Accueil
Envoyer à un ami
Version imprimable
Partager

700 anni di baccalà

Semu in 1310. A Corsica hè sott'à a duminazione di a Repùblica di Genuva. Tandu, i cummercianti genuvesi mandanu ind'è noi u so baccalà u più fràgicu è più goffu ch'ellu ci sia. Sapete, quellu chì ferma quandu tuttu u mondu s'hè servutu. Nant'à e casce piene di pesci puzzicosi si scrive « baccalà per Corsica ». Nasce a tradizione di piglià i Corsi per imbecilli chì mai più ùn pianterà. Eccu u best of di e più belle baccalate.



700 anni di baccalà
I suldati corsi in 14 : un'andata senza ritornu
Hè longa a lista di l'inghjustizie pè i suldati corsi mandati à fassi stirpà à u fronte in 14-18 : permissioni più rare, macellu in prima linea cù i regimenti africani, suldati fucilati per via ch'elli ùn obedianu micca à l'ordini allora ch'in fatti ùn... capianu micca (ùn parlavanu micca francese !), 173u regimente demubilizatu di dicembre 1919 solu... In più di u macellu è di l'orrore di a guerra, finita a guerra u Statu ùn hà micca previstu u ritornu di i Corsi in casa soia. Di ghjennaghju 1919, sò centinaie di suldati à ùn pudè vultà in Corsica. Durante parechje settimane campanu cum'è disgraziati pè i hangars di a Joliette in Marseglia, aspettendu in u bruttu è a miseria, à tal puntu chì u deputatu Landry scrive pè lagnassi à Clémenceau : « J'ai l'honneur d'appeler toute votre attention sur les conditions déplorables qui sont faites aux soldats corses en instance de départ pour la Corse (…) ils sont véritablement parqués, la literie manque, les locaux sont d'une malpropreté repoussante, la nourriture est tout à fait insuffisante ». Dopu à avè pagatu u prezzu caru à a guerra, eccu cum'elli sò stati ringraziati i suldati corsi.

Cernobil 1986
Officialmente, u nulu radioattivu di Cernobil s'hè arrestatu à a fruntiera, ùn hè mai passatu sopr'à a Corsica. Officialmente, i càncari di a tirròida ùn anu nunda à chì vede cù a splusione di a centrale ukraniana in 1986...

U stadiu u più goffu, u più caru è u più losciu d'Auropa
Furiani tene digià un bellu record, quellu di u stadiu u più caru è più losciu. 18 anni pè custruisce un'orrore architetturale (tribune luntane da u terrenu, prublemi d'infiltrazioni, una tribuna à l'agrottu induve ci piove quantunque, nisun cunfortu...). Tuttu quessa à u prezzu d'un stadiu ultra-mudernu. Officialmente, ùn ci hè micca statu manghjerie. Scumettite ch'è no francheremu i 20 anni di cantieru ?

L'Argentella nanz'à Mururoa
1960, a Francia hà a bona idea di lanciassi in a corsa à a bomba attòmica. Ma induve fà e prove di splusioni attòmiche ? In Corsica, di siguru ! In l'anziane mine di l'Argentella, trà a Balagna è Galeria. Davanti à a mubilizazione chì nasce, u primu ministru Michel Debré ci rassigureghja : « ùn v'inchietate, e splusioni si feranu da nuvembre à aprile per ùn dirangià a stagione turìstica ». Finalmente, davanti à a pressione pupulare, u guvernu di de Gaulle sceglie u locu di Mururoa. Oghje, centinaie di militari francesi à esse morti o à avè gravi prublemi di salute per avè campatu in i siti di u Sahara o di Pulinesia induve e bombe anu schjuppatu. Officialmente, ùn c'era nisun rìsicu per a pupulazione. (da leghje un articulu nant'à Corse-Matin.


700 anni di baccalà

A magagna di u PEI
U Plan Exceptionnel d'Investissement, ci avete cridutu ? Semu in 2002 è pè pacificà una situazione tesa, Jospin decide di lancià u PEI. U scopu : «  aider la Corse à surmonter les handicaps naturels que constituent son relief et son insularité, et résorber son déficit en équipements et services collectifs ». Era tempu chì u Statu s'occupi di l'infrastrutture degne d'un paese di u Terzu Mondu. For chì per ogni prugettu u Statu finanzerà 70%, u restu tuccherà à e cullettività corse (CTC, Cunsigliu Generale, cumune). Hè assai troppu in un'isula induve sò poche e ricchezze è e cullettività ùn ponu seguità u finanzamentu. Ci semu fatti burlà da u PEI è i soldi di u Statu ùn sò più utilizati. Pè i prugetti « strutturanti » s'aspetterà torna appena...

