Accueil
Envoyer à un ami
Version imprimable
Partager

A peghju squadra di u Sporting

E più grande zappe di st'ultimi vinti anni...

À a so manera, sò entrati in a legenda di Furiani. I sustenidori i più accaniti si n'arricordanu tutti d'elli. Micca veramente perchè anu fattu trimà e reti o pè i so gesti tènnichi è spetaculari. Nò, piuttostu per i so but mancati, i so cuntrolli fràcichi è e so zappate. Piccula ritrospettiva di i peghju ghjucadori di st'ultimi vinti anni...



A peghju squadra di u Sporting
1. Laurent Weber : Ùn hè statu ch'è una stagione à u Sporting (1996-97), ma l'hè bastatu per firmà cum'è unu di i goal i più pèssimi di st'ultimi anni. Hè sèmplice : à ogni partita, una cacata.

2. Greg Vanney : Hè Robert Nouzaret chì hà fattu vene l'americanu à u SCB. Hè passatu cusì da Los Angeles à Bastia è duvia dumandassi ciò ch'ellu facia in Corsica. Noi, ci dumandavamu ciò ch'ellu facia nant'à u terrenu.

3. Jamie Fullarton : Stu ghjucadore ci hè venutu direttamente da Scozzia, è nunda ch'è per quessa i sustenidori l'anu pigliatu in simpatia. Nant'à u terrenu si ricunniscia à u so fìsicu più vicinu di u pastizzeru ch'è di u ghjucadore di ballò.

4. Bernard Lambourde : Prima partita in Furiani, prima mancata, prima disfatta di a stagione di u Sporting. È hè stata cusì tuttu l'annu. Ùn era tantu un gattivu ghjucadore, ma ci hè sempre vulsutu chì durante una partita Lambourde fessi una cacata chì metti a squadra in difficultà. Una stagione difficiule per i nervi...

5. Andrade William : U difensore bresilianu ci venia direttamente da u grande Benfica cù un solidu palmarès. Ma di Bastia ne ripartò senza gloria è sott'à e risate. Prima titularizazione in Furiani è primu CSC contr'à u Gueugnon di u lonzu di Roland Gransart. Semu partuti per un annu di Video Gag.

6. Eric Dewilder : Sceltu da Léonce Lavagne per u ritornu di u Sporting in u 1994, hè venutu à scaldà u bancu di i rimpiazzenti è quellu di l'Apocalypse. Una grande annata nant'à u dancefloor !

7. Raynald Pedros : Trista sorte ch'è quella di Pedros, grande sperenza di u ballò francese è di a scola nantaise. Titulare à l'Euro 96, prumessu à una grande carriera, finiscerà in l'anonimatu di i before di u portu di Toga.

8. Pierre Deblock : Ah ! Deblock... Sbarcatu in Corsica a trista annata di Lambourde è Nouzaret, fù veramente un scumpientu à u so postu. O quantu passe mancate è cuntrolli zappati ! Fù di siguru titulare pè a chjibba memurèvule pigliata à Lens quist'annu (disfatta 7 à 0).

9. Flavio : Titulare senza discussione di a squadra di e più grande zappe di u Sporting. Annunziatu cum'è una futura stella di u ballò, u brasilianu firmerà cum'è una di e più grande magagne di Furiani. E so statistiche sò impressiunanti : 4 parite, 0 but in duie stagioni. Nunda à aghjustà.

10. Mariusz Piekarski : U pulunese ghjucava à u Brasile nanzu d'esse trasferitu in Bastia. Anch'ellu avia una grossa reputazione : hà ghjucatu à u Flamengo cun Romario. Prublema, ùn vole micca dì ghjucà CUM'È Romario... Finalmente, d'ellu firmeranu dui ricordi : a so moglia chì era miss Brasile è a so faccia, intantu ch'è sosie officiale di Plastic Bertrand.

11. Nicolas Dieuze :
Nunda ch'è a prununzia di u so nome arrega gattivi ricordi à tutti quelli chì seguitanu u Sporting. O chì stagione ! Un annu sanu cum'è attacante titulare sott'à Nouzaret per solu dui picculi buts messi è ùn sò quantu mancati. Una vera suffrenza per tutti l'abituati di Furiani.

Averianu pussutu figurà in sta squadra :

Paulo Alvès
Pierre Laurent
Pascal Chimbonda
Bjorn Kvarme
David Mazzoncini
Fabien Piveteau

è... Ghjasippì !

D'accordu ? Micca d'accordu cun sta squadra ? Reagite, cumpunite a vostra squadra ancu voi ! Lasciateci puru un cummentu !
A peghju squadra di u Sporting

A peghju squadra di u Sporting

u 6 di Farraghju 2009
U Sgaiuffu



1.mandatu da GWM u 06/02/2009 09:42
Vanney, Fullarton è Dewilder: ùn aderiscu micca. Anu fattu cio ch'elli anu pussutu.
Eppo Dewilder hè per sempre ligatu à un mumentone di a storia di Furiani.

Deblock: capitanu di sta squadra, sopratuttu dopu à l'episodiu "di a suppa".

2.mandatu da filidatu u 06/02/2009 11:24
è di paulo alvès vi ne site scurdati?

3.mandatu da GWM u 06/02/2009 11:40
sughettu apertu à cuntribuzione, per esempiu: i sustituti ?

4.mandatu da Sporting u 07/02/2009 02:57
Un vi ricurdade micca di Andres Grande ? Chjera u piu grande sumeracciu d'a creazione ...

