Accueil
Envoyer à un ami
Version imprimable
Partager

Calmemuci ! Ùn hè micca una muvra corsa

Panicca nera nant'à e rete suciale corse : u selfie d'un americanu fieru d'avè tombu un "Corsican Ram" circuleghja dapoi eri. Insulte, minacce, è chjame publiche à a spedizione punitiva contr'à l'assassinu. Ma... u ritrattu ùn hè micca statu fattu in Corsica.



Ellu, si chjama Nate Adams. Hè americanu è campione di motocross (cummencia male). Forse ùn vi dice nunda, ma u tippu hà più di 620.000 fans nant'à a so pagina Facebook.

Frà quessi, ci serà siguramente un Corsu, postu chì quand'ellu posta stu ritrattu d'una muvra tomba, l'infurmazione ghjunghje nant'à e pagine FB nustrale :


A seguita hè classica : insulte, minacce, chjame à a vindetta, invitazione à fassi piglià à pattoni è forse ch'ellu ci serà ancu una chjama à u forum di RCFM.

Ci vole à dì chì u so cummentu nant'à u so "Corsican Ram" tombu ùn lascia nisun dubbitu : u ritrattu hè siguramente statu pigliatu in a muntagna aschese o niulinca.

Ma nò.

U "Corsican ram" hè u nome d'una spezia di muvra introdutta in America una quarantina d'anni fà.

U situ allaboutexotics.com ci dice ch'ellu hè u cruciamentu trà a muvra è u "Barbados Blackbelly", è ch'ellu si trova à u Texas :

Calmemuci ! Ùn hè micca una muvra corsa

U simpaticu Nate Adams s'hè dunque solu pagatu una caccia à a muvra americana in qualchì locu persu di u Texas, è siguramente ch'ellu ùn sapia mancu chì a Corsica esistia nanzu di pigliassi tone d'insulte in MP è in cummenti.

Ma ùn hè mai venutu in Corsica (ciò chì ùn hè micca una ragione per tumbà un "Corsican Ram").

U puntu pusitivu, hè chì i Corsi sò attaccati à e so muvre (infine, micca tutti postu ch'elli ci sò cacciadori corsi chì e tombanu...).

U negativu, hè chì e pecure, simu noi... è ci n'hè chì ci credenu sempre.


u 17 di Ghjugnu 2016



1.mandatu da Casus belli u 17/06/2016 14:19
una voltha chi v'era un'ichusia bona pa pizziggà un'amerikanu e meldha, pa punizzi noi a ghjuggà cu eddu a "ghjiralu chi è cottu"! no s'è fattu nunda...e tandu nunda!
Tocca di fà pa un'althra ziminadda!

amerikanos a ballas qui bos bokene!

2.mandatu da J G u 23/06/2016 10:56
S'AMERICANU SI ASSUMIGLIA A UN NIULINCU , HAHAHAHA , O À UN ASCHESE , HAHAHAHA

3.mandatu da eiu u 14/09/2016 07:09
ancu di grazia ch'ellu ùn era di qui

Novu cumentu :