A dream team di i più gattivi di u Sporting

1. Pascal Olmeta Siguramente l’ex-ghjucadore bastiacciu u più famosu. Hà statu pocu a u Sporting (81-84), u tempu di mustrà u so putenziale. In Furiani, hè sopr’à tuttu cunnisciutu pè a so cullata « à u grillage » di a tribuna Sud per chjappà un sustenidore turchinu chì avia sciaccatu un calciu in piena faccia à u « juge de touche »…

2. Pierrot Bianconi Di siguru u più legendariu di i castagnoni di a storia sana di u « Skeubeu ». E so qualità fìsiche è ancu tènniche, a so scimità nant’à u terrenu (da 82 à 93) è a so tràgica sorte, n’anu fattu u veru mitu per parechje generazioni di Furiani. A so epupea hè da leghje nant’à u celebre è appreziatu situ Ultras Bastiacci

3. Patrick Valery Stu laterale mancinu, d’orìgine corsa, era digià da tempu unu di i ghjucadori i più duri di u campiunatu francese. Trà 96 et 2001, hà cuntribuitu à mantene a reputazione d’Armand Cesari. L’accaniti s’arricordanu sempre di u macciu contr’à u PSG è di i so attentati nant’à Robert è Yanovski (espulsione à a 43a minuta).

4. Charlot Orlanducci Cugnumatu « U Lione di u Viscuvatu », Charlot hà guasi fattu a so carriera sana (da 69 à 87, for’di una meza stagione à u Red Star) sott’à a maglia turchina. D’ellu si dicia chì « u ballò passava, ma l’attaccante micca ». Trà e so vittime e più famose, ritenimu i puveretti di Delio Onnis (chì si facia sempre ciavattà in Furiani), è sopr’à tuttu u messin Tony Kurbos, lampatu seccu dà un cazzottu tremendu (eppo inviatu a l’ospidale in u statu di « mezu coma ») in Cuppa di Francia di u 1984.

5. Jeannot Vincenti Stu ghjucadore di l’anni 60 (epica da veru magnifica per tutti i sustenidori chì l’anu campata) facia parte di a famosa difesa cù Farina è Freddy Gandolfi, chì sparghjì u terrore nant’à tutti i terreni di u campiunatu. Hè oramai legendariu pè u tackle di l’astru mondu chì avia propriu scalpighjatu u so attaccante, è pè u so cummentu a i cumpagni «guardate puru nentru u scarpu, o tantu ci hè sempre u pede di u tippu » !

6. Cyril Rool Pistellu di u decenniu passatu (93-98), hè u ghjucadore u più sanziunatu di tutta a storia di u campiunatu di Francia (più di 20 cartoni rossi è di 150 cartoni gialli !). A lista di e so malfatte hè cuntata nant’a u sempiternu situ UB.

7. Johnny Rep In Bastia, a megastar ollandese (chì facia parte di a grandissima squadra Oranje à i Mundiali 74 è 78) era più cunnisciutu pè a so classa è a so reputazione di dunnaghju, chè pè e so malfatte. Purtantu, stu geniu di u ballò merita a so selezzione pè un solu fattu : u tremendu « coup de coude » sciaccatu à u talianu Caporale (cascatu seccu seccu è rimpiazzatu subitu), contr’à Torino à u Cumunale, quella sera di Dicembre 78 chì firmerà pè l’eternità in i cori di tutti i Corsi di u mondu.

8. Laurent Moracchini Difficiule di cumpone una selezzione degna, senza ch’ellu figuressi nentru u fiumurbacciu di Chisà. À u mezu terrenu, è da 85 a 97, fù l’autore di certe di è più spaventose malfatte di Furiani. Ramintemu e memurevule capate à Di Meco (chì si pigliava à l’epica pè un super –caldu di u campiunatu) è à l’insuppurtevule pinz capitanu di Guingamp, Coco Michel. In ogni casu, u risultatu fù chjaru è nettu : un nasu rottu pè i dui pretensiunuti…

9. Carlos Borges Oghje ghjucadore scunnisciutu, Carlos Borges, ùn era micca u più viulentu di i N°9 ch’anu ghjucatu pè u nostru Sporting (87-88). Ma senza nisuna esitazione, era u più maturu ! Capelli longhi, cusciotti di l’astru mondu è short rikiki, calzette basse, l’uruguaianu era veramente un cavallu scemu. Poche risate quand’omu u vidia fiascà solu solu davant’à u but, è dopu rumà cum’è un cignale in terra fendu finta di pienghjulà ! Averete capitu chì sta capra di prima trinca si facia assai magagnà da u publicu. È bella sicura, ùn si ne rindia micca contu, è u poverettu si girava ver’di e tribune pè dumandà u sustegnu...

10. Piotr Swierczewski Torna un bellu specimen chì n’hà fattu tantu cù u Sporting (95-2001) dopu un passaghju à Saint-Etienne (omu si ramenta l’azzuffu maiò contr’à Bordeaux). Vista a so casata imprununciabile, fu in furia chjamatu « Piotr » o « U Pulunese ». Ghjucadore di talentu, ma assai duru, era sempre u primu à difende i cumpagni quand’ella ci nascia nant’u terrenu.

11. Pierre-Yves André Quella selezzione ùn pudia esse ghjusta è obbietiva senza un ghjucadore sempre in attività. Averiamu pussutu sciaccà un tippu cum’è Medhi Meniri chì ultimamente si face assai rimarcà sott’a maglia turchina, ma ci si vulia un’attaccante. A scelta di u nostru capitanu oghjincu hè apparsa naturale. Pierre-Yves ùn si hè mai lasciatu fà, è pò testimunià d’un bellu saccu di cartoni rossi e gialli (azzuffi contr’à Pascal Nouma per esempiu).

Ugnunu averà u so avvisu nant’à a selezzione. È ghjè per quessa ch’è no simu ubligati di cità astri pistelli chi averianu pussutu figurà nentr’a à l’11 di i Castagnoni : u laterale bascu Jean-Louis Cazes (75-85), u stoppeur è capitanu di a Cuppa ‘81 Paulu Marchioni (74-80), u Serbu Nisa Saveljic chì minava ancu i giurnalisti (2003-04), u guerrieru di Fanfan Felix (71-78) o u difensore sardignolu Paolo Farina (58-71) è a so famosa « machine a bosseler » (i calci).

Ma u Sporting, a sapemu tutti, ùn hè micca un club cum’è l’astri. È i castagnoni sò sempre stati numerosi, ancu in giru à a squadra. E dunque lògicu di numinà Intrenore scimulitu Freddy Antonetti (94-2001), u Presidente Trapanatu Yves Canarella (92-93), u Diretore Spurtivu Minacciosu Jules Filippi (anni 70) sempre calibratu in i vestiaires è ch’avia braccatu u nizzardu Jean-Pierre Adams (1976).

In fine, avemu tenutu à rende umagiu à i sustenidori à traversu u puverettu di Philippe Villa (sparitu parechji anni fà è protagonistu di parechji azzuffi famosi cum’è quellu di Nîmes (contr’à Angers in Cuppa ‘70) è u fiumurbacciu “Kempes” chi avià tichjatu di colpi u furdanu d’arbitru Monsieur Nouet
contr’a Dijon (1989).