Accueil
Envoyer à un ami
Version imprimable
Partager

Chì tippu di studiente curtinese sì ? (o sì statu per i vechji)

Dop’à un travagliu d’etnulugia di più d’un annu, vi prupunemu deci varietà di studienti curtinesi.



Chì tippu di studiente curtinese sì ? (o sì statu per i vechji)
1: U Fannulone (quellu ch’ùn face nulla): U fannulone si sveglia versu 10 ore è mezu incù a pena in capu ma ùn si pesa micca subbitu postu ch’ellu ùn và mai in scola, fideghja e ridiffuzione di TPMP o di i Chtis stracquatu in u so lettu comu s’ellu era mortu. Dopu à u Corsica Prima s’arrizza ! Marchja appena è và à pusà si annantu à i cabinetti à fà si una pisciata.Iè u fannulone si posa per piscià a mane !!! U so iPhone in mani si leghja e nutizie annantu à Facebook o Twitter è sopprattuttu l’ultimi articuli di a Piazzetta chì li piace assai issu magnificu ghjurnale... Quandu hà finitu (una vintina di minuti) mette u so sciortu di u Sporting (o altru) è si lampa in a sò attività principale di a ghjurnata : FIFA !!! U fannulone pò ghjucà mentre quattru o cinqu’ore à FIFA ! Versu cinqu’ore di sera ghjetta u so mandile crosciu in a rumenzula è và à lavà si. Ritrova i so amichi in caffè, facenu a bilotta, l’apperitivu,si techjanu, finiscenu in sborgna è ribilotta u lindumane...

2: U Senza Vita: Alalala ! L’aspittava dapoi parechji anni issa libertà di a prima annata !! L’occasione per ellu di campà solu senza i so parenti. U senza vita ferma in casa da a mane à...
u lindumane. Cum’è u fannulone u senza vita ùn face ch’è ghjucà à a Playstation ma ellu ùn dorme mai. Accantu à u so lettu ci hè sempre un pacchettu di Kleenex. Ferma in u bughju a
ghjurnata sana, hè biancu biancu, bruttu è porta spichjetti. Ma hà quantunque amichi, anch’elli senza vita,è quandu sò inseme e so discursate ùn trattanu ch’è di Playstation, Xbox, Mac o
PC. U senza vita hà a paura di a ghjente è di u lume.

3: A Sega : Ch’ella sia aiaccina o bastiaccia ghjè u listessu. Spichjetti Persol, mostra Rolex, scarpi Prada. A discrezzione ùn hè tantu a so qualità principale. Mentre a ghjurnata hè sempre pusata in terrazza à u Rex. A pudete sente, ghjè ella chì dice sempre « toc de » o « babin ». Hè carc’à soldi . Certe volte a vidite passà annant’à u corsu in u so 4X4 BMW. Face i so studii à l’IUT (cosi ind’è u cummerciu). A sega sorte u marti è u ghjovi sera, torna à u Rex, si piglia una tavula alta (face « carrudge » di mete si à u cuntuaru »), è si paga una decina di buttiglie chì tuttu u mondu pudessi vede a so furtuna.

4: U Maffiusellu : U maffiusellu hè cum’è a sega ma ellu hè ben più discrettu, o piuttostu face quellu chì hè discretu. Tuttu di neru vistutu, baretta Prada in capu è pistola in a so stachetta di marca, ùn caccia mai nè una parola, nè un surisu. Face a paura à tuttu mondu è nimu parla in a so prisenza.

5: U Pulendaghju paghjelaghju : Scarpi muntagnoli, treillis bracanatu, bleu de chine, barba d’un mese è baretta arancione. Vestitu cusì, u pulendaghju paghjelaghju batte à u Bips, à
u Central o ancu à L’Eden. A l’apperitivu ghjè quellu chì vi mette in zerga perchè canta, o piuttostu prova à cantà a paghjella accant’à voi. Cusì, ùn vi sentite mancu parlà. Ùn pianta mai eppo sò sempre e listesse paghjelle, i listessi versi è i listessi bassi fracichi. Avà e cunuscimu e famose : « vuleria chì a mio voce... » è « s’è tu sapessi lu male ... » o « Què sò voce muntagnole ...». I pulendaghji paghjelaghji sò in studii corsi è quand’elli si scontranu in carughju ùn parlenu mai in francese (iè asiste sempre !). Infatta vera ùn si parlanu micca, si mughjanu. Si campanu à mughjà, u peghju ghjè quand’elli ghjocanu à a mora, vale à dì ogni sera. Ponu ghjucà sin’à trè ore di mane briunendu sempre e listesse sprissione ! Ùn si pò stà accantu chì sinnò si diventa scemu ! Sò veri corsi chì manghjanu pulenda, figatellu è furmagliu frescu. Ùn ci vole micca à cunfunde li incù i sustenidori bastiacci.

6: U Sustenidore Bastiacciu : Anch’ellu passa e so serate à u Central ò à a Coupole. Vistutu in Milllet-Salomon è incù a so baretta di Bastia 1905, ghjè ellu chì lampa canti bastiacci cum’è « issu cantu » o « quandu seremu ». Face un tazzu scemu per pudè incazzà si incù i sustenidori aiaccini chì ùn sò tantu luntani.

7: U Sustenidore Aiaccinu : Apperitivu à u Tresor è serata à u Rex. Eccu a notte di quellu chì, incù a so vesta è a so baretta Stone Island, ùn aspetta ch’un solu affare: chì i sustenidori
bastiacci cantinu « ACA gaulois » per pudè imbaruffà si apppena in terraza à u Rex.

8: U Briacone Pisivone : Ognunu ne cunosce unu ma certe sere ognunu averia priferittu d’ùn cunosce lu. U briacone pisivone vi sterpa una serata. À colpi di bichjeri lampati in terra, pizze rese in ogni caffè, incazze chì finiscenu male è mughji stridenti. Beie da a mane à a sera è ogni ghjornu vi prupone un apperitivu. Hè sempre briacu persu nanz’à l’altri ma, ellu, tene a notte sana. Volta sempre in vittura pigliendu u corsu Paoli in l’altru senzu è d’altronde l’anu cacciatu u permessu parechje volte. Hà durmitu di più in tarra o in cellule de degrisement ch’è in casa soia. Ma u lindumane u briacone pisivone và quantunque in scola. Face i so studii di manera seriosa è ùn fiasca mai i so esami.

9: L’Artistu impinzutitu : L’artistu impizzutitu face i so studii à a facultà di lettare : in arte o in arte di u spittaculu. U pudemu ricunosce di manera faciula : capelli longhi è brutti, pantalone larghju, t-shirt di musica (ACDC, Led Zep) o di sinemà (Scarface, U padrinu), è accentu frusteru prununziatu ancu s’ellu hè corsu. E so ghjurnate e passa à l’università. E so serate, e face in caffè di u Cyrnea chì quallà e « consò » sò menu care. Batte incù i so amichi artisti è ùn parlanu ch’è di sinemà. Fideghjanu tutti i so filmi in VO è ne ponu parlà mentre trè ore impieghendu sprissione cum’è « to much », « has been » o ancu « esthetisant ». L’artistu impinzutitu hè piuttostu di manca. Averia pussutu fà à Maghju 68 s’ellu era natu. S’indegna di tuttu ma hè bravu incù tuttu u mondu è ùn imbestia mai à nimu.

10 : U Traditoru Infrustiritu : U traditoru infrustiritu hè quellu chì hè partutu à fà i so studii in cuntinente sapendu ch’ellu pudia fà listessu in Corsica. Iè ma « capisci, Aix ghjè u Top !!! » eppo « ci vole sorte di a Corsica per prufità appenna di a so ghjuventù».

E voi site qualessu ?

u 14 di Dicembre 2012
Ghjuvanfrancescu Coppa



1.mandatu da U Palatinu u 14/12/2012 11:42

2.mandatu da Ghjisepp u 14/12/2012 13:28 (da un teleffuninu)
Magnificu articulu !

3.mandatu da rughjatore u 14/12/2012 13:31
ghjè un accurtamentu di dì chì i sustenitori aiaccini vani à u rex. Eu, ùn ne cunnoscu manc'unu !

4.mandatu da ANTO u 14/12/2012 13:54
E i pilastri di comptoir di u Claude chi ne fate ?

5.mandatu da Cipolla u 14/12/2012 14:12
MCDR (capì : mi campu di rise).

Si seria pussudu aghjunghje u capitulu "Ciò chi a francia vole fà crede" :
Universita =
- centru di furmazione di u fronte
- chjerchju di riflessione suvversivu
- locu d'adduttrinamentu
-....

6.mandatu da Moitinca u 14/12/2012 14:14
Numaro 5 "I pulendaghji paghjelaghji" , ma versione feminile bella sicura !
U Bip's, Studii Corsi;
Eccu!

7.mandatu da U figliolu di u marucanu u 14/12/2012 14:20
E quelli chi cantanu a a gloria di Claude E quale so?

8.mandatu da CazzuMarinu u 14/12/2012 14:29
Sò statu à l'Università di i cazzi marini, è aghju fattu u cazzu marinu.

http://ucazzumarinu.overblog.com

9.mandatu da u clandestinu u 14/12/2012 14:34
Chi pensate di i giovani ch'un scempianu micca troppu, chi battenu ind'è tutti i lochi, incu i vechji è i giovani, chi provanu à fà a musica è i so studii d'una manera intelligente, ma à chi piace a briachina a l'antica ? Hè vera chi un ci n'hè tantu, ma c'hè sempre ind'è a cità paolina, ghjente micca troppu strana!

10.mandatu da a capra u 14/12/2012 14:34 (da un teleffuninu)
O chi stonda di risa ch aghju fatta avva! Eu preferiscu a leghje articuli di macagna cusi cuntinuate puru

11.mandatu da Acqualacciu u 14/12/2012 14:40
Chì risa...
Eiu sò bulighjatu trà u Pulendaghju paghjelaghju è u Fannulone. I dui à tempu....

12.mandatu da Massimu u 14/12/2012 14:52
Un bellu riassuntu di trè anni di a mio vita... Cum'ella mi manca a vita curtinese.
Bravu, mi sò campatu cù st'articulu.

13.mandatu da Massimu u 14/12/2012 14:57
E avà chì sò statu ubligatu à parte in Aix, a vi dicu à tutti i liceani chì ci leghjanu...
UN PARTITE MAI À STUDIÀ IN FRANCIA !
Si stà troppu bè in Corti per andà à fassi cagà pè'sse tarre frustere. U cuntinente hè puzzicosu, eiu s'o pudia vultà in casa meia pè finì i mo studii, piglierebbe un bigliettu in avviò in a siconda chì vene. Aix hè una cità di merda, trà i pinzuti, e "racailles" è i corsi chì ci stanu è chì sò peghji chè tutti, fateci stu piacè di stà in Corti è di fà campà a nostra università.

14.mandatu da Niolu u 14/12/2012 15:03
Eiu so u traditoru, mezzu mortu in nizza cu tutti sti pumadaghji

15.mandatu da Bite u 14/12/2012 15:07
@ Rughjatore : ti possu assicurà chì quand'elli ùn si piattanu micca, parechji tippi di l'Orsi Ribelli sò u Rex, i marti è ghjovi sera.

16.mandatu da U figliolu di u marucanu u 14/12/2012 15:24
Massimu dunque si un traditore?

17.mandatu da Massimu u 14/12/2012 15:35
Avà sò traditore, iè ! E ùn l'aghju mancu sceltu.
Per mè, era parte in cuntinente o avè fattu 3 anni di studii per nunda. Ma ùn aghju da rifà a storia... Sò statu, 1, 5, 6, 8. Avà sò 10. Ghjè a vita...

18.mandatu da U Vagabondu u 14/12/2012 17:31
À Niolu : tandu ci cunniscimu! Sò dinù traditore in Nizza.!

19.mandatu da amedzumare u 14/12/2012 21:47
Eo so traditore in Marseglia, è dumane tutti i traditori di Francia ,in Monptellier, ci hè da fà O zitè..FORZA BASTIA

20.mandatu da Scrianzatu malallevatu u 14/12/2012 22:35
beuh, 15 anni fà, u cyrnea ùn era micca un bar di bobos impinzutiti.
serà diventatu cusi goffu ? chi scumpientu

21.mandatu da Capicursinu rancicu u 15/12/2012 01:38
@ moitinca, t'aghju ricunnisciutu !

22.mandatu da Pettirussu u 15/12/2012 01:48
Beddu articulu so mortu di rise, si ci voli a sceglie, so statu pulendaghju... Mà un era tantu veru 15 anni fà...
@Scrianzatu : u cyrnea un era cusi, mà a ghjuventu corsa un hè piu quista di i tempi vicini, forsa hè stata rimpiazata... (è credi puru chi scrive st'affara mi dispiace mondu...)

23.mandatu da U Candidu u 15/12/2012 08:07
E u studiente chì studieghja, ùn esiste ?

24.mandatu da U Palatinu u 15/12/2012 09:49
Sì chì esiste.
Hè d'altronde cio ch'aghju fattu eiu, passendu assai di più tempu dentru u mio studiò à studià ch'e à esce fora à fà a festa, è, in dece anni di studii, mi sò forse imbriaccatu solu cinque volte (cuntentu dinù e vacanze).

Iè, eru seriu essendu studiente.

Hè dopu chì aghju fattu cunnerie !

25.mandatu da Niolu u 15/12/2012 10:16
A u vagabondu: eiu so in a Fac di lettera cu tutti i hippie, tu in duve si ?

26.mandatu da U Candidu u 15/12/2012 12:37
Mi cunsoli Palatinu, cridia d'esse u solu straterrestru curtinese. Hè cusì ch'elli mi chjamanu l'altri !

27.mandatu da U Vagabondu u 15/12/2012 13:06
À Niolu : Sò à a facultà di scienze in Valrose.

28.mandatu da Marietta u 15/12/2012 13:51
A facultà di Casamozza hà a cuncurrenza...

29.mandatu da claude E u 15/12/2012 19:51 (da un teleffuninu)
Eiu so statu sustenitore di u sacrer claude, ma ava un esiste piu

30.mandatu da Moitinca u 15/12/2012 20:46
@capicursinu haha è quale si ?! Eiu ùn t aghju micca ricunnisciutu !!! P

31.mandatu da U Vagabondu u 16/12/2012 21:53
Una Moitinca chì face i so studii di corsu in Corti, ùn ci n'hè chè una. Tuttu u mondu t'hà ricunnisciuta!

32.mandatu da Kim jong di papa u 17/12/2012 13:04
Tanti ricordi! A ringraziavvi... Tante briacchine, zitelle, amichi... Sette anni scemi in Corti! E oghje, un bellu mistieru! Evviva l Universita!

33.mandatu da Pasquà u 17/12/2012 15:40
e quellu chi ghioca a carte tutte e notte un essiste piu?

34.mandatu da Livianesu u 17/12/2012 16:16
È nimu ùn stampa mai infatta?

35.mandatu da Azzezzu u 18/12/2012 01:01
Magnificu st'articulu ! Hai tuttu dettu ... Aghju amichi in quasi tutti tipi di studienti .. Un bel riassuntu di studienti curtinesi ch'elli sianu aiaccini bastiacci purti vechjiacci calvese seghe senza vita ..,
Ha!! ai scurdatu u drugatu ..!

36.mandatu da aiotuttiifratelli u 18/12/2012 08:16
eccelente!!!! mi campu ahahah...

37.mandatu da Zeruffu u 18/12/2012 11:00
@ Massimu
Ti tengu caru ! Senza umusessualità, a ti precisu...
Aix hè una città di MERDA ! Hè goffa, a ghjente hè più burghesa che burghesa, è hè pratinziosa cum'è ùn si pò esse !
D'ACCUSENTU À 100% !
Bravu à te !

38.mandatu da Cazzumarinu u 19/12/2012 06:26
@Moitinca, ti vecu spessu à u Bip's, ma pa u mumentu senza baretta rossa!!

39.mandatu da Cristofanu u 21/12/2012 09:36
Aghju messu un nomu à tutti i tippi di studenti !
Chì risa !

40.mandatu da J G u 22/12/2012 08:51
Eo so un'anziana di a facultà di Bitulledu ! un cunnusite micca ! Hé a facultà indue so andati tutti l'alisgianinchi e ancu Minutu Grossu e chi hé un paisolu di u Petricaghju !

41.mandatu da girandulò u 22/12/2012 22:40
Poca risa ! M'hà fattu piacè di turnà à pinsà à tutti quist'anni passati in Corti in à mè ghjuventù... anzi di divintà un traditore in Montpellier ! Possu mette un nome annant'à ogni tippu di u vostru riassuntu. Cuntinuate puru cusì !

42.mandatu da Sgioscemu u 24/12/2012 20:18
So un fannulone, leghje a Piazzetta pusatu nantu à i cabinetti: eccu a mo vita

43.mandatu da Massimu u 29/12/2012 17:35
Ci vole à precisà chì si pò riesce i so studii essendu un briacone di prima trinca è un fannulone di quelli meuh meuh... Un c'hè bisognu à stassine in casa per avè e so annate, basta à travaglia una simana nanz'à l'esami (è ancu in e filiere e più difficiule, fora di a medicina). Prufittate di a vostra giuventù o ghjente...

44.mandatu da boziu! u 02/01/2013 15:13
eiu mi vestu in prada un vechju patrol cantu a paghjella un suportu ne u scb ne l'aca.....un vo ne a u bip's ne in studii corsi....so un speziu di razunettu in fatti e cuntentu di vede che so unicu!!

Novu cumentu :