Accueil
Envoyer à un ami
Version imprimable
Partager

A Corsica, a Pulitica è i Media...

U prublema di a stampa in Corsica, ùn hè micca tantu a diversità di i so puntelli ma a mancanza di diversità in a spressione di l'upinione pulitiche. A vicinanza umana trà giurnalisti è pulitichi impedisce dinù ch'elle fussinu sviluppate analise di più di menu uggettive è critiche nant'à a vita pulitica.



piazzetta, corse, corsica, media, image, objectivité, politique, pulitica, corse-matin, rcfm, alta frequenza,
piazzetta, corse, corsica, media, image, objectivité, politique, pulitica, corse-matin, rcfm, alta frequenza,

Nice-Matin, u Vangelu corsu

A quistione di a qualità di a stampa ùn hà nunda di sputicu à a situazione corsa. Tenite per esempiu u cuntrastu natu dopu à a morte tragica di i militari francesi in Afganistanu. Ogni giurnale dicia a soia nant'à e cundizione di l'assaltu datu da i talibani. Hè natu u cuntrastu trà i più famosi giurnali francesi. Eppuru, versione ghjusta di st'affaracciu, ci ne serà una è una sola. Ancu ind'è Le Monde, u Figaro o Libé, ci puderete leghje falsità.

In quantu à Corse-Matin, u nostru unicu giurnale regiunale, a Pravda, cum'elli dicianu in Russia, cosa ci conta? I morti, i képi, i people, e feste paisane è u prugramma TV... Inchieste è spriritu criticu mancu appena. Di tace certi affari, ancu què hè una forma d'indiatura.

S'è a robba lighjitoghja hè poca, hè a qualità di e fonte giurnalistiche chì ci pare ancu più debbule. Ramintemu ci a passata di e Chinese chì purtavanu a testa mora... In quantu à a so indiatura, nici nicente, hè bella chjara dinù. Ramintate vi per esempiu l'articulu à prò di a stesa di u portu di a cità di u sale... Ogni tantu, Corse-Matin si cappia è diventa a voce di l'UMP. Cacciate u naturale, cum'elli dicenu...

Malgradu tuttu, chì l'articuli di certi giurnalisti s'assumiglianu più à ronchi sumerini chè à articuli di prima o di seconda trinca, quessa pò, ùn la diceraghju micca. Li rispettu troppu per pensà la.

Corsica needs money

Antru giurnale corsu di primura, Corsica... Micca male stu tabloid corsu. Spessu stuzzicaghjolu, uriginale è cumpostu d'una manata di crunicori di prima trinca.

Ma chì male averà toccu à u mustacciu di Joseph-Guy Poletti quandu hà accusatu u situ Amnestia di delazione? Chì male ci serà à palisà chì u prugettu di PADDUC prupone a custruttibilità di i terreni di Camille de Rocca Serra, Ange Santini è Jérôme Polverini I fatti sò chjuccuti ma ci sò... Speremu chì sta zerga polettista, sta zerga anticogna è indiata à prò di l'esecutivu regiunale ùn era micca liata à l'interessi finanziari di u so giurnale... Tandu sì chì l'indipendenza di stu misincu in pettu à u putere puliticu è di modu più largu, a so credibilità serianu interrugate.

Eccu, basterà per oghje chì falanu digià abbastanza scutrate...

PS:
À sente à certi, a qualità di i media dipenderebbe sopratuttu da u so puntellu. U puttachju dice chì nant'à Internet, ùn ci correnu chè nutizie di contuari...

u 20 di Sittembre 2008
Sbanditu



1.mandatu da estrimei u 20/09/2008 13:01
"....qualità di i media dipenderebbe...." , mi pare chi :"....qualità di i media seria suttumessa...." anderia megliu ?

a a m'edea tutti i giurnali so suttumessi . suttumessi a a so ligna pulitica (i giurnali frencesi "Marianne" , "le Canard Enchainé " so contru a a Corsica per divuzione, di sicuru ci n'he d'astri ; Corse Matin seguita a ochji chjosi l'instituzioni ,ancu s'ellu dà una preferenza a l'ump ,face una bella piazza a Giacobbi , Zuccarelli , Alfonsi... ) , suttumessi a una " censure " ch'elli mettenu in piazza da per elli .
a fr3 e a rcfm, l'affare e ancu peghju, c'he un'éducazione casana chi dà a ligna pulitica generale; a rcfm , mi pare ch'ellu sia P. Antona chi stabbilisce publicamenta a strada di stu stabilimentu . duie rimarche nant'a sta radio:
a 1a e u forum : l'ascultaore chi piglia a parulla he cundannatu a sta nu u suminatu ch'ell'anu traciatu; a nuvità he chi in fine d'emissione , P.Mari face a cunclusione di l'emmissione-un antra manera di mantenne u traciatu-
a 2a e u parlà corsu : ci so giurnalisti chi dannu infurmazione aduprendu u "corsu rcfm "(mischju di corsu, di talianu ,di frencese e d'astre lingue) e chi un tennenu mai contu di i rimprovari ch'omu li face. sera una vuluntà di rompe a lingua?

2.mandatu da in cauda venenum u 20/09/2008 14:46

L'INFURMAZIONE HE SCELTA E FILTRATA NANT'A U CORSE MATIN,PEGHJU CHE QUESSA HE SEMPRE L'INFURMAZIONE CHI VA A U GIURNALISTU E MICCA U GIURNALISTU CHI VA A L'INFURMAZIONE IN CONTU A RCFM UN VI SCURDATE MICCA CHI HE RADIO FRANCE DUNQUE SI CAPISCE TUTTU .RADIO CORSE UN CI NE HE TELEVISIO CORSE UN CI NE HE GIURNALI CORSI UN CI NE HE

3.mandatu da telemac u 20/09/2008 18:10
C'hè quantunque "A nazione", incu crunicori di talentu, simpatichi, cultivati è aduprendu una lingua sputica, di più !

4.mandatu da estrimei u 20/09/2008 20:22
o telemac ,
pianu ,pianu 'ncu i cumplimenti , ma he vera chi a Nazione interressa assai e po.... e scrittu in lingua nustrale.

5.mandatu da telemac u 21/09/2008 01:15
Rigolava, era solu una flagurneria stuzzicatoghja pè' l'amichi...

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta