Accueil
Envoyer à un ami
Version imprimable
Partager

Chì avvene per e nostre aghje ?

E muntagne ùn s'anu micca da lascià ghjucà à a risa da e cale di rena fina bagnate d'acque turchine : si pò dinù à mezu à e machje zeppe accuncià picculi lochi lussuosi, nòbili, ùnichi, privativi è 100 % corsi.



Di fatti, e muntagne ridòndanu d'aghje magnìfiche, basta à trasfurmà sti lochi di stanti in tempii di u massaghju nustrale è di a palpera isulana à l'oliu essenziale di murza.

Fidighjemule bè quell'aghje, sò màgiche !

I baroni formanu chjerchji perfetti da fà passà Stonehenge pè un lucacciu senza anima, ci hè sempre un ventulellu fullettu chì spula un granu invisìbile ma carcu di vibrazione tràpositive, in l'aria, frà e rambelle muscante, si facenu sente i canti di e tribbiere antiche, isse voce chì incuragìanu omi è boi « volt'è gira è voca tondu chì u tribbiu piglia fondu» è chì dumane, s'è noi a vulemu, permetteranu à centinaie di turisti di ripiglià fiatu è di rinvivisce in un spaziu trà celu è terra.

Da chì stu sonniu diventessi realità, basta à traccià viòttuli novi in la natura (u parlemu micca di GR à l'usu di i pumataghji sbaiuccati), à dirascà appinuccia, à arrulà qualchì massaghjatore...

O zitè, avemu da fà di l'aghje antiche i spà di u futuru è avemu da magnetizà tutti i ricconi è i pippoli di u mondu.
U core di a Corsica rurale hà da batte di novu à u ritimu di u calpighjime di i boi.

O guasi.

Aghja in Turghju, ritrattu : www.paese-di-marignana.fr


u 14 di Sittembre 2015
Zenbucucciu



1.mandatu da buzz a saetta u 14/09/2015 21:30
fideghjate stu filmu di a scola Subissi in Bastia chì tratta trà altre di l'aghje : http://www.wmaker.net/subissi/m/FILMU-CUMMENTU-TRA-AGHJE-E-PAGLIAGHJI-IN-RUTALI-CE1_a97.html

2.mandatu da Guerrini u 20/09/2015 12:07
Sò d'accunsentu cù voi ,in Corsica si face nettu pullaghju.

Ind'ì u mo paese ,Ghjuncaghju ,c'era una bella aghja chjamata l'aghja à lunetu .
I cacciadori ne anu cacciatu i baroni è l'aghja ùn esiste più.U nostru passatu hè squassatu.
Vi dumandate perchè ?
Cari amichi ,era da pudè accumpulà e so vitturone!

Novu cumentu :