Accueil
Envoyer à un ami
Version imprimable
Partager

Chì ci hè di novu nant'à a tela in lingua corsa ?

Sette anni fà lanciavamu A Piazzetta è ci sentiamu appena soli nant'à a rete. Hè menu u casu oghje. Eccu un ràpidu statu di i lochi di a tela in lingua corsa.



A sapete ch'ella s'apre a terza edizione di a simana di a lingua, cù un prugramma di più in più riccu, ch'ellu sia in Aiacciu o puru in Bastia.

È s'è no faciamu un bilanciu di ciò ch'ellu si pò truvà in lingua corsa nant'à internet ? Ùn avemu micca messu i siti d'amparera, solu i siti chì pruponenu un cuntenutu messu à ghjornu di manera regulare.

U tremendu Tarrori è Fantasia hè oramai chjosu, ma hà vistu nasce u libru, selezzione di nuvelle fantastiche di u situ (ma turneremu à parlanne).

E rete suciale, è Facebook in particulare, anu pigliatu a suprana nant'à i forums. Cambianu in furia l'usi nant'à internet, ma ci sò sempre parechji forums in lingua corsa, cum'è :
- U Foru corsu
- Isula
- L'Appuntamentu
- Estricuntrasti

Sguardu Liceanu hè un situ fattu da sculari bislingui. Anu ancu a so pagina Facebook è ci vole à incuragisceli !

Nant'à Facebook ghjustu à punti sò nate parechje pagine cunsacrate à a lingua corsa è ci si trova una grande creatività. Parleremu solu di e pagine di fan, micca di i conti persunali :

Ci hè Tilone, chì hè cunsacratu à u sinemà è si ne parla in corsu. Da vede !

Cunniscite siguramente à VDM in corsu, chì s'hè fattu una bella piazza è chì cuntinuveghje à cresce. Hè longa a cumpagnia di quelli chì anu una "vita di merda".

Hè cusì ch'ella hè ancu nata a pagina Chì bella vita, u cuntrariu di VDM ! Piuttostu ch'è di lagnassi sta pagina vi prupone di sparte e vostre stonde e più belle.

L'altra pagina chì cunnosce un grande successu nant'à FB hè Ride in lingua corsa, attiva assai è chì prupone fiurette è magagne ogni ghjornu.

Pruverbii è Detti Corsi, a dice u so nome è vi prupone fiure è pruverbii di manera regulare.

Ùn si presenta più a pagina STORIA DI CORSICA / Histoire de Corse, bislingua è ricca assai. Un successu maiò (più di 13.000 fans).

Truvemu dinù parechje pagine di difesa di a lingua corsa, cum'è :
- U corsu torna
- Lingua, cultura è tradizione
- A Lingua Corsa !
- Lingua corsa, lingua viva
- A pagina di l'associu Cap'in lingua chì si dà di rimenu è chì prupone corsi di lingua è surtite in immersione in Capicorsu.

Ùn si presentanu più I Kongoni, truppa di magagnoni chì pruponenu di manera regulare i so filmetti in lingua corsa nant'à a so pagina.

In quant'à Boemiana avà cunniscite tutti i so dissegni. In più di u situ, ci hè dinù a pagina di fan.

L'ADECEC in più di u traduttore di prima trinca INFCOR cuntinuveghja di prupone u so nutiziale cutitianu in corsu.

A nuvità quist'annu hè Corse-Matin chì prupone ogni dumenica a so cronaca in lingua corsa À dilla franca, a bona nova hè chì a cronaca si pò leghje ancu nant'à u net. Sò Julian Mattei è Diana Saliceti chì a facenu campà è si pò felicitalli.

Notte Turchina hè un situ, un forum, una pagina Facebook è un contu Twitter cunsacrati à i sustenidori di u Sporting Club di Bastia, è ùn si ne parla ch'è in corsu. Vi pare nunda ?

Ci simu siguramente scurdati d'altri siti è pagine. Signalatecile, mandateci un mail o un messagiu nant'à a nostra pagina Facebook per ch'è no possimu aghjustalle quì.
Chì ci hè di novu nant'à a tela in lingua corsa ?

u 31 di Maghju 2014



1.mandatu da sampetracciu u 31/05/2014 17:59
mi pare chi tuttu què ùn sia micca troppu male. aghjustate i canterini, i teatrini, i giurnalisti di a furmazione bislingua.... e feremu u custatu chi e cose avanzanu. ci so assai vuluntà, assai ghjente mutivata

ma ne ci vuleria ancu di più !!! "s'è no tiremu tutti inseme..." dicia quellu

vuleria felicità tutti quelli mintuvati qui sopra. bravi ! cuntinuvate cusi

a rivindicazione ghjè bè, MA UN BASTA ! dumandà ghjè bè, ma ci vole à Fà dinù ! Cuntinuvate tutti !!!

2.mandatu da kalaguccia u 01/06/2014 10:33
i forum ci so sempre nanzu i frequintava ma oghje mi paer ch"elli sianu tutti abbandunati !! he veramente un peccatu..

3.mandatu da turchinu u 01/06/2014 17:55
I forums anu calatu di frequentazione chi Facebook si piglia tuttu

Hé peccatu, c'era a qualità. Isula foru hè bè trovu

4.mandatu da Antò Rizzo Filippi u 02/06/2014 22:18
A pagina Corsica-Sardinia annanta facebook, hè fatta di canzoni, detti è poemi in lingua corsa è in lingua sarda. Issa pagina serve di legnu tra a Corsica è a Sardinia.
Andate à vede !

5.mandatu da Paskoual Paole u 03/06/2014 23:16
Ci hè ancu u situ di Alta Frequenza chi hè, per e nutizie, 100% bislingu

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta