Accueil
Envoyer à un ami
Version imprimable
Partager

À chì ride, à chì pienghje...

Vi prupongu quì un girettu per fighjulà i risultati di l'ultima partita eletturale...



À chì ride, à chì pienghje...
Bastia
In Bastia, s'hè discitatu Zuccarelli dopu u schjaffu di l'ultime legislative. L'avia detta a simana scorsa ch'ellu vulia vince da u primu giru. Certi avianu a risa in bocca sentendu lu cusì sicuru. Eppuru, li hè mancatu pocu per francà sta bocca. Dopu quaranta anni di putere, nisunu s'aspettava à un risultatu cusì altu, mancu a Sofres chì li avia datu 46%. Mancu eiu d'altronde!!!

In quantu à l'uppusizione, Chiarelli l'hà fatta à mantene u so eletturatu, ancu puru s'ellu perde un centu di voti in pettu à 2001. A surpresa vene di fatti da Simeoni chì hà ricevutu più voti chè l'Unione naziunale in u 2004. Oramai, l'uppusizione bastiaccia ùn hè più purtata da Chiarelli ma da u figliolu d'Edmond chì difende "un naziunalisimu di custruzzione, di prugetti è di prugressu". Ancu puru s'è a so lista cuntava unepoche di personne ghjunte da l'infora di u mondu naziunalistu, si pò dì, di modu francu è chjaru, chì u so currente piglia a suprana nant'à l'indipendentisti chì piglianu elli, a falata, perdendu 400 voti in pettu à sette anni fà. Jean-Guy Talamoni hà accoltu solu 905 voti contr'à 2319 per Gilles Simeoni.

Perchè? U discorsu di Corsica Nazione chì incalcava di più nant'à a reazzione è a resistenza di fronte à Zuccarelli è Sarkozy ùn permettia micca à a lista Talamoni d'andà à circà elettori à l'infora di a LLN. Eppò, nant'à l'ambiu bastiacciu, l'affare Pieri è l'annunziu nant'à l'onde di RCFM ch'ellu sustenia sta lista averà forse purtatu elettori dubbitosi à vutà per Simeoni, santificatu, dopu ch'ellu abbia difesu à Yvan Colonna, cù u garbu è a manera.

Ancu appena mi scurdava di a diritta ! Hè vera chì in Bastia, ùn esiste più! A sintite spatanscià? Ancu puru s'ellu face 11,57% incù u sustegnu di l'UMP, Albertini hè invitatu à piglià a so ritirata pulitica. Si gira una pagina in Bastia. S'è simu sicuri chì st'elezzione era l'ultima di Zuccarelli, serà forse listessa per quelli chì anu fiascatu. Dumenica sera, Chiarelli paria abbambanatu da u risultatu!

Calvi

In Calvi, hè di più di menu listessa riturnella. Ange Santini hà vintu da u primu giru mentre l'uppusizione hè naziunalista. Stefanu Serra hà accoltu 27,72% di i voti contru à 72,74 per u manghjone di lasagne Maggi, Ange Santini ! (Facciu rifarenza quì à l'articulu miticu di u webmaestru nant'à "e lasagne d'Ange Santini")

Purtivechju

Postu chì parlemu di lasagne, biimu ci un bichjerucciu di vodka incù Camellu de Rocca Serra! In Purtivechju, pare chì a diritta ùn abbia micca festighjatu a so vittoria. U risultatu hè piuttostu amaru per Georges Mela. Incù 46,33% di i voti, puderebbe perde di pettu à Jean-Christophe Angelini chì hà realizatu un risultatu mai accimatu da un naziunalistu : 37,17%. Ancu puru s'è a so lista ùn era solu bianca è nera ma sustenuta da una parte di a manca purtivechjaccia incù Jeanine Boschi-Andreani, s'è femu l'addizione di i so voti è di i quelli di u candidatu di u PS, Frédéric Benetti, u mere puderebbe perde a so piazza. In quantu di a lista Riacquistu chì hà fattu 6,23%, una parte di i so vutanti puderia sustene à Angelini per ch'ella caschi a diritta in Purtivechju. Dopu cinquanta anni sott'à u cappellu di u "renard argenté", a cità di u sale, di i zinzali è di i pippoli puderebbe cascà in e mani di u giovane "Fox". Sarebbe què un veru terramottu puliticu in Corsica !

Corti

In Corti, ci pudiamu aspettà à una vittoria di Tony Sindali. Iè. Ma micca à u primu giru ! A manca(ta) di Ghionga hè stata stirpata. Ci vole à dì chì a cumpusizione di a so lista incù l'anzianu mere in ultima pusizione ùn arrecava nisun segnu di rinnovu. In quantu à i naziunalisti, Andria Ferrandini face solu 6%. Quandu omu pensa chì l'altri Corsi tenenu Corti per un locu vivu di u naziunalisimu...

Aiacciu

Tonton Simon l'hà fatta ellu à vince quasi à u primu giru. Incù 42,50 %, ùn la face mancu più à vede i so uppunenti. U menu luntanu, Paul Ruault, sustenutu da l'UMP è u CCB (Cumitatu Centrale Bunapartista) si piglia un schjaffu cum'è José Rossi chì ùn franca i 10%. Cortey, hè per contu soiu in terza pusizione trà Ruault è Rossi ma e spiccature sò prufonde in a diritta aiaccina. I naziunalisti, spiccati quant'è a diritta, anu fattu u piùpessimu risultatu dipoi più di vinti anni... Inseme, facenu solu 14,3 %... Cacciati ch'elli sò da u primu giru, ùn averanu nisunu elettu. "Forti saremu s'è uniti simu", vale stu mottu per tutti, da l'UMP à CNI. Unita in giru à Simon Renucci, a manca s'impatrunisce pianu pianu di a cità di Napuliò.

Bunifaziu

In Bunifaziu, hè a lista d'unione larga (cùn naziunalisti) contr'à Ati Lantieri è a municipalità attuale chì hà fattu tombula. 23 eletti nant'à 23... Jean-Charles Orsucci serà u mere di i pippoli ! Chì ne penserà Seguéla?

Ritruvate l'inseme di i risultati nant'à u situ di mediaterra

u 10 di Marzu 2008
Sbanditu



1.mandatu da estrimei u 10/03/2008 19:03
vuleria di a mea nant'a st'ellezzioni :
BASTIA :
scopru a a lettura di stu cummentu chi pieri appughjava a G.Simeoni - pensu ch'ell'he un bel affare per Talamoni.parecchja ghjente l'averà vutatu piu vulenteri (per via di pieri,so statu parech'anni senza vutà naziunalistu)-
mi pare chi G.Simeoni,ancu s'ellu a fattu una pulitica aperta, 'un ha mai lasciatu cascà a nostra bandera chi s'he sempre vista e , bellu spessu, ha datu a prova ch'ellu era assai attaccatu a a so lingua. Capiscu chi naziunalisti sinceri l'appianu vutatu :era a piu bella manera di pruvà a fà cascà Zuccarelli.
Calvi:
i naziunalisti avianu aghjutatu Santini a piglià a merria. mi pare chi a pulitica di a merria di Calvi he oghje bellu luntanu di una pulitica a pro di i corsi.
Purti Vecchju :
a dillà franca,'un aghju micca trovu culore naziunalistu nu a lista Angelini .mi s'he parsa piutostu una dimarchja di ghjente chi vulianu piglià a merria e basta.-micca bandera,micca lingua corsa-
u mio parè he chi a lista di Benetti ,fatta in magiurità di ghjente di l'insignamentu, he custi per impedi chi voti di manca si portinu nant'a Angelini.-di sicuru si mantenera-
Corti:
a colpu d'occhju, l'ellezzione di Sindali 'un era cusi assicurata,un ci 'ole a scurdassi chi Ghjionga avia l'appoghju putente di Giacobbi e chi a cità di Corti ,cume l'Isula e a Ghisunaccia,facia parte di u calculu Giacobbi.
A.Ferrandini ,chi cunosce benissimu a situazione curtinese , ha vulsutu aggruppà i naziunalisti ma a febbraccia vecchja ha pigliatu a suprana-a volpe perde il pellu ma ....-
Ajacciu:
tutte ste liste nasiunaliste contr'a Felli,perche u vulianu fà capiciuttà?

Vezzani:
forse Allessandrini perderia u cunsigliu generale ?

2.mandatu da Iscia !!! u 10/03/2008 19:38
ùn aveti capitu, Pieri sustinia à Talamoni micca à Simeoni.
in quantu à a a rifarenza à u naziunalisimu, veni à dì : micca banderi = micca naziunalistu ùn hè mancu mali, ci vulia à caccià la quissa

3.mandatu da orezza u 10/03/2008 21:07
prima dicizione d'ORSUCCI in bunifaziu : ricusà u finanzamentu di a stazione d'epurazione in l'isula di CAVALLU.

BRAVU !

4.mandatu da infurmazione u 10/03/2008 22:54
CNI in Bastia in 1998, mancu 700 voti :

http://www.elections-corse.com/Archives/1998/TERRIT1/BASTIA_T.html

dunque anu digià fattu peghju.

ùn aghju nunda contr'à Gilles, ma aghju a paura ch'à forza, u "naziunalisimu canada dry" à a fine sia un "giacobbi amegliuratu"... à elli di cunvincemi di nò...

5.mandatu da ciabrini Jean-Pierre u 02/04/2008 15:51
In portivechju a lista d'uppozizioni era cundutà da Angelini e Ghjuvan Petru Ciabrini un cappiscu mica parchi vo tratteti di Janine Boschi-Andréani e no di quistu sucialistu.
Arringraziarvi.

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta