Accueil
Envoyer à un ami
Version imprimable
Partager

11% di l'Aiaccini credenu chì Napuliò ùn hè micca mortu !

Stranu : una piccula "tornade" mette a panicca in Aiacciu. Listessu ghjornu, s'ampara chì u CCB hè di ritornu...



11% di l'Aiaccini credenu chì Napuliò ùn hè micca mortu !
Mentre chì una tromba mettia a panicca in Aiacciu (peccatu, ùn si n'hè purtata nè i sustenidori di l'OM, nè u Quick...) s'ampara chì u CCB era di ritornu.

Sapete, u CCB... Vi n'arricurdate di u Comité Central Bonapartiste ?

Un'affare di i tempi antichi, cum'è i dinosauri, a grippa spagnola è Nicolas Alfonsi.

Ma iè, u CCB ! Stu cosu di u seculu passatu chì cantava "L'Ajaccienne" e sere di vittoria eletturale è chì cridia chì Napuliò ùn era micca mortu ma ghjustu partutu à fassi un girettu cun Elvis Presley.

Iè, cum'è l'Americani, ci sò 11% di l'Aiaccini chì credenu chì Napuliò ùn hè micca mortu ! (stat : inchiesta TNS/Sofres LCI-TF1-A Piazzetta).

A prova si pò stà à sente nant'à u situ d'Alta Frequenza una intervista di u secretariu generale di stu partitu.

Invece ùn vale a pena di circà u situ internet di u CCB, i militanti bunapartisti ne sò sempre à cumunicà cù u fume di i fochi è provanu à chjappà l'ORTF cù a TNT. René Coty hè u dinàmicu presidente di a Ripublica, Raymond Poulidor vincerà u Tour de France quist'annu chì vene è ci volenu 3 ore per andà d'Aiacciu à Bastia (ah nò, què hè sempre u casu oghje...).

Bon, o zitè fate pianu. A prussima volta ch'è vo turnerete à sente parlà di u CCB, hè capace à nivà di lugliu...

u 15 di Sittembre 2009
U Sgaiuffu



1.mandatu da estrimei u 16/09/2009 08:33
he capita ch'ell'un he micca mortu !
d'altronde u ccb un canta piu:"son ombre descend parmi nous" ma "Sarkoleon est parmi nous",forse metteranuu figliolu cume merre d'Ajacciu?+

2.mandatu da pampasgiulacciu u 16/09/2009 09:00
O zitè, u peghju hè ch'ellu hè capace à presentassi à l'elezzione territuriale di marzu chì vene, forse cum'è candidatu d'apertura nant'à a lista di Rocca Serra o di Giacobbi. In quelli tempi vutavanu i morti, nò? Avà, certi serianu pronti à metteli à nant'à una lista, è Napuleunacciu u primu.
Un cunsigliu à Angelini è Talamoni; anu interessu à chjamà subitu subitu "u babbu di a patria". N'averanu bisognu assai... Scumettu chì s'ellu sà chì Napuleone volta à fà campagna quì, cù René Coty (è perchè micca ancu François Coty), Raymond Poulidor, u rè Manuellu, Gavini, Pietri è Landry, volta subitu Pasquale Paoli cù Sambucucciu è Circinellu. Ahè, torna partitu corsu contr'à partitu francese .... Iè, Napuleone hè sempre vivu, ma, s'omu riflette bè, ancu Pasquale Paoli - sin'à quandu ??? - dinù.

3.mandatu da Urelianu u 16/09/2009 12:42
"L'eeeennnfaaannt pRRRodige de la gloiiiiRRee, Napoléon, Napoléoooonn!!"

4.mandatu da Albator84 u 16/09/2009 13:53 (da un teleffuninu)
Elvis, Michael Jackson, Napuleone... so sempre vivi e sempre a fiancu a noi

5.mandatu da Culomba u 16/09/2009 19:41
heuuu perchè? Hè statu MALATU???? _)))

6.mandatu da estrimei u 20/09/2009 08:22
forse Napuleone he mortu, ma "son ombre descend parmi nous" !
a prova: a francisata he un he mai stata cusi furibonda e mi pare ch'ella he praticata ancu da i "naziunalisti "....

7.mandatu da Pampasgiulacciu u 20/09/2009 11:58
O Estrimè, pensu chì à nantu à u più seremu sempre d'accordu. Ma sentimuci bè: a Francisata ferma un termine puliticu per l'epica di ripressione tremanda contr'à u nostru populu. U ben' di Napulione ci entre per assai cù u so amicu Morand per indettu.
U fattu si stà chì sturicamente, a memoria di i corsi si sia scurdatu di l'entre di u seculu 19 ... è ch'ellu ci sia sempre in Aiacciu o in Corsica ammiratori di l'imperatore, sapendu ciò chì s'hè passatu quì. Eviva u CCB, i corsi ùn'anu micca avutu à bastanza (parlu di fucilati, di marturiati, d'impiccati è altri martiri).
Ma per turnà à sfrancisà dimu ch'ella si merita un'altra spiegazione: I naziunalisti - ma micca tutti - sfranciseghjanu, o puru parlanu francese. In quell'epica, si dicia "sfrancisà" per qualchissia chì parlava megliu corsu chè francese. A disgrazia oghje ? Hè u fattu ch'ellu si parla mancu stampa di corsu in e generazione giovane. A maiò parte di quelli chì dumandanu l'ubligazione di a lingua corsa a dumandanu in francese.
Ma quelli chì dumandavanu u pane, in tutti i paesi di u mondu, eranu quelli chì patianu a fame, nò?
Un' hè simu più à pienghjulà, à Napulione, à Sarkozy o ùn sò quale...
Un vole dì ! O simu à l'ultimu, o simu à u principiu ... Un si pò quantunque micca rimpruverà à certi d'ùn parlà corsu, per via di genitori chì li parlavanu solu in francese, o per altru capatoghju.
Si pò forse cuntinuà è cuntinuà torna, sapendu chì a strada hè longa è chì, voli sì, voli nò, a suluzione ferma pulitica, à tutti i livelli.
Napulione sempre vivu, sì, ma per u peghju ....

8.mandatu da estrimei u 20/09/2009 16:00
a Francisata ,he vera, numineghja un mumentu di a nostra storia, quandu, dop'a Ponte Novu , i frencesi pratichebbenu a pulitica di u sterminiu.
ma mi pare, e he di sta manera ch'o l'aghju impiegata , chi frencisata ,in significatu prima , volle dì praticà una pulitica chi spiani tutte e manere di pensà per un mantenene che una : quella a prò di a Francia .
quandu aghju scrittu sti filari, un avia micca in capu tutti sti "naziunalisti "chi un parlanu micca a lingua naziunale e chi un facenu nunda per amparalla,a dilla franca venia di leghje l'articulu d'oghje nant'a Inseme e so ch'ell'avia dettu G.Simeoni (scusatemi ,ma per esse chjaru ci 'ole ch'o i scrivi cumelli so stati detti):
".....notre communauté sait faire de mieux au service du progres et du bien commun".
".....la nation corse n'appartient pas aux seuls nationalistes"
a a lettura di sti filari m'he ghjunta l'edea ch'ell'un si pigliava piu a difesa di i corsi chi so cundannati a andassine per vince u so pezzu di pane, a quelli chi vendenu e so case e i so lochi per sortecine a pocu pressu ,di i corsi disgraziati chi campanu cume andacciani e per via di u sollu e ch'o simu tutti frencesi a paru un ponu avè nisuna prutensione a campà in casa soia.
a me "au service du progres et du bien commun" mi face a peura e quand'ellu scrive ".....la nation corse n'appartient pas aux seuls nationalistes" vulera di chi a Corsica di dumane serrà suttumessa a u sollu , a u prufittu e a l'imbiglia , e chi i figlioli di sta terra un averanu nisuna priurità in casa soia.

9.mandatu da pampasgiulacciu u 20/09/2009 16:34
D'accordu cun tè per dì chì st'infrasate "simeonesche", tonde è lisce, chì m'arricordanu quelle di u babbu, oghje ghjornu anu pocu sensu.
"La nation corse n'appartient pas aux seuls nationalistes": ma ùn si tratta micca d'impatrunisceci di a nazione, ma di cambià l'avvene di sta nazione. E' quale hè chì u pò cambià st'avvene, s'è u naziunalisimu ùn entre micca in ballu.

10.mandatu da estrimei u 20/09/2009 16:55
per contu meu ,
- u naziunalisimu he a pulitica a prò di un Populu, una terra , una lingua , ligati per u sempre.
e tutte e regulle di u Paese devenu tene contu di a primura di u naziunale

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta