Accueil
Envoyer à un ami
Version imprimable
Partager

Canta u pippolu corsu

Un discu di canzone corse in testa di e vendite in Francia, davant'à Maître Gim's è Shy'm : u soft power isulanu à a cunquista di u mondu.



Figuratevi chì « Mezu Mezu », u discu d'omagiu sinceru à e meludie isulane chì addunisce canterine è canterini francesi è corsi hè statu a prima vendita di musica in Francia durane quattru settimane. A ci dice Charts in France.
Canta u pippolu corsu

Avete forse digià intesu è vistu u filmettu di i dui Patricchi (Fiori è Bruel) chì cantavanu « Corsica ».

N'avemu parlatu st'estate : Patrick Bruel hà una casa in indivisione in Castagniccia

Sta canzona ghjera u primu strattu di u prughjettu di Patrick Fiori : un discu di duetti chì racoglie una quindicina di canzone corse o guasi (circate l'intrusi !!). Avà avemu a seguita.


A lingua corsa hà da ribumbà in tuttu l'esàgonu in bocca di Maurane, di Francis Cabrel, di Maxime Le Forestier, di Enrico Macias, di Michel Fugain o di Jenifer ma dinù in bocca di i Guelfucci (babbu è figliolu), di I Chjami Aghjalesi, di A Filetta, di J.C. Papi, di I Surghjenti, di Jean Menconi ecc.

Lampate un'arechja nant'à Deezer

Nunda chè per quessa ci vole à ralegrassi : in una cafeteria di Laval o d'altrò, à mezu à e stese di bietaràvane, in e grande piane ùmide, anu da risunà e parolle di « Vengu versu tè » purtate da e voci addunite di Maxime è di Petru Santu : « Vengu versu tè muntagna immaculata... Vengu versu tè contra l'alienazione… Vengu versu tè per la Corsica Nazione » : u soft power isulanu à a cunquista di u mondu.

Canta u pippolu corsu

S'è vo site passiunati di hardcore, di rock'n roll, d'electro o di folk senza affettazione fughjite...

Ma s'elli vi piacenu i classichi corsi post-Riacquistu (Vengu versu tè, C'hè dinu, Sintineddi, Sinfunia Nustrale), e rumbà cù un ripigliu chì face « na-na-na-na-na » (Moru biancu è blù), i slow chì valenu più ch'è l'allucazione pè ripupulà un paese (Ricordu), i serinati rumàntichi (Furtunatu), e canzunette kitsch di nanzu à u dilluviu (O corse île d'amour, Solenzara) è ballate « duie voci + un piano » chì facenu scappà u pientu (L'altru mondu), I Muvrini cantati da l'altri (Amareni), Ziu Antò (Ciosi) chì conta una bella storia, stu discu hè per voi.

Ci sò quantunque duie cose veramente « cheesy » cum'elli dicenu l'Inglesi (un mischju di casgiu minatu è di sciroppu di zùccheru ?) : « Quand je reviens ici » è (peccatu) un « Diu vi salvi regina » chì...


Di siguru certi, scherzosi, diceranu : « è dalli, ùn mancava più ch'è un dischettu di Canta u Pippolu Corsu... » è d'altri pumposi « hè l'Anima Corsa chì si sprime, a Voce di a Tradizione chì ribomba... ».

Nè unu nè l'altru.

A verità serà à mezu (mezu) : ghjè ghjustu una manata di canzone pupulare.

Ùn avemu micca da fà u musu.

u 9 di Nuvembre 2015
Zenbucucciu



1.mandatu da estrimei u 09/11/2015 12:47
b[
Canta u pippolu corsu
]b
bravi!
ùn ci hè nunda a aghjustà , tutte hè dettu !

2.mandatu da estrimei u 09/11/2015 17:13
", tutte hè dettu ! "
scusate vulia scrive : tuttu hè dettu o tutt'hè dettu

3.mandatu da alf u 11/11/2015 13:39
ùn capiscu micca perchè a ghjente un so micca cuntente. piace o un piace micca, ma hè bè, nò ?

4.mandatu da guerrini u 11/11/2015 15:29
O estrimè mi pare ch'ellu hè megliu à scrive :
"Tuttu hè dettu" .

5.mandatu da estrimei u 11/11/2015 17:13
"O estrimè mi pare ch'ellu hè megliu à scrive :
"Tuttu hè dettu" . "

salute o amicu ,
mi pare chi per salvà a nostra lingua , a primura hè u parlatu e hè per ciò ch'aghju ammentatu "tutt'hè dettu " specificheghju chi spessu 'nù a miò scrittura mi manghju e lettere, cume quandu parlu (aopru pè adopru ) ; sempre per dà u primura à a lingua parlata .
hè capita ch'ell'ùn hè che u miò parè e capiscu ch'ell'ùn accunsenti a tutti .
sia cum'ella sie hè stata l'occasione di dà u miò parè nantu a lingua .
a ringraziatti o amicu .

6.mandatu da salinzucca u 11/11/2015 18:38
pensu cum'è voi o estrimei.
Anch'eu nenzu scrive cume parlu.
Perchè , oghje, i giovani, a lingua, a scrivenu più chè ciò ch'a parlenu è dopu a parlenu cum'è a scrivenu è ùn hè più u corsu d'i nostri tempi (spergu chì mi sò fattu capì)

7.mandatu da estrimei u 12/11/2015 11:53
"pensu cum'è voi o estrimei."

salute o salinzucca ,
s'aghju capitu bè , simu vechjarelli a mez'a sicastroni ; per fà cume elli , ùn seria megliu che no' ci chjàmimmu di tù ? forse chelli ci piglieranu per pulastroni ??

8.mandatu da Carlinu u 13/11/2015 14:59
Bravi. Bell'esempiu e bella ricuniscenza di a musica e sopratuttu di e voci corse chi so magnifiche cumme quelle basche, giorgiane e taliane.
Vuleria aghjiustà chi so statu piu che stunatu stu quellu d'un n'avè intesu, a l'inaugurazione di l'Albore, unu di i piu grandi "tubes" di a canzona corsa (postu ch'ellu s'avia da senteli tutti!!!). Vogliu parlà di una canzona unica, quella ch'un a alcun paragone per parlà di a nostra splendida e cara muntagna, vogliu parlà di l'ALTA STRADA.

Novu cumentu :