Accueil
Envoyer à un ami
Version imprimable
Partager

Chì Zucca !

Bastia facia a prumuzione eri di i mistieri di u bastimentu. Cumu hè bellu quellu omu nant'à u so vitturone ! Pare un ciucciu pare ! Serà ghjuntu Babbu Natale ? Avemu interrugatu stu giovanu mani d'opera bastiacciu chì mette e mani in pasta à prò di a so citadella dipoi 40 anni !



zuccarelli, bastia, bastimentu,
zuccarelli, bastia, bastimentu,
Sbanditu : Salute Milou! Hè quessu u vostru cugnome. Vi possu dumandà quale hè Tintin?

Milou : Sarebbe una storia troppu longa da cuntà vi. Tintin, di fatti, hè un metafora. Sò i bastiacci chì sò Tintin dipoi anni è anni !

Sbanditu : Site mani d'opera. Cumu hè ch'avete sceltu stu mistieru ?

Milou : A sapite, ind'è noi, hè cum'è una tradizione. Simu quasi pretini. Aghju fattu cum'è babbu. Hè stata una scelta ma era sopratuttu una vucazione.

Sbanditu : Dipoi quaranta anni, si vede nant'à e vostre mani ch'avete straziatu. Qualesse sò e vostre realisazione e più belle?

Milou : Hè difficiule di fà una scelta ma trà a pelusa sintetica di Toga è l'architettura lupinaghja, preferiscu quantunque a pelusa. Mi campu incù a mo famiglia. Andemu à ghjucà à u ballò. À u mo figliolu Jean, li piace assai di fà u guardianu. Allora, eiu, m'amusu, femu nice di ghjucà à u Sporting. Quandu tirgu, pare chì zappu l'ortu. Mi ramenta a mo zitellina paisana.

Sbanditu : U mistieru di u bastimentu hè assai difficiule. U guvernu vole allungà a durata di u travagliu. Chì ne pensate?

Milou : Hè lecita. Tenite per esempiu a custruzzione di u museu di Bastia, à a citadella. A vi pensate voi chì senza allungà a durata di u travagliu ci sbucciaremu un ghjornu? Sò vinti anni chì a meria conta fole à i bastiacci dicendu li chì à mumenti hà da apre. Hè listessa per u stadiu di Furiani. Ne cunniscite voi cità duve i prugetti ùn sbuccianu mai? Allora hè capita chì ci vole u tempu. Guardate i Francesi, quandu anu vulsutu custruì u stadiu di Francia, l'anu fatta in quattru è trè sette. Noi pò cuntemu male. Simu sumeroni. In Corsica quattru è quattru facenu vinti. 20 anni è 20 milioni d'€ !

Sbanditu : Hè vera chì simu capre. Ci hè un affare chì ùn aghju mai capitu. Cumu hè chì in Bastia 1+1 = 40?

Milou : V'aghju da spiegà. Di fatti, ùn hè micca 1+1. Sò falsi sti fundamenti. Di fatti hè J+E chì facenu 40. Aiò, ùn l'avete mai amparatu à a scola u teurema di Bastia?

Sbanditu : Mi garbanu pocu è micca e matematiche. Sò più literariu chè fisizianu ! In quesse e fisiche, ci entru pocu è micca...

Milou : Scusate mi ma mi chjamanu i bastiacci. Mi chjamanu sempre ! Aghju da andà !

u 18 di Maghju 2008
Sbanditu



1.mandatu da renusinca u 15/06/2008 13:37
mà! mà! mà MDR!!! aio stu corciu emilou!!!

2.mandatu da TonyMontana u 21/07/2008 11:55
Ghjè una intervista verità : tremenda =)

Novu cumentu :