Accueil
Envoyer à un ami
Version imprimable
Partager

A pippulisazione di i zitelli

In fatti d'onomastica, parlemu sempre di tupunima. Hè l'antrupunima chì ci interessa oghje. In l'anni settanta, a si pruvavanu unepochi di cursizà u so nome. Jacques si facia chjamà Ghjacumu è René, si vulia chjamà Rinatu... Oghje, i zitelli ùn portanu più u nome di i babboni ma di i pippoli...



A pippulisazione di i zitelli
Hè vera chì serà passata di moda di chjamà si Teramu, Orsu Santu o Orsu Ghjacumu. U nome hè u testimoniu d'un epica. In La vita è bella di Roberto Begnini, i dui zitelli ùn si chjamanu unu Adolf è quill'altru Benito?

Oghje, saranu pochi i paulisti à chjamà u so figliolu Pasquale! Ancu più pochi i naziunalisti à chjamà lu Edmondu !

I nomi à a moda ùn sò più quelli di i pulitichi ma di i pippoli. Cusì, i cursachjoli si chjamanu Lorie Baldassari, Jessica Grisoni, Jason Rocchi, Kimberley Pasquali, Jakes Palmieri, Britney Susini o Brandon Albertini...

Ma peghju, vi vidite voi, in u 2030 incù un Alison Zuccarelli à a meria di Bastia? Steeve de Rocca Serra à a presidenza di l'Assemblea? Johnny Simeoni difende à Bill Colonna ? Brenda Talamoni, capilista di i duri? Shirley Renucci, meressa d'Aiacciu, Mylène Giacobbi, presidente di u dipartimentu è Marwin Pesce purtà sempre più alta a voce di a Corsica, incù Megane Bernardini, l'arcifigliulina di Ghjuliu?

Al di là di u ridiculu di certi nomi, hè a psiculugia di sti giovani chì pare addebbulita. Cusì dice u Duttore Andrew Mac: "Quandu a star vene passata di moda, u zitellu risente un sintimu di murtifilia. Di e volte, quandu si passa bè, finisce in schisufrenia. Altrimente, a morte mediatica di u pippolu annunzia a morte fisica di u zitellu via u so succidiu."

Allora, per piacè, ùn chjamate micca i vostri figlioli Sgaiuffu, Strega, Mazzone, Katsuni o Sbanditu, chì dopu, saranu capaci à finisce male...

u 17 di Ghjenaghju 2009
Oussama Nervatu



1.mandatu da in cauda venenum u 17/01/2009 10:56
BELLISSIMU ST'ARTICULU MA CI HE ANCU U CUNTRARIU CI SO I ZITELLI OGHJE CHI SI CHJAMANU GHJUVAN DUMENICU-ANTO FRANCESCU- CARLU MARIA- CH'UN CAPISCENU UNA SOLA PARULLA CORSA E QUANDE TU LI PARLI TI RISPONDENU QUESQU'IL DIT LUI MA CHI MONDU QUANTUNQUE UN CI SI CAPISCE PIU NUNDA

2.mandatu da Urelianu u 17/01/2009 11:30 (da un teleffuninu)
Ghje vera chi chjama si brandon he appena vergugnosu lol!! Ma un so micca d'accordu per tuttu, eiu aghju 17 anni e mi chjamu Urelianu, eccu un nome nustrale!

3.mandatu da Oussama Nervatu u 17/01/2009 11:30
Hè vera dinù...

4.mandatu da estrimei u 17/01/2009 12:03
eccuci un discorsu assai ghjuvevulle !
so d'accunsentu 'ncu in cauda venenum, dà un nome corsu a un zitellu , e strupiallu a ogni volta ch'omu u chjama un ha sensu , he di sicuru megliu di chjamalu Pincu e parlalli in corsu;
u mio parè he, u penserete a l'anticogna, chi si deve dà a i zitelli i nomi di i babboni e di e mammone-e s 'elli un so corsi un vole di - o di qualchissia di a famiglia.
se vo chjamate un zitellu chi maneghja a so lingua , ghjuvan' Orsu , per contu meu he una maraviglia

5.mandatu da machja u 17/01/2009 14:19
Ghje quessa a culunisazione, sin'a oghje, i corsi eranu fieri di purta un nome di u babbone o di a mamona, ma dipoi deci o quindic'anni, si vergognanu ancu d'esse corsu, a culunisazione a tocc' ancu u piu prufondu di l'anima di u nostru populu.
Eiu vecu , quandu certe volte vogu a circa a me figliulina a a scola, e ch'ella mi chjama "babbo", l'altri zitelli si ne ridanu, e li dumandanu perchè ella mi chjama "pas beau", e tandu a zitella si sente vergugnosa, e sfarenta di l'altri.
Oghje u pare hè piu impurtante chè l'esse, e i nomi so dinvintati cume i vistiti o i scarpi, ci si vole a purta u nome di un pipulacciu, o di un canterinu chi passa a a televisio.
I culpevule so i parenti chi volenu che i so zitelli sianu cume l'altri, e cusi pianu pianu tombanu a nostra cultura e u ricordu di l'anziani.

6.mandatu da Piratella u 17/01/2009 21:16

U ridiculu ùn tomba, ma ci hè dunque più grave : ùn l'averebbe mancu pensata chì pudia esse periculosa pè a mente d'un zitellu d'avè u nome di una star ... .

Per sfurtuna, ùn si pò fà nunda contru à a cunneria. U nome ch'elli danu à i so figlioli hè u primu indiziu di u ghjudiziu di i genitori ; dendu sti nomi si piglianu per qualchissia, povar'à elli...Ci pensanu da veru à i so figlioli? nò...a si ghjocanu cum'elli ponu è ponu pocu.

7.mandatu da Ghjuvan' Filici u 17/01/2009 23:33
Iè, ma a cunnaria hè vechja com'è u mondu. I nosci vechji ùn si chjamaiani micca tutti com'è i missiavi o i minnanni.

Ci sò stati ancu i Joffre è i Pétain, in i tempi. Ùn era mancu mali à purtà "Ziu Pétain"...

8.mandatu da Cumpalliols u 18/01/2009 11:17
A nostra lotta deve fàssi à ogni livelli, per pudè cuntinuà à campà è fà campà l'Anima Corsa.


Dinù per sceglie nomi corsi per chjamà i zitelli

9.mandatu da Francesca u 18/01/2009 14:47

è da quì à pocu, ancu più forte : nomi giappunesi di Manga

in a rubrica in rosiu è turchinu di Corciu matina :

Zuki , Okonu, Kisega, Oshimo, Kukunè, Kiorazo, Akinè, Mikadu...


10.mandatu da Muammar u 18/01/2009 18:40
"Kisega" (cf. postu Francesca), mi pare quantunque esse un nome chi valeria d'esse datu piu spessu...

11.mandatu da un naziunale u 18/01/2009 22:42
Chi costa di chjama un zitellu in lingua corsa ma dinnu un impresa o un carrughju o un stadiu o un cullegiu allora cari amichi di a piazzetta un simu pronti di vede sparisce jennifer jonathan tony chez james supermarché plomberie boucherie coiffeur boulevard paoli quai des martyrs college de biguglia college de Lucciana college de Luri stade d'erbajolo stade du fango o povera a noi....

12.mandatu da Piratella u 18/01/2009 23:44

è divertiscesi à Olmeta Beach, Playa Baya, Tahiti, ...

Out of Corsica , o Corsica Out...

13.mandatu da ghjoraz u 19/01/2009 12:29
Pà cumplità u cumintariu di Francescu: si poni stà a senta i canzoni di "Ai OTSUKA", fighjulà i filmi di" Shinya TSUKAMOTO" , andà in vacanzi ind'à prifittura di KAGAWÀ ò ind'a pruvinzia di MIKAWÀ.

14.mandatu da aghjagraccà u 06/02/2009 19:25
MADASUCHJA ??

15.mandatu da piratella u 19/02/2009 20:21
un si duveria micca lascià i genitori arruià a vita di i so figlioli cù tanti nomi ridiculi : averiamu da sceglie u nostru nomu "definitivu" à 18 anni! Sin'à tandu...seria pruvisoriu!


16.mandatu da chjucchetta u 26/02/2009 20:04
Ci hè da ride, ma s'ella face ride hè digià un bel'affare

17.mandatu da Culomba1 u 15/03/2009 23:32
eppo pè i nomi corsi, ci hè a peura ch'elli sianu prununciati male, allora certi genitori anu trovu a suluzione :

eccuti :

Louna, Tiara, (veri ...!!)

à quandu Santou, Làoura, Frantchescou, Doumè, Paoulou...? ?

Evviva a couloutoura corsa!!

18.mandatu da kevinacciu u 11/04/2009 11:32
è perchè, truvate chì chjamassi "obé" et e zitelle chì si chjamanu "ofradé", hè megliu ???

19.mandatu da Ghjuvan-Donovan u 16/04/2009 00:32
à quandu e feste patrunale di Santu Brandon, San Steven è Santa Shirley in i nostri paesi ?

Novu cumentu :