Accueil
Envoyer à un ami
Version imprimable
Partager

12 manere d'arrubbà un'elezzione

E tecniche d'arrubecciu eletturale sò parechje. Pudemu esse fieri, unepoche l'avemu inventate noi. E cunniscite tutte ?




1. E false precure

Sò sempre appreziate assai da i candidati è da i so partigiani. À tal puntu chì in campagna, a ricerca di precure hè diventata u sport numeru unu.

È u seriu d'un candidatu si misura à a so quantità di precure. Ùn si sente dì ogni tantu chì tale o tale candidatu chì : "il a bien travaillé, il a deux cents procurations". Una certa idea di u "travagliu"...
12 manere d'arrubbà un'elezzione

2. Fà vutà i morti

Un'antica legenda nustrale degna d'una BD di Pétillon, i morti chì votanu ? Andate chì di quandu in quandu, ci ne serà sempre qualchidunu chì vota sempre...

È allora ? Ùn hè micca peghju ch'è di festighjà u ritornu di i morti per Halloween. Ma mancu i morti ùn sò liberi di vutà per qual'elli volenu...
12 manere d'arrubbà un'elezzione

3. Ingunfià e liste

S'ellu ùn si pò trafficà u risultatu finale, si pò sempre pruvà di trafficà appena e liste. Ùn hè micca senza risicu s'è vo vi fate chjappà.
12 manere d'arrubbà un'elezzione

4. Vutà parechje volte

Tempi è tempi... pare finita l'epica induve l'urne eranu digià piene NANZU à l'apertura di u scrutinu.
12 manere d'arrubbà un'elezzione

5. L'inviluppu (o u bigliettinu) à chjave

Cumu mette a pressione à un'elettore è verificà s'ellu hà vutatu bè ? Un bon direttore di scagnu vi dicerà ch'ellu hè semplice, basta di dalli un inviluppu o un biglittinu "à chjave". Vale à dì marcatu d'un segnu chì permetterà à quellu chì l'hà messu di verificà à u mumentu di u spogliu.
12 manere d'arrubbà un'elezzione

6. A pressione di u "chantage à l'emploi"

Prumette una piazza, un postu o puru un veru travagliu in cambiu d'un votu. Ma l'impieghi publichi ci n'hè di menu in menu è e pressione ci n'hè di più in più.

Ghjucà cù e vite di a ghjente, ùn hè viulenza quessa ?
12 manere d'arrubbà un'elezzione

7. Cumprà i voti

Si ne sente sempre parlà durante e campagne e più arrabbiate. Si sente dì chì certi averianu cumpratu una precura 50, 100 o 200 €...

Ma cumu mai nimu s'hè fattu chjappà, ùn esiste micca.
12 manere d'arrubbà un'elezzione

8. I "charters eletturali" è i biglietti d'aviò di rigalu

I più giovani ùn anu micca cunnisciutu l'affari di i "charters électoraux" in l'anni ottanta. Eranu i candidati chì pagavanu i biglietti d'aviò di l'elettori, per ch'elli venghinu à vutà.

Ma quessa dinù, ùn esiste più ch'è in Africa, nò ?
12 manere d'arrubbà un'elezzione

9. Prumette un mercatu, una suvvenzione...

Prumette un mercatu à un'intrapresa per chì tutti i so impiegati votinu per un candidatu, hè cunsideratu cum'è un attu di curruzzione o nò ?

È per ciò chì hè di e suvvenzione à e cummune, à l'associ nanz'à l'elezzione ?

Ci sò merri, capi d'intrapresa è presidenti d'associ chì temenu certi colpi di filu a vigilia d'un'elezzione...
12 manere d'arrubbà un'elezzione

10. U stampinu "l’électeur ne peut se déplacer"

L'elezzione territuriale di u 1998 hè stata l'ultima grande elezzione annulata per mutivu di froda. A star di tandu hè a cummuna d'Antisanti. A storia hè cuntata in u giurnale Libération :

"La commune d'Antisanti, en Haute-Corse, se distingue dans le lot par l'utilisation intensive du tampon «L'électeur ne peut signer lui-même», apposé 14 fois sur une liste de 320 inscrits. «Ce tampon n'est utilisable que dans des cas rares et bien définis, comme l'amputation des deux mains, note Alfonsi. Or, le bureau d'Antisanti en a autant que toute la Corse réunie.»"
12 manere d'arrubbà un'elezzione

11. Arrubà i listini eletturali

In Bastia ùn ci hè micca petroliu, ma ùn mancanu l'idee quand'ellu si tratta d'elezzione. L'annata di u 1986 fù quella di i genii : l'Argentina avia Maradona, Bastia avia u so staff zuccarellistu.

Di marzu si vota per e legislative. Chjosu u scrutinu, i quaterni devenu esse purtati da i scagni di votu à a prefettura. Ma ci n'hè unu chì hà avutu un'idea tremenda : piattà i veri quaterni à a surtita di u spogliu... è rimpiazzalli da quaterni falsificati. Le casse du siècle, Goodfellas è Ocean's Eleven in Bastia.

Ma l'affare surtitu da un cerbellu malatu ùn viaghjerà micca. Subbitu ci sò accuse di froda. A cummissione di cuntrollu parlerà di "entreprise frauduleuse de grande envergure". Ci seranu parechje cundanne. L'elezzione serà annullata da u Conseil constitutionnel per mutivi di "listes d'émargement falsifiées" è "procurations irrégulières"... è a lege scambiata à posta. Per via di quessa, l'assessore ùn puderà più firmà à a piazza di l'elettore.

L'essenziale hè di participà.
12 manere d'arrubbà un'elezzione

12. U frigò

U votu contr'à un frigò, un lavapiatti, una televisiò, un bonu per empie u caddie à u Super U... Ùn esiste più ? Hein ch'ellu ùn esiste più ? Ùn si face micca di prufittà di a miseria, neh ?
12 manere d'arrubbà un'elezzione

u 1mu di Dicembre 2015



1.mandatu da estrimei u 01/12/2015 16:56
cusì era tandu !
avà ,
-omu si vende a Corsica a u nome di u "développement " e di u "progrès",
- s'assicuranu e piezze a quelli di u pertitu,
- si piglia a pratesa di i u "vivre ensemble" , scurdèndusi ch'elli ci sò figlioli di sta terra chi ùn anu più casa e chi vanu a dumanda a cherita .
-e chi i corsi ùn sienu più maestri in casa soia , nù i cunturbeghja tantu ...

ci ne serà assai candidati a prò di u Populu corsu ?
l'ellezzioni ùn sò micca una pertita di ballò .
a chi face , face a sè!

2.mandatu da pancrazi u 02/12/2015 08:38
ùn ci vole micca à mette dui "b" à arrubà ?

Bona ghjurnata à voi tutti !

3.mandatu da Anto u 02/12/2015 09:14
E di chi ci so chi l'impieganu tutte a tempu

Novu cumentu :