Accueil
Envoyer à un ami
Version imprimable
Partager

Bill Gates vs Bilicone



Dopu vistu u film « Demain », u miliardariu mericanu hà decisu d'aduttà i soldi corsi, a muneta cumplementaria (è cummunutaria) creata in Corsica da sustene a Fasgiulon' Valley nustrale.


U fundatore di Microsoft strappa a lingua nustrale ma s'è no l'avemu capitu bè, pagà incù i soldi corsi serà una rivuluzione tamanta.

« U dollar o l'Euro valorizeghjanu i prufitti prestu fatti, a cuncentrazione di a ricchezza è a centralizazione. Tuttu què, hè anticognu, o zitè. » hà dichjaratu Big Bill chì s'appronta digià à spende u so fasciu di biglietti isulani in li cummerci di a piazza.

Chì tippettu stu Billy.

« Aghju decisu d'ùn manghjà più ch'è fasgiuloni è clementine incù appinuccia di panzetta e dumeniche di feste. Ci vole à cuntentàssi di u pocu, à l'usu pasturinu : beie u vinu di u lucale, pusà è appinzàssi un steccu fidighjendu i nuli. »

Chì pueta stu Billy. Generosu. Frugale. Lucale.

« Ùn vulia micca chì a ghjente mi chjamessi Bilicone Gates ah ah... pussede ùn m'interessa mancu più. » hà aghjustatu u miliardariu mustrendu i monti, u mare è u caffè di Saveriu.

A cunversazione hè durata una nuttata sana « cunvivialità, pruduzzione lucale, cuuperazione, spartera di a ricchezza, di u sapè è di i sapè fà… »

U sgiò Gates s'hà lasciatu una miliarda à u contuaru.

Chì sburgnò stu Billy.

Cù tutti sti « soldi corsi » u patrone di u caffè hà vulsutu cumprassi un vitturone alemanu. Hè vultatu in paese cù centu sporte di kiwì nustrali.

u 3 di Maghju 2016
Zenbucucciu


Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta