Accueil
Envoyer à un ami
Version imprimable
Partager

Andendu à u Resto U…

Ah, l’Università di Corsica ! U locu di a scenza, di u sapè, di a ghjuventù, di l’avvene ! Chì diccia ch’elli anu i figlioli di u Riacquistu di gode d’un insignamentu superiore di qualità ind’è elli, senza mancu avè l’obligu di francà u mare per buscà si una licenza o un antru diploma. Biiiiiiiiiiiip ! BASTA ! Iè, iè… Ah, a sapite digià ? Bon, allora, pianteraghju quì a riturnella tradiziunale nant’à l’Università per interessà mi à u CROUS è in particulare à u Resto U…



Crous, corti, RU, resto u, università, université, corse, crous, corte, repas, etudiant,
Crous, corti, RU, resto u, università, université, corse, crous, corte, repas, etudiant,
A simana scorsa, andendu à u RU, cum’elli dicenu i studienti, aghju vistu un affissu di quelli. Micca l’anunziu di a serata karaoke di i studienti di l’IUT à l’Oriente, u terzu campus di l’Università… Ùn era mancu quellu di Dédé Sekli à u Rex, u bar di tutti i metrosessuali azezi è timichi. Ùn era mancu l’affissu per a serata corsa incù « Sciappittana » è « Chjaru cum’è a vodka », u gruppu di a Coupole ! Aiò ! U meiu l’affissu, hè bellu più discretu. Ci era solu scrittu « Le supplément est considéré comme un complément du plateau ».

Di colpu, ùn aghju mancu manghjatu. Stumacatu da l’affissu quant’è da a puzza di a manghjusca, m’aghju dettu : « O coccu, s’è ùn la faci mancu à capì l’affissu di u Resto U, vole dì ch’ùn sì micca fattu per i studii… Sì una zucca ! Stà ti ne puru in casa à guardà à u « Corsica sera » è « Plus belle la vie » ».

Cosa hè stu binzu ? L’avete vista a faccia di i « suppléments » di u Resto U ? Ci vole à esse scemu, famitu o chinese per piglià ne unu ! Eppò, « supplément », « complément » ùn sarà pò listessu affare ?

Da ficcanasu, aghju vulsutu fà un inchiesta. Aghju dumandatu à unepochi d’impiegati di u RU, à qualchì studiente è à i capizzoni di l’Università ciò ch’ellu vulia dì st’affissu. Aghju fattu u giru di i tavulini… O li musi ! Chì tanti discorsi ! Ne vulete unumatupee : « Umbeeeh », « Ubba », « Aiò », « Saetta », « Accidenti », « Cristu »… Hè vera chì manghjavanu tutti… S’è aviate vistu a so bocca piena. Iscia ! « What else » m’hà cacciatu unu ! Aiò, mancu un infrasata ! Mancu unu chì m’hà sciaccatu una cacciata nustrale à l’usu : « Viaghja o buffalò chì si di nò, ti smontu tuttu ! » Mancu una ghjastema ! Nunda nunda ! Ah, si perde a nostra lingua, incù u garbu corsu…

Certi musi s’assumigliavanu à quellu di i studienti dopu intesu l’ultimu stalvatoghju torbitu di Coppò. Certi s’appinzavanu u nasu cum’è i studienti davanti à l’ultima dissertazione data da u prufessore Bellacoscia : « A piazza è a simbolica di u mustacciu di u scrittore in l’elaburazione di a literatura corsa da Santu Casanova à Ghjacumu Fusina. »

Soca, tù, fidu è astutu lettore di A Piazzetta, sarai capace à disciuplicà a dialettica di u « cumplementu » è di u « soprapiù » senza mancu matriculà ti u cerbellu, quant’è t’aghju casticatu à tè per leghje st’articulacciu !
@ prestu !

l'11 d'Aprile 2008
Sbanditu



1.mandatu da estrimei u 11/04/2008 16:44
a l'università ,tuttu u mondu a sà ci so i cerbelloni ! e di i cerbelloni nascenu l'edeoni!
si quellu chi a fattu st'affissu ,l'avia scrittu in corsu,forse chi seria statu piu capiscitoghju

2.mandatu da Petru-Anghjulu u 11/04/2008 17:29
un capiscu micca tuttu à st'affissu, si u soprapiu he un cumplementu allora che ?

3.mandatu da Paulu u 11/04/2008 21:41
Un sò mancu eiu un cerbellone è ù capiscu nunda di ciò ch'ellu vole di iss'affissu, ma vi dumanderaghju di ùn criticà i Chinesi chì avà sò i nostri alliati è avemu previstu di fanne ghjunghje qualchì battellata per aiutacci à luttà per a Corsica.

4.mandatu da SULAna u 18/07/2008 13:44
chè l`u sia supllement o compllement u si po puru fa culla a ch ellu logu

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta