Accueil
Envoyer à un ami
Version imprimable
Partager

A verità si face…

Chì vechja canzona di i Muvrini « A verità si face »… Scusate per sta digressione intruduttiva ma prima, vogliu dì chì i Murini ancu elli sò vechji ! Ùn hè ghjusta di caccià si ne solu incù i Chjamaghjalesorus. Tuttu què per dì chì sti pochi tempi a « verità si face » nant’à u prugramma d’azzione pulitica di u presidente francese. Mentre s’hè rassegnatu à dassi di rimenu per ch’ellu cresca u putere cumpraticciu di i so cumpatriotti, l’hà fatta quantunque à accresce a so misata, ancu puru s’elle parenu biote e stacche di u Statu…



Chì male fonda male accima
Pocu tempu dopu, hà annunziatu Sarkozy, di modu serenu, ch’ellu ùn pudia fà nunda per migliurà a paga di i più disgraziati. Pocu paradossu per quellu chì vulia esse u presidente di u putere cumpraticciu ! Ùn avia fattu ellu di a quistione di e paghe u fundamentu di a so campagna eletturale ? O lu falsò ! Certi analisti avianu dettu tandu chì u sarcusisimu era ancu un materialisimu ma senza altra precisione. Di fatti, secondu i cullaburatori spiciali di « A piazzetta », mandati apposta in i carrughji parigini, si tratterebbe di materialisimu à l’usu Faubourg St Honoré. Ùn hè vera ch’ella hè anticogna di parlà di materialisimu quantitativu è pienghjulone à l’usu Laguiller. Face ride face ! Eppò ci n’hè una techja di a so riturnella ! Tenite, mi vene un esempiu di materialisimu qualitativu, di più oghjincu, chjamatu dinù Place Vendôme. Secondu à Yasmina Reza chì l’hà seguitatu durante un annu per scrive u so libru « L’aube, le soir mais voici la nuit », mentre e prime pagine di i giurnali trattavanu di a guerra à u Libanu, stu zitellacciu s’appassiunava per u spampillime d’una Rolex. Quessu sì u fundamentu di pulitica di a civilisazione !
« U contrarilogiu » di « u novu campà »…
Eppò hè ghjunta l’ora di a rumenza incù quella civittola di Carla Bruni. Cum’elle eranu belle ste duie racane ! Basgi, sguardi, spassighjate è ritratti à buzeffu ! « È piglia ti què o Cecì ! Sì partuta ? Bon prò ti fessi ! M’ai vistu in Ghjurdania ? È l’anellu di Carluccia, ùn ti ramenta nunda ? Ah ! Ah ! Piglia ti stu matrimoniu in faccia, goffa chè tù sì ! Même si tu reviens je n’annule rien… " Ma u troppu stroppia… U tempu muca è infracichisce ogni bellezza. A rumenza diventa una rumenzula…
U vita hè fatta à scala : à chì colla à chì fala…
U sgiò Presidente si ritrova cusì intrappulatu. Ellu chì hà vulsutu valutà i so ministri, ellu chì incalcava tantu è più nant’à a perfurmenza è u risultatu piglia a falata ind’è i sundami. « Ciao pantin » dicia quellu ! Oramai, ùn ti si vede più. Cumu serà ? Dopu qualchì mese, a verità si face nant’à u so prugramma è i so fatti. S’è l’amicizia hè tinuta da virtù più chè da viziu, u Presidente, cumpagnu di Lagardère, di Bolloré, di Bouygues è tira avanti è tocca, si stacca pianu pianu da u populu ancu puru s’ellu pare tene tutti i so vezzi. Ùn s’hè mustratu à Eurodisney davanti à tante americanate incù l’anziana moglia di u mezu mondu di u sciobisu ? Chì tanti Louvres, Beaubourg, Versailles, Orsay, è Branly, ci n’impippemu postu chì t’avemu à Space Mountain è Rock’n Roll Circus !
Un annu da patrone = 514 anni per l’operaiu… S’o capiscu bè, sò l’operai chì campanu di più ?
Eppò à mezu à u freddu inguernarecciu, sbattuleghja un antra nutizia di quelle. Innò, ùn parleraghju di quella d’Alizée è di u ballò ! Ùn hè quessa a nutizia di u mese ! Hè cresciuta a paga di i patroni francesi in u 2007. Di fatti, hè u rivenutu di 77% di i PDG d’imprese di u CAC 40 chì sarebbe cullatu di 40%... A media di a so pagarella si situeghja in giru à 6 175 000 €. Per falla à l’accorta, u patrone vince in un annata sola ciò chì un tippu à u SMIG tuccherebbe in 514 anni… Ùn vi pare nunda ? Hè cum’è s’è Leunardu da Vinci avia travagliatu finamentu à avà dapoi u 1494 da operaiu… Altrimente, principiate à travaglià subitu subitu, finu à u 2522, per gode di a paga d’un patrone di u CAC 40… O li sciali ! U peghju, hè chì spessu, un patrone stà patrone parechji anni… Tandu, ùn hè mancu a so paga à l’annu chì vene interessante. Sarebbe megliu di sapè quantu pò vince in a so carriera in pettu à a misera ch’ellu s’hà da buscà l’operaiu...
U techju ùn crede à u famitu
Infine ci hè da dumandà si… Ma chì n’anu da fà quessi di tanti soldi ? Induve l’anu da mette ste pezzette ? È i so biglietti, saranu tutti tutti ignifucati ? O li penseri ! Pensate appena s’ellu piccia u focu custì… Trà l’angoscia di u techju è u corpu à viulinu di u famitu, ùn vene cusì faciule a scelta. Certi sprupositi ! Di tutte e manere, scelte cum’è quesse, à noi altri picculi mizani, ùn ci ponu dà u schifu…


L'articulu di u mondu nant'à i patroni francesi

u 14 di Farraghju 2008
Sbanditu



1.mandatu da GWH u 14/02/2008 10:55
ahè...Chi fà ?

2.mandatu da Petru-Anghjulu u 14/02/2008 20:12
Vuta Naziunalistu e solu Naziunalistu...
Cume scrivi... troppu stropia di Sarkosy tumba u Sarkosy
Che imbutu !

3.mandatu da gambas u 14/02/2008 20:58
u peghju hè pè i conni chi l'anu vutatu.

L'AVETE VULSUTU ? U VI TENITE MANSA DI CATINI !

Novu cumentu :