Accueil
Envoyer à un ami
Version imprimable
Partager

À quandu una squadra naziunale corsa ?

Si sò ghjucate e partite amichèvule Catalogna - Argentina è Brittagna - Congo.
Innù i 208 paesi ricunnisciuti da a Fifa (più ch'è l'ONU...) truvemu Malta, Andorra, San Marino, l'isule di Guam, Vanuatu o e Bermude.
Allora perchè micca una selezzione corsa di ballò ?



À quandu una squadra naziunale corsa ?
Sunniemu appena. Qualificazione di a Cuppa di u Mondu di ballò 2014 à u Brasile. À u Stade de France di Saint-Denis, u Diu Vi Salvi Regina hè statu fischjatu da i spettatori cum'è prevista. Ci vole à dì chì a pressione hè tremenda : si ghjoca trà a Francia è a Corsica una piazza di qualificazione à u mundial. U selezziunadore naziunale Freddy Antonetti, cugnumatu "u magu di a Casinca" ùn hà micca salutatu à Raymond Domenech chì l'hà trattatu di "Guy Roux raté avec l'accent corse". U casinchese hà vulsutu ancu minà un giurnalistu di "L'Equipe" nanzu à a partita. I Bleus sò di siguru favuriti ma i picculi Corsi si sbroglianu bè. Semu sempre à zeru à zeru à 10 minuti da a fine, quandu nant'à un attaccu à a limita di u forighjocu i bianchi è neri schjoccanu un but d'antulugia. L'ottantamila spettatori di u SdF stanu zitti è muti : a Corsica hà da ghjucà a prima Cuppa di u Mondu di a so vita...

Bon, ùn ci simu ancu, ma quand'ellu si vede chì s'hè ghjucatu in Barcellona u scontru Catalogna - Argentina è chì i Brittoni anu riesciutu à mette in piazza una selezzione chì hà vintu contr'à u Congo, ci pudemu dì : è perchè micca noi ?

Corsica 2, Francia 0.
Hè peccatu, chì a selezzione corsa hà esistitu è ch'ella avia cumminciatu bè : una vittoria 2 à 0 in Marseglia contr'à a Francia in u 1967.

Dapoi, qualchì partita hè stata organizata in l'anni 90 da u giurnale naziunalistu Paese. Hè venuta per esempiu a Juventus à ghjucà in Mezavia in u 1992 (risultatu finale 0 à 0).

Allora imaginate una squadra cumposta da Ludovic Giuly, François Modesto, Pascal Berenguer, Mathieu Flamini, Nicolas Penneteau, Sébastien Squillacci, Yannick Cahuzac, Grégory Lorenzi, Chaouky Ben Saada...

Pensate veramente ch'ella saria più ridicula ch'è San Marino, Andorra, l'Isule Feroe, Malta o Hong Kong ? Andate à vede a lista di i 208 paesi affiliati à a FIFA. E federazione e più debbule sò quelle di u Nepale è di l'isula di Guam. Aiò, à quessi li mettimu a concia nò ?

Di siguru e difficultà di custituzione d'una squadra naziunale ricunnisciuta da a FIFA sò tremende, cum'ellu a spiega Didier Rey à u giurnale Cuscenza. Siccome a Francia hà da lascià passà què...

Nant'à u net a mubbilizazione s'organizeghja : sò circa 200 à essesi scritti à u gruppu "Pour une sélection corse de football" nant'à Facebook.

Ma senza aspettà una ricunniscenza officiale di a FIFA, nunda impedisce l'organizazione di scontri amichèvuli, cum'è quellu di a Brittagnia. Basta a vuluntà.

Allora ?


Da leghje : Corse : les limites du football identitaire, di Didier Rey.


À quandu una squadra naziunale corsa ?

À quandu una squadra naziunale corsa ?
A selezzione chì hà ghjucatu contr'à a Juventus in Mezavia in u 1992, dop'à a strage di u 5 di maghju in Furiani.

Fottò pigliata nant'à Retrofoot.

u 30 di Maghju 2008
u webmaestru



1.mandatu da Stavroguine u 30/05/2008 11:15
Piaciaria à monda aienti ind'è no una selezzioni corsa. Ma à l'ora attuali hè simpliciamenti impussibuli. I statuti di l'UEFA si sò chjusi à 'ssu gennaru di nuvità dipoi chì 'ssu minchjicunneddu di Platini hè statu elettu à a so prisidenza (prumetti i soldi à clubs di i picculi paesi ma hè oppostu in tuttu à a nascita di selezzioni novi, è in più i Corsi ùn li pò veda...).

In Corsica stessa ùn ci voli mancu à sminticà u currenti francufilu chì esisti (eletti in primu locu, è capimachja di a Liga corsa di ballò...). Oghji, ancu puri cù un' avanzata istituziunali ch'ùn hè micca d'attualità (autonumia), un prughjettu seriu di selezzioni corsa vidaria l'opposizioni di l'UEFA, di a Federazioni francesa, di a Liga corsa è di i Corsi assititi di naziunalismu francesu. Hè un pocu troppu pà renda u prughjettu rialistu à l'ora attuali.

È laca pinsà dinò chì a nascita d'una selezzioni simuli hè bè un' affari puliticu, parchì un risultatu evidenti d'un prucessu puliticu straurdinariu.

Dopu, hè vera chì ci poni essa i partiti amichevuli, ma in u cuntestu di u ballò prufiziunali d'oghji, è di a so mediatizazioni, mi dumandu chì intaressu t'avariani.

2.mandatu da GWM u 30/05/2008 11:56
peccatu...u ghjornu ch'e n'avemu a nostra squatra naziunale, pruvate di figuràvvi e facce di a ghjente quandu feremu u nostru primu spiazzamentu uffiziale...chi tanti Attila o Temudjin !

3.mandatu da u 30/05/2008 12:08
da rimarcà dinù chì a Scozia, l'Irlanda di u Nordu è u Pays de Galles anu a so squadra naziunale allora ch'elli ùn so micca paesi indipendenti

ma cume detta qui sopra, cù sta closcia di Platini ùn ci vole à sperà nunda

maladetti francesi....

4.mandatu da orsufrancè u 30/05/2008 15:15
un simu micca pronti a vede una scontra di scuadra di Corsica è di l'Equipe de France, pè a raggio simplicce chi i francesi annu peura di fassi incciacca cumme in l'annu 1967.

5.mandatu da Quill'altru u 30/05/2008 16:22
Eccu un'articulu publicatu nantu à u ghjurnale Cuscenza chì spieca l'imbrogliu ghjuridicu chì c'impedisce d'avè una selezzione uffiziale ricunnisciuta da a FIFA o da l'UEFA. Ciò ch'ùn impedisce per avale di sviluppà scontri e cumpetizione paralleli.



A Naziunale à caternu ?

Un’arnese di cuezione suciale è d’innalzera di u sintimu naziunale, un’elemente di u campà inseme per via di a cumpetizione spurtiva in generale, è d’una silezzione ufficiale di ballò in particulare, chì scumbatteria cù e più grande Nazione : eccu ciò ch’ella saria a nostra « Naziunale ».
L’argumenti di u prufissore Didier Rey, maestru di cunfarenze à l’Università di Corsica è spicialistu di u sportu in Corsica, ùn mancanu, ch’ella sia à u livellu sucietale o puru spurtivu (vede Cuscenza nu 1) ; eppuru stu prughjettu s’hè vistu cuntrariatu sti pochi mesi.
Un vultà di ghjurisprudenza hà difatti fattu passà u drittu da u latu nostru à quellu di i stati nazioni preputenti.
Hè per raghjone tecnica chì u raprisintentu di u cumitatu esecutivu Giangiorgio Spiess, incuragia l’UEFA à ricusà a dumanda d’adezione di Gibraltar à sta stituzione aurupea :
« Se n’avemu da adimette ogni rughjone d’Auropa, tuccaremu i 60 è sarà impussibule di guvernà l’UEFA ».
L’Assemblea di l’UEFA ti ricusarà l’affiliazione di Gibraltar à una maiurità impurtante.

Sta decizione pudaria parè di poca primura s’ella ùn avia una raghjone puru pulitica…
Ghjè difatti sottu à a pressione di a Spagna chì rivindicheghja sempre u locu, chì stu scogliu di 30.000 abitanti, memberu pruvisoriu di l’UEFA dipoi u 97 ùn hà vista a so federazione ricunnisciuta da l’istanza internaziunale.
Tandu chì a fine era u sviluppu di u ballò in stu picculu tarritoriu sottu duminiu brittanicu, i dirigenti iberichi c’anu visti una sfida pulitica. Sò stati ben’intesi sustinuti da e gran’putenze aurupee, frà e quale, è à u primu pianu, a Republica francese.
L’effetti sò guasgi subitanii per u prughjettu corsu in cor’di nascita : a FIFA (Federazione Internaziunale di Football-Association) seguita a via pigliata da l’UEFA è mudificheghja i statuti…

U prufissore Rey ci facia rimarcà qualchì mesi fà, chì a strada era aperta per un’adezione di a Corsica, per via d’un articulu di u regulamentu internu di a FIFA chì auturizava una Nazione ch’ùn era « ancu indipendente » à esse accittata in u so senu dopu à l’accunsentu di a federazione « naziunale », in u casu nostru, quella francese. St’articulu avarà parmessu à a Pulinesia è a Chanacchia d’esse pruvisti di silezzione ufficiale.
Ancu s’ellu hè debbule puliticamente, u statutu di Cullitività Tarrituriale à cumpitenze spiciale aghjustatu à una vera vulintà pupulare sustinuta da u mondu puliticu, ci parmittia di sperane à a stessa sorte.
Per disgrazia, i novi statuti mintuveghjanu chì i soli Stati indipendenti ponu pratende ad esse memberi di a FIFA o puru di l’UEFA, fora di quelli dighjà affiliati.
U Montenegru s’hè cusì vistu accittatu, tandu chì Gibraltar o Corsica pudaranu aspittà…

Ma a spera di Didier Rey ùn hè per spenghjesi.
L’accunsentu di principiu datu da u Prisindente di a Lica Corsica di Ballò in un’intervista data à a rivista Corse Foot di u mese di …, ùn hè per chjode ogni porta.
L’urganizazione di scontri è cumpetizione amichevule parmittaria à i ghjucatori corsi di cunfruntassi à e più grande squadre naziunale d’Auropa è d’altrò. Un primu passu è soca una manera d’abbituà a ghjente ad esse in daretu à a so Naziunale è di rinfurzà una vulintà pupulare…
À contru nostru è di pettu à sta situazione, invitemu tutti i Corsi à prò di sta silezzione ufficiale è quelli impignati ind’è stu prughjettu ad intiressassi à cumpetizione parallele chì adduniscenu squadre non ufficiale frà e quale quelle di Nazione senza Statu di u mondu sanu cum’è a Cuppa di u Mondu di a FIFI, è/o à raghjunghje a mossa indipendentista…

Petru Antone Tomasi
Cuscenza nu6

6.mandatu da u 30/05/2008 16:37
pensu dinù ch'ellu ùn ci hè bisognu di pulitizà a questione di a squadra naziunale.

u ballò, cum'è a lingua, ùn devenu micca appartene à i soli naziunalisti, ch'o sinnò hè persu.

ghjera u MPA ch'avia organizatu i scontri cont'à a Juventus è u turneu contr'à Montpellier è una squatra iugoslava.

ci vuleria ch'ellu ci sia una vuluntà pupulare, al dilà di i naziunalisti... ma hè u casu ? un pensu micca.

ma quale hè chi sà ? cun Didier Rey, qualchissia di neutru è d'universitariu, avà u gruppu nant'à facebook l'idea face u so caminu.... pian pianinu

7.mandatu da circinelludiguagnènativupèliguagnesusosanguaversatu u 30/05/2008 18:38
ùn semi noi à pulitizà a quistioni... ma hè vera, è ancu nurmali, chi ci voli un'unanimità quì, in Corsica, nanzu di pudè pona una dumanda...

8.mandatu da Costa Pèire u 02/07/2008 15:27
Bonjorn atotes,

me dison Pèire Costa. Soi lo President de l'Associacion Occitana de Fotbòl (www.a-o-f.org) , creada en 2003 amb l'objectiu de federar las iniciativas per l'occitan e Occitània a travèrs la practica del fotbòl. En 2005, l'A.O.F creèt la primièra Seleccion Nacionala Occitana de Fotbòl e joguèt a Besièrs contre Moneque (Monaco). Dempuèi la Seleccion a pas arrestat de jogar de rescontres internacionals notadament contre Chipre de Nòrd, Laponia, Sud Tiròl, Sorabas de Luzaça, etc.

La Seleccion se compausa de jogaires amators mas de nivèl pro naut (CFA, DH, DHR).

A la debuta del mes de junha la Seleccion participèt al Campionat d'Euròpa de las minoritats. Acabèt en quart de finala contre lo Sud Tiròl que ganhèt puèi la Competicion.

En Agost, serai a l'Universitat d'estiu de Region e Pòbles Solidaris a Corti. Participarai a una taula redonda sul tèma espòrt e nacionalisme. Se ne volètz saupre, sètz los benvenguts!

9.mandatu da drobnjacku u 03/07/2008 10:59
bonghjornu Pèire,

l'Associacion Occitana de Fotbòl saria un mudellu per noi, si a Corsica pudia dinù avè u so associu naziunale di futbol saria magnificu, ne semu disgraziatamente assai luntani oghje...

à ringraziatti per l'invitazione d'agostu. eiu so possu, aghju dà circà di vene. in tutti i casi saria bè di sapè cio ch'ellu s'hè dettu à st'università d'estate...

à prestu è amicizia

10.mandatu da ribella u 24/08/2008 15:27
A ringrazia l'Occitanii, ma pè crea l'Associu Naziunale di pallo un ci vulera tanti affari: Ci volenu i ghjucadori amatori di tutte e squadre di Corsica !
Chì piace di vede ghjucà i nostri giovani cù u stintu nostru !
Un ci sbagliemu sopratuttu d'entre in u prufessionalisimu!!!!!!!!!!!!!!!!!!!!!!!!!!!!!!!!!!!!!!!!!!!!!!
Cuminciemu ò zite, per istrada s'acconcianu e somme !

11.mandatu da ribella u 24/08/2008 15:29
Mi sò scurdata :

E VIVA I NAZIUNALI !

12.mandatu da SPINGHJERA u 19/09/2008 19:00
BELLA SICURU,UNA SQUADRA CORSA SERIA PER NOI TUTTI U ONORE,CI RENDERIA VERAMENTE FELICE E FIERI,MA A L'INIZIU PER FA UNA SQUADRA CORSA CI VOLENU GHJUCADORI CORSI ,A ME MI PARE PIU CHE LOGICA MA QUANDU LEGHJU U CAPU ARTICULU,UN GHJE MICCA U PARE DI TUTTI,CARI AMICHI SAPIATTE CHI U SANGUE U N'HE ACQUA , E CHI A CAPRA CHI NASCE IN PULLINAGHJU U N'HE MICCA UNA GHJALLINA GHJE UNA CAPRA. A CORSICA A I CORSI,ALTRIMENTE PUDITE CUNTINUA A SUSTENE A SQUADRA NAZIUNALE FRANCESE CUME A MAIO PARTE DI A GHJENTE CHI CAMPA INDE NOI .

13.mandatu da Carmine Colacino u 30/04/2009 13:04
Salve,

si è da poco costituita la nazionale delle Due Sicilie di football (a livello dilettanti, amatoriale), e ci sarebbe interesse ad incontrare una rappresentativa nazionale corsa equivalente.
A tal fine sarebbe possibile pagare la trasferta e l'alloggio ad una squadra che rappresenti la Corsica per un incontro amichevole da effettuare a giugno, luglio o agosto 2009, ad Avellino (80 km da Napoli). L'idea è quello di organizzare in futuro una manifestazione annuale dove siano rappresentate le nazionali dei diversi stati mediterranei ufficialmente riconosciuti e non.
Se c'è interesse, o nel caso possiate comunque indirizzarmi verso una squadra che possa rappresentare uffivialmente la Corsica, la prego di contattarmi via e-mail in modo da prendere gli opportuni contatti.

Carmine Colacino
Vice presidente squadra nazionale delle Due Sicilie


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta