Accueil
Envoyer à un ami
Version imprimable
Partager

À impiastra impiastra cù a chantilly : è s’è no ne fessimu u ghjocu di l’istate ?



A sapiate voi chì a crema chantilly (sciantiglì) po turnà una funa ?

Innò ? Ebbeh, dumandate à u tintu Bernard-Henri Levy : d’aprile 2014, pà l'ottesima volta si facia impiastrà a so faccia liscia, i so capelli di seta è u so prufilu di statula greca (quellu chì piace tantu à Arielle Dombasle) incù una di quelle torte cù a chantilly. L’autore di l’orrendu crimine era statu, una volta di più, u superman di l’attentatu pastizzeru : Noel Godin.

Tintu BHL : s’ella era statu corsu si muvia tutta a so razza à fà vindetta ! Certi diciaranu invece tinta chantilly… Ci hè da dumandassi quale hà leccu da veru, da l’omu à a crema, in quelli azzuffi lattaghji.

Oghje a Piazzetta vi prupone un ghjocu, chì intaressu ùn hà ch’è s’è vo v’impignate in veru, carissimi littori.

Primamente, si tratta di prupone un modu identitariu da impiastrà à BHL.

Mittemu ch’ellu sia invitatu st’istate à e nuttate di a musica classica in Corti. Chì li fariate tastà da vicinu, frumbulendu carreghe, fendu cascà spittatori nucenti è intrampalendu voi incun ellu appiighenduli una forte pressione di a vostra palma nantu à a faccia, mentre chì Tony Sindali mughja à l’offesa contru à a dimucrazia ?

Una pruposta pudaria esse, mittemu, a migliacciola : in quella ùn si rispara nè pasta nè frummagliu. Ma ci volenu i farri apposta, è dinò una cucinara cù u gasu : oghje a maiò parte anu l’induzzione, cusì si perdenu i valori maiò di a nostra cultura. Altru prublema : u muscu pudaria attirà i famiti, è vi ritruvariate, s’elle sò di gratisi, cù una coda longa da a Merria sin’à e Lubbiacce… Infine ci hè da dumandassi s’ella vale u colpu di guastà tanta robba bona pà BHL. Ma tandu, o ghjente, caschemu in la metafisica…

Or vinemune avà à a ghjente da impiastrà.

Vi prupunemu di stabbilì una lista di i cinque Corsi (ma trè ponu ancu bastà) più famosi da inturtà. Eccuvi quì dui esempii pussibbuli :

Pasquale Pa... Ups, tamantu sbagliu ! Scusate, a lingua scrochja…
Napulione: bene intesu, ci vole, ogni volta, à truvà un mutivu seriu. Quellu a so migliacciola in faccia a si pigliaria par via ch’ellu hà fattu d’un locu di nulla, Aiacciu, una cità piena di superba, un speziu di paone imbuffatu da a muntata di sega di u Statu francese, u veru patrone di casa.
Tony Sindali : par via ch’ellu si saria pisatu da prutege à BHL, vulendu difende a dimucrazia in quelle nuttate di a musica classica in Corti. O puru à Napulione s’ellu avia campatu in tempi soi…

Eccu, oramai tocca à voi à fà e vostre scelte. Vi dumandemu dunque :

Di sceglie una sosula nustrale da fanne un usu terruristu

Di prupone u classamentu di e cinque persunalità corse (o puru e trè) chì si miritarianu a so bella impiastrata in faccia (bene intesu, ponu esse cuncirnati i capelli, a ghjacchetta, a camisgia…)

Guardate chì, in ogni casu, ci vularà à ghjustificà a vostra lista incù una piccula spiigazione.

Ed avà, carissimi littori, bona furtuna, bona statina è una partita d’impiastra impiastra di quelle putente !
À l’occasione, pinsate à favvine una in trà d’amichi, ind’una serata lounge o in un ballu di paese…

u 13 di Ghjugnu 2015
L'Azezu



1.mandatu da salinzucca u 13/06/2015 11:53
sè ùn era cusì longu à appruntà : sturza preti à i ministri chì ghjunghjenu in corsica à tichjassi di robba nustrale, fà prumesse mai tenute è vultassine in francia à metteci à a risa

2.mandatu da guerrini u 13/06/2015 14:32
Cù a salza di pomidori impiastrà l'eletti corsi chì anu dui linghjaghji unu in l'isula l'atru in cuntinente.

3.mandatu da guerrini u 13/06/2015 14:42
Impiastrà incù a salza di pomidori l'eletti corsi chì anu dui linguaghji un in Corsica è l'altru in cuntinente .

4.mandatu da estrimei u 13/06/2015 17:46
certe ghigne ùn ci hè bisognu d'impiastralle per ch'elle faccinu ghjunghje u vomitu...

per via di "Via Stella " ci' avete avvizzatu a cunsiderà e Facciacce cume un mumentu beatu, di risa e di finezza ; ùn ci guastate a piazzetta 'ncù certi ritratti indegni .

5.mandatu da melanchonmerzu u 13/06/2015 23:38
una bella fetta di pulenda fritta à meza faccia di u teghju di Paul Giacobbi (bella calda ch'ellu purtessi a traccia qualchì ghjornu) da quì puderia vultà quella spressione magnifica di : FACCIA À PULENDA

6.mandatu da casgiu merzu u 14/06/2015 15:22
una torta di casgiu minatu in faccia à ssi pinzutacci chì partenu nant'u GR20 cun sandule in plasticu è maglietta senza maniche

7.mandatu da forza reale u 15/06/2015 11:12
una struvinata in faccia di l'erbaghju di Furiani à i di dirigenti di u Sporting ch'elli s'assumiglinu à quellu di cetelem da fà si un picculu creditu è tichjà si torn'à pena...!!!

8.mandatu da Morisson u 21/07/2015 23:08
Alias le gloupier

Novu cumentu :