5.mandatu da un naziunale u 07/02/2009 13:28
e dinnu ferrigno xavier ch'avia mercatu contr'a u sporting u but di quelli meuh meuh! mais contre son camp e po d'altri...

6.mandatu da Pastacciu u 08/02/2009 14:42
Sta squadra hé un veru scumpientu !! Eu prupongu dinù Paulo Alvès, Pasqua Chimbonda, Bjorn Kvarme, Uras tutti maravigliosi ghjucatori. Cume capitanu pensu à Chimbonda per u so spiritu esemplare.

7.mandatu da Donne ch'ùn caspiscenu nunda u 08/02/2009 16:09
O zitè eiu ci capiscu pocu ind'u ballò, forse perchè sò donna è ind'u nostru cerbellu ùn ci hè micca codice da capicci qualcosa. Ma ditemi appena, induve sò i Corsi inde issa squadra??? Perchè s'elli fussinu nostri, forse si puderia dì : i pachemu pocu, perchè simu una piccula squadra, ma quì, fà vene tippi da u Brasile, da a Pulogna è chì sà da induve, per facci perde: pensate chì ne vale a pena?

8.mandatu da Pasqua Chimbonda u 08/02/2009 18:54
Ringraziu à u mio amicu Pastacciu per stu cumplimentu. Effetivamente seraghju un bonu capitanu. Ringraziu ancu à a piazzetta chì un m'ha micca messu in sta pechju squadra di u Sporting. ( Aghju fattu u mundiale 2006 )

9.mandatu da capone u 11/02/2009 09:19
è sta closcia di JESTROVIC ????


10.mandatu da casinchese u 11/02/2009 18:15
Induve sò passate 'sse capre di Dobrijevic, di Cesto, d'Alnoudji, Di Delaye, Ogbeche, Saveljic, Maraval, Krupnikovic, Andres Grande, Garrido, Kozniku, Bruno Alicarte ? Ind'e peghji, sò i meglii...

11.mandatu da alain deloin u 11/02/2009 18:21
MARAVAL !!! o puttana ! mi n'era scurdatu !!!! un veru catinu quessu

micca d'accordu per Kozniku, u tippu n'hà piantatu qualchi unu, era micca male

o sinnò OK per Saveljic, ma risicate di pigliavvi un cazzottu

12.mandatu da Calimerò u 13/02/2009 23:44
è Félix Burdino, è Oliveira jenisson? ùn sò s'elli eranu narpie o zapponi ma ... In fatti, si poniu fà omancu duie squatre. Cù tutti sti disgraziati sò capaci di fà zeru à zeru ...

13.mandatu da zampaglinu u 16/02/2009 07:59
E quiddu Debu, induva u lasceti? Soca vi ni seti scurdati di ssa mansetta ghjunta à tempu à Darras é Leonce Lasagne!

14.mandatu da Fifou u 24/02/2009 16:12
un vi scurdade micca di Dolci

15.mandatu da u zappochju u 04/03/2009 13:34
Ci vole a mette ¨Paulo Alvès,

16.mandatu da PICCHJACCANTU u 29/03/2009 23:44
o' ghjente! vi arricurdate di a prima partita di Paulo Alves in Furiani??
Ci avia messu un "but" incredibule, é tuttu mondu si dicia chi u teniamu quellu grande ghjucatore di ballò....
A seguita di a storia ci face sempre ride d'avà....

17.mandatu da A Volpa u 14/04/2009 18:53
e quelli negri Africanu chi jugava cun i "basquets" mi naricordu micca di u nome, cusinu cun ghjucatori di u sporting "M' "??? quercosa mi pare, qué torna quella Zappà

18.mandatu da A Volpa u 14/04/2009 19:37
Pensu chi si sciamu M'BIDA

19.mandatu da Ghjuvanfrancescu u 09/06/2009 21:07
O ghjenti, vi seti scurdati di Philippe Lalanne quellu chi avia missu un "but" contra u FC Nantes(ci era Makelele, Karembeu, Pedros...) in coppa di liga in 1995. Questu ghjucatori hè per mè a piu bella zappa di u SCB. Pudetti fighjà u but nant'à dailymotion: http://www.dailymotion.com/relevance/search/lalanne/video/x53ozv_nantes-bastia-18-cdl-9495_sport

20.mandatu da Bastiacci u 19/09/2010 22:41
E Karembeu dinno !!

21.mandatu da U Panaghju u 25/11/2010 16:01
Ci n'erani d'altri ch'erani debuli.

C'era patrick moreau, josé clayton, damian manso (chi ghjucava in menu di 15 in vescuvatu), daye prince (le jongleur de bamako), christian quarante deux (ans)...
Eccu a lista di sti pedi torti che mi ramentu.
FOOORRRRRRRZZZZZZZZZZAAAAAA BACHTIA PA SEMPRI!!!

22.mandatu da U Panaghju u 25/11/2010 16:04
aghju sminticatu u terzu cucinu di maorlaye soumah: ousmane soumah chi faccii i pizzi in palneca. AH Hè!!!

23.mandatu da Sborgnak u 04/07/2011 18:40
E E.Siljak induve u mettite?

24.mandatu da Lisandru Mattei u 14/09/2011 13:28
U 11 titulare:

Piveteau - Darras, Andrade Williams, Burnier, Leclair - Mazzoncini, Dewilder, Lalanne, Piekarski - Paulo Alves, Flavio Camargo

Sustituti: Weber, Van De Casteele, Pedros, Chimbonda, Alicarte

Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta