Accueil
Envoyer à un ami
Version imprimable
Partager

Avà, ci tocca à vutà per u castagnu pianellacciu !

V'anu faticatu l'elezzioni municipali ? Casca bè, avà principia un'altra campagna : quella di l'arburu di l'annu. È ci vole à fà vince u candidatu corsu, un castagnu di U Pianellu. Senza false precure.



Di a campagna di e municipali, si n'hè parlatu abbastanza.

Di l'elezzione di l'arburu di l'annu, si ne parla menu. Hè un cuncorsu (sìmbolicu, l'arburu ùn vince nunda, mancu un viaghju à Disneyland) organizatu da Terre Sauvage è l'ONF.

Senza false precure, si pò dunque vutà è sceglie trà parechji arburi. Ogni regione hà u soiu.

Pè a Corsica u candidatu hè un bellu castagnu  chì hè statu ritenutu. Appena anzianottu (stimatu trà 800 è 1000 anni, quantunque) è chì si trova nant'à a cummuna di U Pianellu.

Di siguru, ci hè u "chauvinisme" (tè, ci vulerà à truvà una traduzzione corsa pè sta parolla) chì vole ch'è no vulemu fà vince u candidatu corsu. Ma micca solu.

Al dilà di quessa, a messa in lume di u nostru vechjone pianellacciu ci pone parechje dumande.

Prima quella di l'avvene di u castagnetu corsu, minacciatu da u cynips è da l'abandonu.

Pone a quistione di u travagliu di a terra, di l'agricultura, abandunata ella dinù. Pone a quistione di e terre agrìcule, minacciate da una frenesia di custruzzione dannifica.

Pone a dumanda di l'economia di a Corsica, oghje pensata in giru à u turìsimu, a stagione, l'immubiliare, è mai in giru à a pruduzzione. In Corsica ùn si pruduce nunda, mancu i pommi di i pommi fritti servuti l'estate à i turisti ùn sò prudutti quì.

Pone a dumanda di a ruralità. In una Corsica diventata citatina, è ancu peghju, periurbana, induve tuttu ognunu vole u so pavillon cù u so modu di campà uniformizatu, chì ne femu di i nostri paesi chì si ne morrenu ?

Pone a dumanda di a leia à a nostra terra, à e nostre radiche, à i nostri antichi chì a ci l'anu lasciata. Chì ne femu ? In chì statu a lasceremu à e generazione à vene ?

Allora iè, ùn hè ch'è un cuncorsu nant'à u net, ùn si vince nunda è forse ùn hè mancu più male cusì.

Ma sì, per una volta, pudiamu mette in lume un'altra Corsica ? Stu paese ch'è no tenimu cusì caru, ma ch'è no pigliemu tantu piacè à distruge ?

Alè, femu vince u nostru amicu pianellacciu. È fate girà sta pagina !

Per vutà, si passa nant'à sta pagina.

u 15 d'Aprile 2014



1.mandatu da petru u 15/04/2014 20:01
Pecatu calvinismu e dighja presu pe "Chauvinisme" !

2.mandatu da Maestru-shinigami u 15/04/2014 20:15 (da un teleffuninu)
U scaviatisimu per chauvinisme

3.mandatu da mary u 16/04/2014 09:01 (da un teleffuninu)
L'arburu ė a vita.

4.mandatu da mary u 16/04/2014 09:01 (da un teleffuninu)
L''arburu ė a vita.

5.mandatu da Calvoise u 16/04/2014 11:43
Calduvinuismu.

6.mandatu da J G u 16/04/2014 16:01
U castagnu pianellacciu a cacciadu e polle , rispettendu e polle si lascia campà u catagnu

Nantu a u diziunariu u muntese esiste a parulla chauvinisme = sciuvinisimu

un viaghju a disney Land un vale una visita in Pianellu

7.mandatu da simu freschi u 16/04/2014 23:50
u chauvinisme hè ancu parentellu cù u campanilisimu ma i Taliani dicenu anch'elli "sciovinista" . A parolla vene da Nicolas Chauvin, suldatu pienu di gioia in l'armate di Napuleone. Ah ecculu torna à questu, ancu à Chauvin hà fattu nasce !

8.mandatu da bastiacciu stortu u 17/04/2014 10:25
Vutèmulu a stu Pianellacciu ... chi se lu pudia parla ...!!

9.mandatu da Pititu u 17/04/2014 11:41
"Chauvisme" hè una parulla e une idea propriu francese chi ghje difficiule dà traduce in lingua corsa....postu che pe i francesi fà a pro di i soii hè un difettu maio invece che pe i corsi hè nurmale.

10.mandatu da Calvoise u 17/04/2014 13:30
Iè, i corsi ùn sò micca sciuvini. I Corsi sò, semplicemente.

11.mandatu da François Le Saux u 17/04/2014 17:01
ahahaha ! funziona bè a publicita nant'a a piazetta : 4281 voti digià!

12.mandatu da Malonesti vinceremu u 17/04/2014 17:21
Si pò vutà (chiude u navigatore), rivutà (richiude u navigatore) è rivutà...

13.mandatu da castagna u 17/04/2014 17:45
vutate e fate girà chi l'arburu di l'Auvergne ci richjappa !

14.mandatu da Carlo Leonardi u 17/04/2014 23:23
"Chauvinisme" potrebbe esse: Sciovinismu (Talianu «Sciovinismo») oppure Naziunalismu Fanaticu.

15.mandatu da bastiacciu stortu u 18/04/2014 01:49
In " Bastiacciu " chauve si dicè -Piladu- dunquè u Piladismu ...!!! Tempi fa c'era be u Gavinismu .... ma cèrtè linguaccè dicenu chi a parrechji l'é passatu....

16.mandatu da Astru u 18/04/2014 15:43
4341 ! GogogogoGo !

17.mandatu da Calvoise u 20/04/2014 00:32
Auvergne 4419 - Corsica 4410 :-((

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta