20 capidopera di Canta u Populu Corsu

Avete ragiò, riduce a discografia di Canta u Populu Corsu à una vintina di canzone ùn si pò micca fà. Ma ci vulia quantunque à pruvà. Pè rende omagiu à stu gruppu (40 anni quist'annu), pè turnà à scoprelu è per dà a voglia à quelli chì ùn u cunnoscenu micca (o micca bè) di cunnoscelu megliu.

È cum'ella hè difficiule di fà una scelta à mezu à tanti tesori (ottu dischi, più d'un centu di canti), avemu pigliatu a prima epica di Canta u Populu Corsu (da u 1975 à u 1982).

Ben'intesa, avete u dirittu d'ùn esse d'accordu. Tocca à voi di dì u vostru pensà, d'arricchisce st'articulu, di dà una precizione in i cummenti di st'articulu.

L'anni 50 è 60 sò quelli di a cultura corsa addurmintata. A Corsica si viota, i paesi si morenu, è i Corsi si vergognanu di ciò ch'elli sò. E paghjelle nant'à a scena sò fischjate, è si cantanu canzone d'influenza napulitana o pseudo-mediterranea. Era a fine di cultura pupulare corsa, eccu l'assimilazione definitiva.

Hè in st'ambianza di fine di u mondu chì u miraculu ghjunghje. A forza di a generazione di u 70 serà di turnà à interessassi à una tradizione chì stava per more.

Di lugliu 1973, Petru Guelfucci invita à Minicale, Ghjuvanpaulu Poletti, Dumenicu Tognotti è Saveriu Valentini in Sermanu u ghjornu di Sant'Alesiu. Averanu a so revelazione. Custì, si cantanu sempre a messa è e paghjelle, si sona di u viulinu o di rivèpula. A cultura hè sempre ricca è viva, ma quelli chì a cunnoscenu cummencianu à esse vechji. Ci vole à racoglie, à arregistrà, à amparà... è ci vole à fà in furia.

Cusì nasce dui anni dopu u discu "Eri oghje è dumane", cù stu nome : "Canta u Populu Corsu", chì hè più un'affirmazione chè u nome d'un gruppu. Una racolta di canti tradiziunali (dui voceri, un lamentu), di pulifunie (una paghjella, un terzettu, un madrigale), di musiche tradiziunali (un quadrigliu, una mazurca di rivèpula).

Frà tutti quessi, avemu sceltu un strattu di chjama è rispondi (I Corsi impinzutiti) cantatu da Poletti è Guelfucci, chì dice :

Hè la Francia scellerata
È la Corsica n'hè schjava
Chì s'ella era cummerciata
Tuttu lu mondu ci stava

Serà sempre d'attualità ?

Avemu sceltu duie creazione di Ghjuvanpaulu Poletti : a pulifunia Corsica Nostra è a Lettera di u mulatteru à u Corsu, si puderia aghjustà L'Alcudina, racolta in Zicavu da Michele Paoli, ma u strattu ùn si trova nant'à internet).

Segondu discu, un annu dopu à u primu. Sta volta ci sò di più creazioni originali chè opere tradiziunali.

Semu un'annu dop'à Aleria, è stu discu hè assai di più indiatu chè u primu (Arritti, U Culunialistu, A rivolta).

Hè ora di discitassi è Canta arregistreghja dui inni chì sonanu u tempu di a rivolta : Sunatu hè lu cornu è A Palatina.

Hè ciò ch'ellu dinù ci dice Saveriu Valentini cù Suldatu di u populu và cù una puesia tremenda cù "A Muresca" in fondu.

Hè u tempu dinù di a ripressione. Ghjuvanpaulu Poletti cù Lettera di u prigiuneru cumpone una di e più belle canzone corse.

Canta sorte u so terzu discu in trè anni è ùn si sfiata micca. "Canti di a terra è di l'omi" hè un mischju di tradizione (Michele Paoli canta I Mulatteri d'Ulmetu è Michele Federici U Lamentu di u duttore Battesti) è di creazione.

Si sente infine à Ceccè Buteau in segonda chì hà arricoltu in a tradizione di A Soccia i canti Piscaia è A Merula.

Si trova dinù una canzona per i zitelli : A canzona di u pianu.

Ma u "tube" hè siguramente L'Alta strada, cumposta è scritta da Poletti chì canta a bellezza di a muntagna corsa. L'interpretazione di Carlinu Rocchi di Rusiu ùn hà bisognu di nisun cummentu...

Si puderà fà megliu chè in u 1978 ? U Sporting ghjunghje in finale di a cuppa d'Auropa è Canta u Populu Corsu esce "A strada di l'avvene".

Poletti hà un'idea di geniu : adattà canzone folk in corsu. Hè u casu di A Strada di l'omu, ripresa d'una canzone di Merle Travis Dark as a dungeon. Si maritanu cusì bè chì nimu pò induvinà ch'ella hè un'adattazione...

Si ritrovanu in stu discu parechji successi : Surella d'Irlanda, L'Eletti, Clandestinu, o À tè pratendu.

A tradizione ùn manca cù I Terzetti di u Piuvanu è a Paghjella di Ponte Novu, adattazione di u versu di I Castiglioni.

Infine A Strage di Bustanicu (di Bartulumeu Dolovici) face riferenza à un evenimentu chì avia marcatu e cuscenze tandu, quandu un legiunariu avia tombu dui pastori bustanichesi, innù u Boziu.

Bon dimmula franca, in Chjamu a puesia ùn ci hè nunda da ghjittà.

Da Mal'Cunsigliu (inspiratu da u rumanzu di Jean-Claude Rogliano) à L'Arietta, passendu pè Quandi a terra move è Amicu ci sì tù, cantatu da Dumè Gallet.

L'Ancura di Misericordia hè in cuncurenza per u titulu di a più bella canzona corsa di tutti i tempi. A fine di a canzona face ribombu, più di trent'anni dopu :

Avà corsu stami à sente
Sta canzone ùn hè finita
Fatti onore à ripiglià
Un pezzu di a to vita
È lampa fora stu latru
À la manu troppu ardita

E puesie di Fusina, a musica di Poletti, what else ? L'Odore di i nostri mesi dinù hè in cumpetizione per u titulu di a più bella canzona corsa dapoi chì a musica esiste.

In u 79 Canta esce un discu pè i zitelli. Puesia, sturiette, canzone chì anu marcatu parechje generazioni.

Frà tutte quesse, l'interpretazione magica d'Anna Rocchi nant'à Principellu.

Eccu u primu album live di Canta, arregistratu in u 1981 in Parigi. I veri fans di u gruppu cunnoscenu à mente l'annunzi di e canzone fatti da Ceccè Buteau ("un chant de joie !")

In stu discu pienu d'emuzione, in un'epica cumplicata (c'era ancu statu un'alerta à a bomba nanz'à una rapresentazione), una volta di più ùn ci hè nunda da scantà.

Allegria tutt'ognunu a cunnosce.

Guelfucci cù Ghjennaghju (parolle di G. Thiers) è Gallet cù Vogliu scrive u to nome (parolle di GP. Ristori) sò nant'à un'altru pianeta.

Ch'aghjustà di più ?

Hè l'ultimu discu di Canta, nanz'à a so rinascita chì venerà in u 1993. Marca a fine d'un'epica. E tensioni sò quì, è tempu per i so membri di passà à altr'affari. Si ritrovanu in stu discu influenze nove.

Natale Luciani ci lascia Compañero, successu pianetariu.

Ùn ci hè più piazza per mette videò, ma ùn ci scurdemu dinù di Lettera à Nicoli

Cristofanu Mac Daniel cumpone Citadella da fà (parolle di Fusina, cantatu da Guelfucci). Dop'à quessa, chì si pò fà di megliu ?

Bibliugrafia :
Canta u Populu Corsu, sott'à a direzzione di Francescu Diani, Albiana, 1993.