Accueil
Envoyer à un ami
Version imprimable
Partager

Affacca Cuba : appruntate bandere è striscioni !

I media nustrali c’anu amparatu chì l’imbasciadore cubbanu Rogelio Sanchez saria in Corsica sti pochi ghjorni, ricivutu frà altru da u prisidente di u Cunsigliu Generale di Corsica Suprana è da u merre di Bastia.
Dopu à u rimusciu ingiru à a sorte fatta à u populu tibbettanu da u guvernu chinese, avariamu pussutu pinsà chì l’uccazione saria propiu bona per i difensori di i diritti di l’omi di fassi sente torna una volta.
Eppuru nunda…



Difensori di i diritti di qualchì omu

À dilla franca, à mè Cuba ùn mi disturba cusì tantu. Micca per simpatia versu i fratelli Ernesto è Fidel, ma piuttostu perchè ch’ùn pratende amparalli « in casa soia à stà più bè ».
Ùn hè perquessa ch’ùn si pò avè qualchì parè nantu à a situazione di stu populu di e Caraìbbe.
Hè cusì chì à l’ora di a so ritirata, si pò principià à fà u bilanciu di a rivuluzione castrista, chì si perseguisce per via di u fratellu Raul…

In fatti di salute è d’insignamentu u paese si porta propiu bè ciò chì conta in u calculu di u so indice di sviluppu. Ma ùn hè quantunque dimucraticu è rispittosu di e libertà stu rigime.
Di e volte e facende pudarianu fà pinsà à a China, cù un stile suddamericanu più simpaticu.
Tandu, i difensori di l’Umanu è di e Libertà duvarianu movesi, fassi sente, ch’elli sianu militenti cunvinti o bobbò di circustanza. Eppuru nunda…

Perchè chì quelli chì quallà bramanu un cambiamentu di sistema pulitica duvaranu aspittà chì a so causa divintessi à a moda ! È sti pochi anni disgraziamente per elli eranu più prizzate l’intervenzione di Fidel, i so discorsi à ùn finisce più, e so strombacate o ancu e so « prove di vita » chì l’offese à e libertà.

Fidel è a Corsica !

Postu ch’ùn c’hè nunda à fà per sti tinti cubbani chì cherenu di più dimucrazia, vultemu à un’antru populu, nigati anc’ellu di modu diffarente.
Postu ch’ùn avarà pussutu fà u benistà di u so populu stessu, soca chì u Lider Maximo, st’eroe di a Rivuluzione, cù un « R » tamantu u mondu, si sarà impignatu per d’altre cause, è perchè micca per quella di u populu corsu ?

Figuratevi chì parechji anni fà, Marie-Jean Vinciguerra, scrivanu è omu puliticu corsu, u s’era scontru in Pariggi in cumpagnia d’altre parsunalità frà e quale l’attuale ministra di l’internu Michèle Alliot-Marie detta « MAM ».
Li avia ancu postu una quistione nantu à a Corsica per avè u so parè nantu à a mossa « autunumista » di l’epica. A so risposta ùn vale duie baiocche : « ùn sò tant’affare nantu à a vostra situazione, ma pensu ch’ùn vi duvite scurdà di ciò chì v’anu portu e culture taliane è francese ».
Pocu rivuluziunariu quessu !

Stu girettu per Cuba in fin’di contu per dì chì mutivazione per sustene u Tibbettu contru à a China ci n’hè una solu da u latu francese : ghjè chì i pinzuti biscanu d’esseci fattu sciacculà i ghjochi olimpichi da i Chinesi !
Allora invece d’ingunfiacci cù i Tibbettani ditela franca !

u 6 di Ghjugnu 2008
Mazzone



1.mandatu da Quill'altru u 06/06/2008 15:31
Ma chì rigalu ci sarà ind'è sta scatula ? Un'annellu ?
Ah ! Bon ! Ghjè una pubba (cum'elli diciarianu i Storti) per u PACS ! Capita !
Curaghju o Baul !

2.mandatu da GWM u 07/06/2008 15:39
Eccu un articulu dà leghje è fà leghje; ùn ci hé bisognu di cullà sin'à Parigi pè truvà i "dirittidilomisti" chi ùn sanu mancu ch'ella esiste a Corsica...

Novu cumentu :