Bear Grylls hè in Corsica

Ma mì... Qual'hè chì s'affacca quì ? Bear Grylls hè un anzianu militare chì s'hè fattu cunnosce cun l'emissione "Man vs. Wild" (in francese "Seul face à la nature") hè in Corsica. A Piazzetta ne avia parlatu in u 2012.

In u so prugramma ci ampara à sopravvive solu in un ambiu salvaticu. Cumu manghjà un pezzu di carne in Alaska ? Cumu piscà cù un paghju di Meindl ? Cumu truvà di chè beie in pienu disertu ? Cumu fà in casu d'attaccu d'animale salvaticu gattivu è famitu ?

Bear hà sempre una risposta. Bon d'accordu, a so emissione hè appena trafficata. U tippu ùn hè mai cumplettamente solu cum'elli l'anu fatta crede à principiu è ci sò state pulemiche per quessa.

Nant'à a so pagina Facebook u survivalistu u più cunnisciutu di u mondu hà publicatu un filmettu induv'ellu si ricunnosce un pezzu di paisaghju corsu (è dinù una sucetà corsa d'elicotteri) :

A so emissione nova si chjama "Running Wild with Bear Grylls" è anu giratu dunque in Corsica.

Ma allora, perchè ind'è noi ? Chì ci hà preparatu Bear Grylls ?

Cumu sopravvive in Portivechju in piena stagione turistica ?
Cumu manghjà una muvra in Niolu quand'è vo avete assai fame ?
Cumu resiste à un attaccu di camping-car ?
Chì fà quand'omu si ritrova intrappulatu in un apperitivu in un paese di u Taravu ?
Cumu riesce à campà nant'à u GR 20 ?
Cumu campà à a CTC cù un tufone di 100 milioni ?

Risposta da quì à pocu.