Accueil
Envoyer à un ami
Version imprimable
Partager

Contr'à i "sosies" di Michael Jackson !

A morte d'una persunalità cunnisciuta s'assumiglia sempre à un carnavale. In omàgiu à Michael Jackson, sò parechji à travestesi in u King di a pop. In Corsica dinù, parechji sosii sò stati visti.



Contr'à i "sosies" di Michael Jackson !
E fiure di l'addunite di fan di Michael Jackson in Parigi, Los Angeles o Sidney s'assumiglianu tutte. Decine è decine di fanàtichi in làcrime, in traccia di pienghjulà a morte di "Bambi".

À mezu à tutti quessi, sò sempre qualchì unu à avè messu un cappellu è un paghju di spechjetti di sole per circà d'assumigliassi à quellu di Thriller è Bad. Certe volte ci vole veramente à circalla a sumiglia...

Pè a morte di Ronald Reagan o quella di Jean-Paul II ùn s'era purtantu micca vistu stu gèneru di manifestazione-omàgiu-carnavale.

In Corsica dinù, d'appressu à e nostre infurmazioni, si sò visti parechji sosii di MJ. In Bastia un falsu Jackson trascinava u so caddie à u Géant Casino cù un passu di Moonwalk. A sera stessa, un antru si spassighjava in i carrughji bastiacci ballendu nant'à "Billie Jean".

In Aiacciu, Portivechju è ancu in Ghisunaccia si sò visti fan vestuti cum'è un veru Jackson Five.

Frà tutti quessi, qualessu serà u primu à scrive u lamentu di Micaellu Jackson ?

u 28 di Ghjugnu 2009
Scrianzatu



1.mandatu da ziu santu u 28/06/2009 17:30
Hè ghjustu à puntu ciò chì n'annarba u più : i fanatichi o "sosie" di l'artisti
tutti sti scemi chì si piglianu pè i so idoli : falzu M. Jakson, falzu Johny, claude françois, Elvis di Sicuru. Nisunu pò cuntesta u tallentu d'un artista cunnisciutu in u mondu sannu ma quandu vegu certe personne pienghjendu o fà si un attaccu perchè anu vistu u so idulu mi dicu chì ste persone sò veramenti trapanati. Certi credenu esse veramente u persunaghju pigliatu in modelu, una spezia di schisofenia
Certi so andatu à pagà quasi 1000 € pè una piazza di cuncertu è micca ghjente ch'anu a muneta, pumataghji "fans" di Bambi, avà a piazza hè "collector"
I mo cuglioni ti sì messu drentu pè nunda o baulò

Eu quandu aghju vistu à L. Francescu ( l'arcusgi ) o quand'aghju vistu à Paolo Maldini ùn aghju dettu nunda aghju surisu, rispettu a so vita.

2.mandatu da fan di lavighju u 28/06/2009 17:53
iè, ma u ghjornu induve averemu un falsu Louis Franceschi, un falsu Jean-François Bernardini, un falsu Hubert Tempête... ???

3.mandatu da filidatu u 29/06/2009 08:53
u sosie di Jf Bernardini esiste hà ancu un gruppu chjamatu armunia

4.mandatu da ZIU ANTO U PURCAGHIU u 29/06/2009 11:18
E quale sara chi si vistera di mascara in cu u capu è l'arecchiè di a mo sumera ? ? ?

5.mandatu da xuân u 29/06/2009 23:44
Victor Hugo a dicia : ùn imitate à nimu, a scimia chì imita un lione ferma una scimia !

6.mandatu da Cumpalliols u 30/06/2009 10:41
Eiu, mi n'infuttu assai di i susii di Michele Ghjacumufiglioli (iè ! cursisemu i nomi !).
Cio chì m'interesseria assai più, serianu piuttostu e donne (ancu s'elle so susie d'atricce celebre).

7.mandatu da Piratella u 12/07/2009 01:17

Bah, prima ch'elli sianu 'ssi "fan" tonti di Jackson quant'è i scemi, chjosi o nò, chì si piglianu per Napuleò, Patrick Fiori serà una vedette internaziunale -)))

Novu cumentu :