Sarko vulia passà a maffia à u kärcher
Nicolas Sarkozy, in 2003 : « Nous avons décidé de nous attaquer prioritairement à l'argent du crime, la base du système mafieux ». O ancu «Il faut abattre ce système mafieux qui met la Corse en coupe réglée, c’est l’argent qui corrompt les idées». Ci avete cridutu voi ? Guasi 8 anni dopu, a maffia ùn s'hè mai purtata cusì bè in Corsica.

A legenda di l'AMG 800
Pochi sò i furtunati à pudè vantassi d'avè pigliatu l'AMG 800, u trenu ultramudernu (climatizazione, vista panoràmica...) chì duvia rivuluziunà i trasporti in Corsica. Hè vera chì l'ogettivu era ambiziosu : mette Aiacciu à... 3 ore di Bastia. A storia a cunniscite. I treni ùn anu mai viaghjatu è forse ùn seranu mai in circulazione. Anu custatu 300 milioni d'euro.

700 anni di baccalà

Corsica, terra d'esiliu
A ragione principale chì a Corsica sia « terra di baccalà » hè ch'ella hè sempre stata vista cum'è un'isula luntana, salvàtica, perifèrica, senza interessu. I Rumani n'avianu fattu una terra d'esiliu è di punizione : Sèneca hè statu « cundannatu » à campà in Corsica. Azezu, Sèneca parlerà di « sughjornu orrìbile », di « scogliu àridu » è chì i Corsi ùn pensanu ch'è à « vindicassi, arubà, cuntà bugie è nigà i dii ». Dopu à a guerra d'Algeria, sò i Pedineri à esse vìttime di sta visione di a Corsica. Fughjendu l'Africa, ricèvenu aiuti è suvvenzioni pè stallassi in Corsica. Parigi dà l'ordine à a SOMIVAC di riservà 90% di e terre agrìcule à i Pedineri. « Ce pourcentage est une incitation à la guerre civile », dicerà Michel Rocard.

A pacificazione di a Corsica
U prublema quandu ci hè una guerra hè chì sò quelli chì l'anu vinta chì a scrivenu. 15 maghju 1768 : a Francia è a Ripublica di Genuva ghjocanu à u Monopoly è a Corsica passa sott'à duminazione francese : hè u « traité de Versailles ». Un annu dopu, hè Ponte Novu. Cummencia allora a longa sottumissione di a Corsica chì serà viulente è sanguinosa. L'armata di u Rè di Francia brusgia, tomba è imprigiuneghja. Centinaie di Corsi sò incarcerati in Tulò induv'elli si ne morenu i partigiani di Paoli. In ogni pieve a pupulazione si rivolta : Ampugnani, Nebbiu. In u 1774 i ribelli niulinchi sò impiccati, u più giovanu avia 14 anni. In u 1775 hè u Fiumorbu chì paga. Marbeuf prumette l'amnistia à quelli chì si rèndenu : seranu tutti tombi. U generale interdisce ancu... a cultura di u castagnu, chì favurizeghja a ribellione segondu ellu. A castagna, fruttu revuluziunariu ! Dopu à u reame Anglocorsu, principia una ripressione ancu più forte, chjamata « a Francisata ». In u 1799 i paesi di u Fiumorbu sò rasati. L'annu dopu, i fiumurbacci entranu torna in rivolta, a pieve sana hè brusgiata : « les habitants de cette affreuse contrée vivent comme des arabes depuis qu'on a brûlé leurs habitations », scrive Cervoni. Sott'à Napuleone, si franca un passu novu in l'orrore : « En Corse on fusille un homme par jour ». Ghjunghje Morand, spezialistu di l'ignuminia. Si tomba, impicca, imprigiuneghja à buzeffu. U paese d'Isulacciu di Fiumorbu (torna !) hè brusgiatu, l'omi sò tombi. I Corsi sò troppu periculosi : « il faut battre la Corse avec une verge de fer » dice Berthier chì piglia a successione di Morand. U situ di a prefettura di Corsica riassume cusì stu periudu : « La France s’efforce de consolider et d’asseoir pacifiquement sa présence en Corse » (corse.gouv.fr). Ci vulerà à spiegacci ciò ch'elli chjamanu « pacifiquement »... Solu Mirabeau, chì hà participatu cum'è suldatu à e guerre contr'à Paoli, dicerà chì « ma jeunesse a été souillée par une participation à la conquête de la Corse » è Voltaire « il reste à savoir si des hommes ont le droit de vendre d’autres hommes ».
700 anni di baccalà

Pippulacci...
Vista da Parigi, a Corsica, scusate, « la Keurse » ùn hè ch'è un locu di mare è di sole pupulatu di bravacci abitanti « sympas, authentiques et accueillants », vale à dì baulli. In u mezu di a jet-set, di i capi d'impresa o di a finanza a moda hè dunque d'avè a so residenza in Portovèk o in Balagna. Muriel Robin, Bernard Kouchner, Guy Bedos, Mylène Farmer o u puverettu di Christian Clavier, pè i più cunnisciuti. Poveri à noi d'esse cundannati à accoglie tuttu ciò chì u show biz francese face di peghju.

700 anni di baccalà

700 anni di baccalà
Pedufili...
Ma ci sò d'altri « people » cunnisciuti chì anu u dirittu di fassi brunzà ind'è noi. Emile Louis, Francis Heaulmes, Guy Georges, tutti finisceranu in Casabianda. Sta « prigiò » d'un gèneru speziale induve i prigiuneri anu u so mare riservatu, un golf è induve ùn ci hè micca mirador. Si dice chì ancu Séguéla ne sunnieghja. Pedoffili, cunsanguini, assassini, site i benvenuti in Corsica !

700 anni di baccalà
Legiunarii...
Siamu ricunniscenti à u Statu chì hà avutu a generosità è l'attensione di mandacci a so legione strangera, casu mai ci saria statu bisognu di calmà l'insurezzioni. I campi di Calvi, Corti, Bunifaziu, Verghju n'averanu trascinatu coorte di disgraziati periculosi. In u 1976, dui pastori sò tombi da un legiunariu fughjiticciu in Bustanicu. Tandu nasce una mossa è pocu à pocu sò chjosi i campi di a Legione. Canta u Populu Corsu ferà a so canzona a più cumuvente, A Strage di Bustanicu. Ferma u segondu REP in Calvi.

Cumu ammazzà una ecunumia ?
A Corsica hè stata durante assai tempu cunsiderata cum'è un paese strangeru, per ùn dì una culunìa. In u 1818 hè stabilita a « loi douanière » chì dice chì i prudutti venuti da Francia ùn seranu micca tassati, invece chì prudutti fatti in Corsica a seranu. Cunsequenza : un pruduttu corsu serà assai più caru ch'è un pruduttu francese. A lege serà scambiata in u 1912, solu. Guasi un seculu per ammazzà cumplettamente l'ecunumia di a Corsica è e tentative d'industrializazione.

Un certu Deixonne...
1951, a Francia s'interessa infine à e so lingue regiunali. Una lege chjamata « Loi Deixonne » autorizeghja infine l'insignamentu di u bascu, u catalanu, u brittonu, l'occittanu... ma micca a lingua corsa. Mutivu : u corsu hè una « langue allogène », troppu vicina da u talianu, dunque una lingua strangera... Ci vulerà à aspettà 1974 per chì l'insignamentu di u corsu sia resu uffiziale !

Mozambique, Angola, Corsica
U Statu è EDF anu sceltu : a centrale di Lucciana viaghjerà à u fiul pisìu. Serà tandu a sola d'Auropa. Per infurmazione, centrale cun stu fiul pùzzicosu è periculosu pè a salute ùn ci n'hè più ch'è in i paesi di u Terzu Mondu, nisuna nant'à u territoriu di Francia cuntinentale. EDF hà fattu 4 miliarde d'eurò di benefizii in u 2009.

Parolle, parolle...
In u 1775 u Rè di Francia era « determinatu à fà i travagli necessarii » per assiccà e padule è picculi stagni. U scopu era di sviluppà l'agricultura è di sbarazzassi di a malaria. Centi anni dopu, in u 1890 era u presidente di a Ripublica chì prumettia di fà qualcosa pè risolve stu prublema... In quant'à a malaria, seranu l'Americani dopu à a guerra di 39-45 chì si n'occuperanu.

E strade
In u 1922 u deputatu Pierangeli scrive chì « la loi des finances nous permet d'espérer que des crédits importants seront alloués pour désenclaver nos communes ». A lege si scurderà di a Corsica. E strade, e cunniscite tutti...

In u 1902, i piscadori bastiacci si ralegranu. U ministru di a marina hà prumessu di mandà un battellu « garde-côte » pè surveglià e coste è impedisce a pesca salvatica di i battelli strangeri. Aspettemu sempre l'arrivu di u guardiacoste.

2008 : a CAB annunzia a creazione d'una sala spurtiva d'una capacità di 1000 piazze, in l'anziani lucali Mattei in Toga. Principiu di i travaglii : 2009.

1911 : Era vutata a lege dichjarendu d'utilità pùblica a ligna di u caminu di ferru trà Ghisunaccia è Bunifaziu. S'aspetta sempre.



Ringrazii à Carlu Castellani pè l'aiutu

u 30 di Nuvembre 2010
U Webmaestru



1.mandatu da campana u 01/12/2010 11:58
U cinema francese chi ci facce passà per razzisti, mafiosi, drogati è altre calamità !

2.mandatu da nuit bleue u 01/12/2010 12:31
A vede e reazione di l'uni e di l'altri ,un ci dispiace tantu, un n'aveme che cio che no meritemu,Circhemu sempre un culpevule in altro.
Simu diventatu un populu di pienghjuloni.
Simu i soli rispunsevule di a nostra vita e di u nostru avvene.

3.mandatu da Orsu.. u 01/12/2010 14:08
"Razzisti è mafiosi "so e circunstenze storiche chi ci facenu diventà cusi.. à causa di un

spiritu di sopravivenza..

, drugati è ASSITITTI què si chi so calamità è debulezza..

4.mandatu da imbecille u 01/12/2010 16:18
l'insignamentu he ufficiale dipo 1974 ? allora possu parla corsu a i giandarmi ?

a corsica he autonoma dipo 1982 ? un la sapete micca ? ghje u monde (notiziale) chi l'ha dettu 20 anni fa

basta a crede, he simplice


5.mandatu da Linguaccia u 01/12/2010 18:56
è u Novu populu Corsu cusi caru à Pacou è tutti i servi di u culunialisimu.. ùn hè un

u solu veru Genocidiu di u XXI seculu...

6.mandatu da appinzapalu u 01/12/2010 23:55
ma ch'averemu fattu pè merità què...

7.mandatu da Linguaccia u 02/12/2010 16:37
Simu una razzaccia o Appinzapà.. simu un populu ghjastimatu è scumunicatu,

" Corsica anderai di male in peghju " ùn dicia u pruverbiu ??

8.mandatu da Per ride u 02/12/2010 19:28
Chì vi servu?
Un suppulu d'alloppiu? Un gnignicu di cicuta? Un cria di toscu?...
Un libru di Spinoza?
Inghjunu u so velenu.


9.mandatu da Ricine... u 02/12/2010 22:37
U velenu ghjè indè a dosa...in corsica avemu sti Drugatu di i "Droits de l'Om..." so

peghji che Pulenda è vinu..è ancu chè u Vitticchju.


A bona sera amicacci..!!

10.mandatu da U Palatinu u 04/12/2010 19:23
Bellu articulu, è ancu puru eccellente, ancu s'ellu hè u spechju, cume sempre d'una realità catastroffica (ma u spechju hè bellu ancu s'e a realità hè goffa).

Vi vogliu dinù ringrazià per avè ripigliatu a mio video nant'à Youtube "A strage di Bustanicu". Mi ne sentu onoratu, è aghju infine l'impressione di ghjuvà à qualcosa.

11.mandatu da corsu u 05/12/2010 07:53
a scelta he tra un patriottu-collabo (jca) e un patriottu-repenti (g s ) chi hannu u so maestru chi sta (loge) in pariggi tra minudue



preferiscu i canistrelli al menu si manghjanu

12.mandatu da appinzapalu u 05/12/2010 14:27
bravu o palatinu ! no chi un ghjovi micca à nunda. cuntinuveghja!

13.mandatu da Pulentaghju u 12/12/2010 17:26
Ci hè un altru "baccalà" per a Corsica chè no puvemu parlà quì , ghjè l'affare di e "boues rouges" : di 1972 à 1973 a sucietà taliana Montedison à fattu rigettà in mare, à u largu di u Capicorsu, tunnillate di scarti chimici pà batellu ch'à creatu una polluzione maiò per a Corsica !

14.mandatu da mazzola u 27/12/2010 10:56
A lista è longa e si ne po aghjusta torna : esempiù, u scandalu di a sncm, venduta per qualchi padaconi a un amicu di villepin, 4 anni dopu, rivenduta pè una cinquantina di miglioni, nant'a lu nostru spinu. Allora chi fà ? Un si sa chi scelta fà, ma simu sicuri chi, si a manca sô male, a diritta sô pechju, hanu fattu un cunsigliu di stronzi in Aiacciu per faci caccà e po si ne sô andati beati, cuntenti, avianu u sintimu d'ave fattu una prova. A noi ci vuole un statutu d'autonomia, un guvernu fattu di Corsi per a Corsica, mà qulli sianu rispunsevuli faccia a u populu, e quelli chi ci mettenu a u fondu chell'i vaganu in carcera per sempiternu, o sino sera torna baccalà. Basta a vede U G20, si facenu una bella tichjina, duie bucie e si ricumencia cume sempre, ci campemu.

Novu cumentu :