Accueil
Envoyer à un ami
Version imprimable
Partager

A festa di a musica o a cumedia di u tazzu ?

Cum'è ogni annu dapoi Jack Lang, u 21 di ghjugnu si scatènanu i pseudo-musicanti per sciappavvi l'orechje.



A festa di a musica o a cumedia di u tazzu ?
A sapemu bè, avete da dicci ch'è no semu azezi, sempre à lagnacci di tuttu è ch'è no ùn semu mai cuntenti. Hè vera, è casca bè era a "Fête de la Musique", invenzione di Jack Lang à l'epica di a manca à u putere, vale à dì u seculu passatu.

Digià, ci vuleria forse à scambialla di nome, perchè micca "Fête du bruit", "Festa di u tazzu è di a ghjente briaca per sti carrughji" o "Burdellu di u rimore", currisponderia megliu à a realità.

Perchè si passa cusì in veru, u carnavale di u 21 ghjugnu. Ogni pseudo-gruppu di pseudo-musicanti si crede in l'òbligu d'andà à ughjulà e so canzunacce in ogni carrughju.

U peghju hè ch'ellu viaghja : tam-tam è djembé d'intermitenti in ciavatte, falsi hardos capilluti è cughjosi chì mughjanu, giovani lonzi chì si piglianu per mostri di u rock, fanfara di a pulizza chì marchja à u rìtimu di "Tiens voilà du boudin", canterini corsi chì facenu un macellu cù e riprese di Compañero è Sinfunia Nustrale.

Ancu peghju : piace à a ghjente : centinaie d'oziosi in perdizione per i carrughji, in brama di chè ùn si sà ma in traccia di vagabundà cum'è persi. Certi sò arruvinati da a bieraccia calda, è di siguru puzzulenti perchè ballanu nant'à i tubes di Calogero è di Jonnhy Halliday dapoi ore sane.

Iè, sò agorafobu, è allora ?

In più di quessa, u tema quist'annu era "50 ans de chansons françaises". Cum'è s'ella ùn bastava micca, ci anu ancu da impone un sùppulu di franchouillardise in sta panicca senza nome. Semu dunque partuti per 3 o 4 ore di ciò chì a cultura francese face di megliu : Renan Luce, Cali, Joey Starr, Didier Barbelivien, Michel Sardou, Florent Pagny, Patrick Bruel, Doc Gynéco, Stanislas, Vincent Delerm, Richard Gotainer, Mylène Farmer, Louise Attaque, Yannick Noah... eccetera, a lista hè troppu longa. Peghju ch'è un cuncertu di Les Enfoirés !

Bon, avete capitu, eiu mi stò in casa per sta festaccia chì marca u principiu di u carnavale di l'estate.

Ùn a sò ma a Fête de la Musique puderia avè un interessu s'ellu si vidia cose più orìginali : un gruppu di slameurs di Lupinu cantà L'Armata di l'ombra, a fanfare di i flicchi ripiglià Antisocial, Le Choeur d'hommes de Sartè briunà "I will survive", u gruppu di hardos cughjosi ughjulà "T'aghju intesu caminà di bughju in la campagna", Voce Ventu ripiglià "ça plane pour moi", Jean-François Bernardini cantà "Highway to hell" è Jean-Martin Mondoloni in a pelle d'Helmut Fritz.

Tandu sì chì faleraghju anch'eiu in carrughju !

u 21 di Ghjugnu 2009
U Sgaiuffu



1.mandatu da patator u 22/06/2009 00:22

2.mandatu da KÜG u 22/06/2009 09:41
"Ùn a sò ma a Fête de la Musique puderia avè un interessu s'ellu si vidia cose più orìginali : un gruppu di slameurs di Lupinu cantà L'Armata di l'ombra, a fanfare di i flicchi ripiglià Antisocial, Le Choeur d'hommes de Sartè briunà "I will survive", u gruppu di hardos cughjosi ughjulà "T'aghju intesu caminà di bughju in la campagna", Voce Ventu ripiglià "ça plane pour moi", Jean-François Bernardini cantà "Highway to hell" è Jean-Martin Mondoloni in a pelle d'Helmut Fritz."

lettu què, si po piantà di leghje.

3.mandatu da a tronscia u 22/06/2009 12:02
è Jean-Paul Poletti cantà "i believe i can fly"

4.mandatu da Cumpalliols u 22/06/2009 13:11
È chì n'emu da fà, di sta festa di a musica ?

5.mandatu da KÜG u 22/06/2009 17:27
"I Macchjaghjoli" (sic) ripiglianu "Fous ta cagoule !"

6.mandatu da EL u 23/06/2009 10:36
U Sgaiuffu, ùn si micca appena rompifesta :)

7.mandatu da panetta u 23/06/2009 11:42
è Orizonte cantà i più grandi successi di a Gompagnie Créole

8.mandatu da GWM u 23/06/2009 16:21
L'Arcusgi cambianu di stilu è pè fassi cunnosce à l'esteru si vestenu cum'è u gruppu fillandese LORDI

9.mandatu da Cionchèceca u 23/06/2009 17:18
Petru Guelfucci canta "ma cabane au Canada"

"Blague à part " si mette à a pulifunia di messa

Francis Lalane ...nò, lascemu corre, "surfait"

Thomas Dutronc canta "j'aime plus la Corse..."

I Mantini facenu e percussione nantu à pubelle

Paul Giacobbi canta "olélé olala, l'maroquin je veux, l'maroquin j'aura"

L'Assemblea di Corsica face i Chori di l'Armata Rossa

E scole corse cantanu " a Marsegliese"





10.mandatu da etocorne u 23/06/2009 18:35
è quale hè chì canta a "salsa du démon"?

11.mandatu da filidatu u 23/06/2009 23:14
eo à Petru guelfucci u viderebbe piuttostu cantà a musica di a publicità "118 218"

12.mandatu da Cumpalliols u 25/06/2009 11:47
"E scole corse cantanu " a Marsegliese" "

Mai ch'ella sia.
Signore !
Ùn hà micca fattu à bastanza vittime nucente, u pulisciamente di cerbellu ripublicanu ?



13.mandatu da ziu santu u 26/06/2009 01:34
un gruppu à l'usu quilapayun cumpostu di pierre jean luccioni, Jacques bastianesi petru leca è paul rossi

Mai Pesce chì canta Rage Against the Machine

L'albinu ripiglia Jobi Joba

è ùn ci scurdemu di Frankie Beverly chì seria u capimacchja di a festa di a musica

Novu cumentu :