Accueil
Envoyer à un ami
Version imprimable
Partager

A Giraglia: stradacce, mutori, puzza, donne, sborgna è giandarmi !

S'hà da tene in fine di settimana a 38a corsa di a Giraglia. Ancu puru s'è site passiunati cum'è mè da e vitture, fate puru un affaccata in Capicorsu. Avete tante bone ragiò, cum'è dicerebbe l'altru, di fà un girettu per Macinaghju...



Prima, hè un paisolu magnificu. Ci viderete un cunventu, una chjesuccia, un campanile, una scola, una piazza è un muraglione di matticciu seccu. "Senti u Capicorsu chì trimuleghja! È Sbanditu chì impruviseghja." Ma sò scimitu o chè? Cosa hè st'imbuleghju, sta supppaccia à l'usu Jean-François Rocchi ? Aiò, chì tuttu què, l'averete ancu ind'è u vostru u paese ! Innò, in Macinaghju, in più di tuttu què, ci hè u portu incù i so battelloni. Ci hè a frasca in Capicorsu! Eppò ci sò i fragni chì i bastiacci è i pumataghji piglianu per torre genuvese... Unepoche l'avemu dinù, ma ùn ci facenu mancu casu ! S'è vulete cunosce a seguita di e bellezze di u paese, venite puru, eiu ùn sò nè u Webmaestru, nè Prévert. L'enumerazione, ùn sanu fà chè què. Per curtesia, li lasciu l'esclusività di a maestria di st'arte. Ma sopratuttu, a dicu franca è chjara, perchè sò più maneschi chè mè! Alisciu, alisciu... Ci hè ghjatta !

Secondu, voi altri masci sgalabati, incravattati o incustumati è forse metrosessuali, quale hè chì sà, puderete amparà à cambià una rota... Ùn face male à nisunu di ficcà e mani ind'è u grassu negru di e vitture. Ancu s'elle tricheranu appena e carezze, a vostra moglia sarà di sicuru impressiunata da tamantu impegnu micanicu!

Terzu, ancu puru s'è i vostri amichi vi anu datu per cugnome "Jean Alesi", "a lumaca", o "a bistuca", puderete, da l'altu di e ripe capicursine, piglià i cunduttori di a Giraglia à a risa. "Mì à ellu! Guarda cum'ellu và pianu! Cerca i funghi o chè? Ancu eiu ci possu andà s'ellu hè per guardà a machja !" Fate u gallu, muntate vi a sega, face prò à ognunu! Sò i psicologhi chì a dicenu! Dopu una simana passata à fà vi scarpighjà da una dunnaccia, pigliate a vostra rivincita ! À u scagnu, puderete cuntà a vostra dumenicata à a Giraglia !

Eppò, à a Giraglia, puderete scuntrà una mansa di ghjente di tutte e mamme. Venite à fà u corsing. Cosa hè? Hè l'addizione di a parolla corsa "corsa" è di a parolla inglese "flirting". Certi parlanu di "smirting", eiu, pensu chì a Giraglia serà l'occasione d'unepochi "corsinghi"... Ùn avete ancu capitu? Si tratta di basgià incù qualchissia ch'averete scontru durante a corsa.

Un antra ragiò di vene in Macinaghju, hè u figatellu. Micca nustrale, quessa pò nò. T'avemu u pesciu, ancu l'aligoste ma micca u figatellu. U figatellu, u ci pudete arricà. U manghjeremu vulinteri ! À tutti quelli chì sò bravacci è chì mi purteranu un pezzu, i ringraziu capunanzu ! Tanti saluti ! Bona strada ! Andate pianu amichi !

Hè listessa per a vinaccia. S'è vo'state in San Fiurenzu o in Patrimoniu, arricate ci una buttiglia. Face sempre piacè, ancu puru s'è avemu i nostri vignaroli : Gioelli è Nicrosi !

Siamu serii, u vinu, u puderete tastà subitu, a sera, in cantina, quandu saranu partute l'ultime vitture è ch'ellu turnerà silenziosu u paese. Uffa! Basta a cumedia ! E vitture vi garbanu pocu? Site cullati in Macinaghju per scruchjà e donne cullate apposta per vede è fassi vede da i tippi chì anu un mutore in piazza à u ciarbellu? Mettite vi appena di sale in zucca ! Manzagol, Trojani è tutti quanti sò digià partuti! A vous les petites bastiaises ! Ancu di grazia ch'ellu ci hè di più donne chè vitture! Peccatu per voi ch'ellu ci fussi di menu donne chè masci... Site cullati forse troppu tardi !!! N'avete una techja di tuttu : di e vitture, di u rimore, di Macinaghju, di u mare, di a puzza di i pesci è di u muscatu. Vulete rifalà in Bastia?

Penserete à andà pianu pianu chì ci saranu forse i giandarmi...

u 25 di Marzu 2008
Sbanditu



1.mandatu da renusinca u 25/03/2008 15:25
và bè portu u vinu(di patrimoniu) è à manghjusca (di tavagna)! ;)

2.mandatu da ci vole à minà u 25/03/2008 17:28
bah passa dinù pè a Castagniccia nò ? cosa avemu andà à fà ind'è sti topi di capicursini !!!

3.mandatu da alcotest u 25/03/2008 21:55
cosa hè st'affissu?

Sbandì, dop'avè fattu a mozzarella cù u latte caprunu, ci mette u campanile di A Porta in Macinaghju !!!

aghju da finisce per crede ch'ellu ùn ci hè micca ch'è A Bistuca chì beie quì...

4.mandatu da giragliator u 26/03/2008 11:59
aio, renusinca m'invita à spuntinà è nimu reagisce ?

site veramente mal alevati o zitelli ! per una volta chi una zitella ùn vi mette micca un "ventu" !

o sbadì reagisci ! è estrime ? induve hè chjappu stu sgaiuffu ???

5.mandatu da renusinca u 26/03/2008 15:30
hahaha ghjè vera và bè!!! aghju capitu vi lasciu tra omi...ti ringraziu o sgio giragliator lol

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta