACCIU! !

3.mandatu da circinelludiguagnenativupeliguagnesusosanguaversatu u 2009-05-08 13:06
FORZA BASTIA !

4.mandatu da Marius Tresor u 2009-05-08 14:57
c'hè un derby ? un a sapia ch'edda ci fussi sempri una squadra Bastiaccia in L2, sara a Stedda? Toca Cardo?

5.mandatu da Ali Bertà u 2009-05-08 21:48
"5. L'aria pura di u Vaziu. Face prò di respirà appena d'aria pura di tantu in tantu."

L'aria "pura" di u Vaziu ùn impedisce micca i custruzioni di bastimenti é di casi in questa zona imbrutatta d'Aiacciu. Un hè micca nurmale ma u soldu ùn face mai peura a i speculatori Corsi é Francesi é soppratuttu a i nostri "cari" eletti sempri pronti à impiessi le stacche.

6.mandatu da rughjatore u 2009-05-08 23:03
Magnificu derby...nudda da dì...vergogna...à tutti...

Vi pruposu una minuta di silenziu pè u ballò corsu...

7.mandatu da Drobnjacku u 2009-05-08 23:33 (da un teleffuninu)
Ma nò o rughjatore, un avete ancu capitu chi u ballo hè una cumedia, hè un teatru ! Face prò di sfucassi appena. Andate à vede roma vs lazio o palermu vs catania...A cantu scb-aca ghjè "l'ecole des fans"

8.mandatu da circinelludiguagnenativupeliguagnesusosanguaversatu u 2009-05-09 07:31
"vergogna...à tutti... Vi pruposu una minuta di silenziu pè u ballò corsu"
Pffffffffffffff...! In 'ssu paese seti sempri pronti à metta in tarra o calcosa o calchissìa ! Accidenti !

9.mandatu da lingua nostra u 2009-05-09 10:41
vi prupongu serà megliu ch'è vi pruposu

10.mandatu da rughjatore u 2009-05-09 14:21
iè, t'ai à rahjò lingua corsa, scuseti...

Quandu dicu "pè u ballò corsu", mettu in drentu i nosci valori, a sulidarità, ecetera...

Eu, quandu vecu chì l'aiaccini facini una un messaghju "5/5/92 : IN MEMORIA" (sciaccamanatu da tutta a tribune bastiaccia), è chì un quartu d'ora dopu, i stessi lampani un "fumigène" pè metta u focu à u tifo, mi pari bè chì di sti valori, ùn ci ne fermani tantu...

è pè u paragonu di Drobnjacku incù l'Italia, iè ghjè sicuru, chì in lu mondu, ci hè sempri peghju, mà ùn hè micca una scusa pè fà ne tantu...in Italia, ci sò i morti duranti i derbys...

11.mandatu da drobnjacku u 2009-05-09 15:06
innò o rughjatore, u ballò hè sempre statu viulente è ùn ci vole micca à idealizà una "étà d'oru" induve eramu tutti fratelli.

avà più nimu s'arricorda, ma in un derby GFCA-SCB caldissimu in 1993, l'aiaccini cantavanu "ils sont tombés... ils sont tombés..." riferenza à u 5 maghju 92.

eppuru, seranu stati veramente felici di i morti di a catastrofa ?

ùn pensu micca, siguramente ch'elli avianu ancu amichi è parenti ind'è i ferriti di quellu macciu.

ma hè cusì u ballò, tuttu hè pruvucazione è viulenza teatralizata. hè cusi da per tuttu in u mondu. si bastiacci è aiaccini si vulerianu veramente tumbassi, perchè chi ùn ci hè stata cazzuttata dopu à a partita ? à a surtita di u stadiu ? o dopu in cità ?

aiò, ùn vi scurdate chi tuttu què hè cumedia !

è omu hà bisognu di sta cumedia, di sfugassi, in stu mondu di più in più "asseptizatu" è fliccatu...

12.mandatu da Cincinellu u 2009-05-09 15:40
farianu megliu, tutte e "squatre corse", à dumandà di participà à un campiunatu d'Auropa, in tantu chè squatra naziunale, è dinù à a seria A o B taliana. Cù e so lege, contr'à noi, sempre, dipoi più di 40 anni, i francesi anu assassinatu u sporting è ciò ch'ellu era u spiritu corsu di l'annate 70 - 80. Di colpu, ùn ci hè più publicu, nè squatra, nè nunda.

13.mandatu da rughjatore u 2009-05-09 15:59
O Drobnjacku, a cumedia, iè, ind'è i canti, i messaghji, ecetera...mà quandu ci sò feriti à colpa di fumigènes, ghjè sempri cumedia? eiu aghju mancatu di finiscia in uspidali, chì u fumigène, u mi piddavu in capu quasi...

14.mandatu da KÜGÜRN u 2009-05-09 20:36
cum'è avia scrittu quellu tandu, "NICK LE FOOT"...

15.mandatu da altore u 2009-05-10 22:04
tazzacci in trà di noi ...eccu a nostra spezialità dipoi chì a Corsica hè Corsica... oghje ghjè à ballò... à i tempi ghjera peghju! ma fin'tantu chè no seremu cusì conni ùn ci vole micca à sperà troppu ! forti seremu sè uniti simu! umbè... prugressi ùn ci n'hè!

16.mandatu da Fafanellu u 2009-05-11 13:45
Ci semu tazzati trà di noi, allora chi c'era una manza di CRS ch'ùn aspittava cà i nostri colpi pffffffffffffffffff

17.mandatu da Ghjuvan Filici u 2009-05-13 11:51
Ùn hè micca cumedia. Hè cunnaria sciappata, sì. Ci n'hè una tichja chì tutti l'anni u ballò in Corsica sighi vastatu da mattaghjati ch'ùn ani chè u sfocu viulenti pà creda d'esista, pà creda chì "in Corsica si faci cussì".
È ci voli d'arristà di piattà 'ssa cunnaria daretu à ùn so chì spezia di tradizioni o di riditera di u passatu. L'abruttiti chì insultani oghji in i stadi, chì sciappani o pruvocani, mi dumandu po ciò ch'iddi ani ricivutu di 'ssu passatu ch'iddi credini di tramandà...
A cosa ch'iddi sciappani hè a passioni di l'aienti, è s'iddu ci voli à piddà esempiu annant'à Catania o a Lazio tandu u meddu hè d'arristà tuttu.
Dipoi à a straghji di Furiani, ci saria vulsutu à rifletta è rifundà tuttu u football in Corsica, inveci di quissa ci impuzzemu in a fanga tutti l'anni, è ni semu fieri. À mè 'ssu ballò corsu mi disgusta di più in più, è u trovu beddu cumpiacenti cù a so propia vargugna.

18.mandatu da cap'radio u 2009-05-13 13:51
riflette nant'à u football in Corsica ? ma ùn hè micca un prublema di football. e tribune ùn so che u spechju di a sucetà.

prima hè vera dinù ch'ella ci hè una tradizione di i supporters corsi di mette a panicca quand'elli vanu à vede un macciu in altro. si dice sempre chi in spiazzamentu, cambianu i cumpurtamenti è i più calmi in furiani diventanu leoni in cuntinente, è quessa hè vera.

avà hè vera dinù ch'ellu ci hè un prublema di viulenza inde giovani intuntiti.

sti giovani ùn so più inguadrati da l'anziani, ch'ellu sia à u stadiu o in a pulitica. di u fattu di u disingagiamentu di i più vechji (testa mora in furiani, stumacati di u naziunalisimu in pulitica...) i giovani si credenu tuttu permessu, credendu fà cum'è i so vechji.

ma techji di Scarface, piglianu cume mudellu l'ultrà taliani sempre più viulenti è tuttu cio ch'elli anu cunnisciutu di u naziunalisimu so Charles Pieri è l'assassiniu d'Erignac.

aghjustate e scimie di u sabbatu sera, u stumacheghju generale in Corsica, l'assenza di futuru, di perspettive economiche, ed eccu cio che no avemu.

ùn so cio ch'elli anu da dà, i vitelloni corsi di 2009...

hè un prublema di sucetà, forse semu tutti appena rispunsevuli... nò ?

19.mandatu da circinelludiguagnenativupeliguagnesusosanguaversatu u 2009-05-13 14:58
"di u fattu di u disingagiamentu di i più vechji (testa mora in furiani, stumacati di u naziunalisimu in pulitica...) i giovani si credenu tuttu permessu"
Alè ! Torna à Vignale i naziunalisti à buleghju avà !
MA PORCA MISERIA !!! SETI TUTTI CUM'E BARBIER !!! Chì fareti dumani, ch'ete à scriva, ch'ete à dì s'è ùn ci sò più i naziunalisti ?
Eiu, ùn supportu micca i supporter è u ballò in generale, ma francamente pà 2 fusée de detresse è 3 insulti, ci feti una crisa "di quelli"...
agna volta chì calcosa dispiacci à l'unu o à l'altru ci voli à mandà a Corsica à caternu, mette i naziunalisti à mezu, è ghjittà u bebè cù l'eau du bain !!!! Pù! Chì mentalità di defaitiste.

20.mandatu da Culomba u 2009-05-13 15:43

Fate cum'è mè! Eiu di u footu mi n'infuttu lol


21.mandatu da Ghjuvan Filici u 2009-05-13 15:45
O Cap'radio,

socu d'accordu cun tecu, a riflissioni ci porta ben intesa à fighjulà a sucità corsa par ciò ch'idda hè. U ritrattu chì ni faci hè propiu quissu ch'e spartu anch'eu.

Ma postu ch'iddu si parla di ballò è ch'hè anch'iddu un fenomenu di sucità ùn si pò fà in Corsica l'ecunumia d'una riflissioni -è d'azzioni - spicifichi. Par esempiu eu l'abruttiti chì mettini a sgherza troppu suventi i scacciariu da i stadi è l'ublicariu à puntu in cumissariatu i seri di macci, com'iddu si faci in monda loca.

U ballò in Corsica hà cunnisciutu troppu straghji è vargugni (cumpresi i manuvri di certi naziunalisti mentri è dopu à a straghji di Furiani), par fà com'è sì i svieri o i sfochi d'avali ùn erani chè un picculu fulcoru senza cunsiquenzi. Di più oghji ci voli di fà casu in tuttu di l'evuluzioni di u ballò in u mondu è arristà d'essa fieri di tutti i nosci arcaismi in materia d'infrastrutturi, d'urganizazioni o di cumpurtamenti.

è dopu à a mantalità di a disfatta, ti palesu ancu unu stintu di prucuratori o Circinellueccettera. Senza nisciunu statu d'anima.

22.mandatu da cap'radio u 2009-05-13 15:47
hè un cunstatu.

u sintimu naziunaliste hè forte inde i supporters "ultras" di bastia, hè sempre stata cusi, hè un fattu.

e tribune so lochi pupulari, giovani, è in italia e tifoserie so sempre state marcate puliticamente;

ùn vale a pena d'annerbati, si cerca di capisce è di spiegà, micca di cundannà

arricordati l'impurtanza di a pulitica in 92 in Nizza, per esempiu.


23.mandatu da fratellu ficatellu u 2009-05-13 18:16
Farebbenu megliu di stampà appena sti ghjovanotti, invece d'andà a fà i coni a u stadiu...

24.mandatu da circinelludiguagnenativupeliguagnesusosanguaversatu u 2009-05-13 19:41
no, ma mi pari ch'ùn aveti micca capitu quantu mi ni futtu di u ballò !
Inveci chi mi facini piutostu riagiscia i spiicazioni "prêt à porter" d'un non evenimentu : "hè colpa à i natio s'eddu ci hè u focu ind'i stadi" è di sicuru ùn hè micca quidda di un sport Rè chì "adduniscia" la ghjente ancu al dilà di i veri sustenitori... Ma bon pà risponda à fratellu ficatellu, di siuru, è di tutti maneri, sarà sempri megliu di stampà ch'è di fà... n'importa chè d'altru... isn't it ghjuvanfilì capradio ?!
Ah, au fait, et quoi qu'il en soit: FORZA BASTIA !!!

25.mandatu da Paris Hilton u 2009-05-14 00:46

What a fair foot !

(hey, I am kidding, boys)

Novu cumentu :
B i u QUOTE URL

Scumpienti

U top 50 di i nomi struppiati

Facenu 200 anni ch'elli sò struppiati i nomi di lochi corsi. Paesi, muntagne, paisoli è cità, u sterminiu hè generalizatu.

U top 50 di i nomi struppiati
À i cani i nomi di lochi corsi ! L'antica memoria di i nomi si sfassa per lascià a piazza à nomi struppiati è plasticati.

Eccu u Top 50 di i scumpienti di a tupunimia corsa...


Leghje a seguita
A Piazzetta nant'à Facebook

Site più di 8000 à avè l'applicazione per iPhone8

Site più di 8000 à avè l'applicazione per iPhone8
Eccu, sò più di 8.000 caricamenti nant'à l'AppStore !

A Piazzetta era digià nant'à l'iPhone, avà ghjunghje nant'à Android

Hè a prima applicazione d'un media corsu.

Sò state sviluppate da una intrapresa corsa, DuoApps !

Ricircà nant'à A Piazzetta
Ricerca avanzata
Inscription à la newsletter