Accueil
Envoyer à un ami
Version imprimable
Partager

Crisa ecunomica è diversità di l’indipendentismi

Publichemu quì una cuntribuzione stratta d'una cunferenza intitulata “L’Auropa spizzicata ? Diversità e perspettive di e mubilizazione indipendentiste ughjinche”, prununziata in Ruglianu, nant’à l’invitazione di l’associu Cap’in Lingua, u 6 di dicembre di u 2014).



Crisa ecunomica è diversità di l’indipendentismi

Di sicuru, u referendum nant’à l’indipendenza di a Scozzia è a mubilizazione catalana anu pussutu fà crede à un prucessu di frammentazione di l’Auropa. In quelli territorii, c’hè omancu 40% di a pupulazione ch’hà vutatu o ch’hè pronta à vutà per l’indipendenza.

Ma pigliendu un pocu di distanza, si vede ch’ùn ci simu mancu appena. Ci sò indipendentismi furtissimi: u scuzzese, u catalanu, u bascu, u fiamingu; più luntanu, quelli di e Feroè è di a Gruinlandia; ancu più luntanu, quellu di a Nova Caledunìa... Per u restu, l’indipendentismu ferma una perspettiva à longu andà. In certi lochi, l’idea pò ancu perde i sustegni, cum’è à u Paese di Galle.

Una di e quistione maiò quì hè l’effettu di a crisa ecunomica attuale nant’à sti muvimenti. Sì pò dì chì l’effettu u più chjaru di quella crisa è a falata di i partiti duminanti, è a crescita di i partiti chì cuntestanu di modu radicale u sistema puliticu.


Si vede in Italia, attraversu u Movimento 5 Stelle, di u comicu Beppe Grillo, ch’hà francatu 20% di i voti à e legislative, senza un prugrama veramente chjaru, aldilà di a dinunzia di i puliticanti, di u Statu, di l’Auropa... è ancu di l’immigrati. Si vede in Spagna, cù Podemos, chì si pò definisce facilmente cum’è un muvimentu di manca alternativa, chì vurria lampà in mare a Custituzione di u 78, è chì secondu l’inchieste, puderia diventà u primu partitu di u paese l’annu chì vene. Si vede in Ingliterra è in Francia, attraversu l’UKIP è u FN, chì sò partiti più tradiziunali di dritta radicale, per ùn dì di strema dritta. Di manera generale, sò quessi partiti quì ch’anu appruffitatu u megliu di a crisa di i partiti duminanti.


Crisa ecunomica è diversità di l’indipendentismi
Eppò, ind’è i territorii specifichi, d’un puntu di vista culturale o geografficu, s’hè vista a prugressione tremenda di certi partiti naziunalisti, in particulare in Scozzia è in Catalogna, induve a quistione di l’indipendenza hè posta di manera più chè chjara. Quantunque, hè megliu à ùn fà troppu generalità. Parechje sò e regione induve ùn si vede prugressi sinsibuli di i naziunalisti è l’indipendentisti. Prugressi ùn si ne vede in Sardegna, Sicilia, Galizia, Baleari, Paese di Galle, Irlanda di u Nordu, ecc. Ind’altri lochi, l’influenza di i partiti naziunalisti è indipendentisti cresce di sicuru, sia à u livellu eletturale, sia à u livellu ideulogicu – ghjè u casu di a Corsica o di u Sud-Tirol –, ma per avà i Stati cuncernati ùn sò mancu appena disposti à cambiamenti istituziunali sinsibuli, vale à dì un autunumia rinfurzata.

Dimu piuttostu chì i fattori cungiunturali anu avutu un effettu decisivu in Scozzia è Catalogna, perchè chì c’era digià una mubilizazione indipendentista assai putente, è perchè quella mubilizazione s’hè truvata di pettu à guverni cunservatori chì l’anu scatinata. Allora, iè, pudemu dì chì a crisa ecunomica è pulitica hà aiutatu l’indipendentisti scuzzesi è catalani à francà un passu decisivu, ma ùn si pò esagerà u so propiu impattu.


Di manera più generale, hè impurtante à dì chì l’indipendentismi, ancu s’elli anu u listessu scopu, sò assai assai sfarenti. Da una parte, sè no’ guardemu i so prugetti pulitichi. Per esempiu, i Scuzzesi anu un prugettu bellu inclusivu, chì si pò dì di manca, puntellatu nant’à u sintimu naziunale ma micca nant’à una lingua particulare. Invece, in Flandra, u prugettu indipendentistu hè di dritta, per ùn dì di strema dritta, è ci si pò vede assai prucessi d’esclusione per mutivi linguistichi.
Da una altra parte, sè no cunsideremu l’attittudine di i Stati. Per certi, cum’è a Catalogna, a porta hè chjosa, è sarà bella difficiule da apre, cù u risicu ch’elle si sviluppinu e tensione suciale. Per d’altri, cum’è i Feroè, a porta hè aparta, cumplettamente aparta. D’altronde, quindeci anni fà, u guvernu territuriale avia lanciatu un veru prucessu indipendentistu, ma l’hà abbandunatu perchè u Danimarcu hà ricusatu d’accumpagnà stu prucessu durante quindeci anni cum’è avianu dumandatu. Sin’à quattru anni sì eranu disposti à aiutà, ma quindeci anni nò. Tuttu què per compie dicendu chì u scopu di l’indipendenza, ch’ellu sia spartutu o nò, raprisenta quantunque – è in igna locu - una sfida tamanta.

Imagine (falsa!) tratta di u ducumentariu Greenland Year Zero

Crisa ecunomica è diversità di l’indipendentismi


Crisa ecunomica è diversità di l’indipendentismi

A seguita : Nant’à chì sbuccheranu st’indipendentismi ? [Da leghje quì]url: http://xfru.it/fFR31X

St'articulu hè statu traduttu nant'à u situ Ampargu a lingua corsa.

u 9 di Dicembre 2014
Nant'à Twitter : @AndreFazi



1.mandatu da Ghjuvanluca u 10/12/2014 09:33
Bellu Articulu.
In Siintesi (ù mio pinzeru),quellu chi ferma è chi :oghjie ,ù prugettu politicu indipendentista duveria esse strintamenti ligatu a quellu ecunomicu. A' Crisa a portatu i bisogni ecunomici sopra a quelli ideulogici. Eccu custì chi u pugettu è forte in quei lochi induv'è anche forte l'offerta ecunomica di ù prugettu stessu(Catalunia,Scozia).Di quessa ,a pulitica duvrà tene contu avà e in l'avvene. Altru impurtente puntu è l'unità di ì muvimenti indipendentisti chi partecipanu à l'ilizioni pulitiche e amministrative; L'elettori sò pratichi, e ùn capiscenu micca ù perchè di è divisioni su l'istessa idea di fondu.
VA DETTA POI CHI à qualità di a CLASSE PULITICA ,DUVERIA ESSE SCELTA ATTENTAMENTE e in cù pigliu respunsevule.
Tempi duri.

Novu cumentu :