Accueil
Envoyer à un ami
Version imprimable
Partager

Cumu riesce un selfie endèmicu ?

S'è vo ùn vi site micca accecati pruvendu à fà un selfie u ghjornu di l'ecclissa, eccu unepochi di cunsigli per riesce un selfie chì sia veramente endèmicu è chì permettessi à u mondu sanu di sapè ch'è vo site in Corsica.



Prima di tuttu, ci vole à muniscesi d'un « selfie stick » chjamatu steccu à selfie in Corsica (u megliu seria di truvàne unu in legnu castagninu o olivinu).
Cumu riesce un selfie endèmicu ?

Dopu ci vole à postàssi in un locu ùnicu.

1. In Ponte Novu

Ghjè u più faciule : tenitivi degnu/a è sticchitu/a davanti à a croce di u ricordu. Attenti chì ci sò villà assai goffe ind'u vicinatu chì ponu guastà a fottò.
Cumu riesce un selfie endèmicu ?

2. À l'entrata d'un paese arradicatu è inalpellatu, davant'à u pannellu

Fughjite i nomi sfrancizati (Tox, Vix, Sainte Marie de...), è verificate ch'elli si vidissinu bè i impatti di palle di fucile.


3. À a marina

E marine di u pianeta sò tutte listesse (rena è acqua, per u più), pè incursì a vostra fottò averete bisognu di qualchì accessoriu. Sminticate e serviette « testa mora » ci n'hè per ogni locu. Pruvate piuttostu una barretta « Scontri di u porcu nustrale », tenite in manu una bierra « A machjaghjola » (mustrate bè l'etichetta), fate casu ch'ella ci sia una banda di vacche in fondu è chì a paillote si chjamassi « u stazzu » o « u tazzu » s'ella sì pò ballà è intastàssi.

Cumu riesce un selfie endèmicu ?

4. In muntagna

Rammintatevi chì fora di u Paglia Orba, e muntagne di u mondu sò tutte listesse (scoglii, pumataghji è pini).Pè guarantì l'orìgine di u vostru ritrattu, stracquatevi mezu à piante chè si trovanu solu in Còrsica è tenite in manu un batracu o un serpu endèmicu. Serebbe megliu, di siguru, ch'ella ci fussi daretu à voi una mufra indumevule o un'acula pisticcina (s'ella ùn hè ancu sparrita).

S'è vo avete un telefunu nustrale, un telefunu di l'estremu o un steccu à selfie abbastanza longu pruvate u classicu : casgiu merzu + pane è cultella + eiu.

5. In cità

Truvate una statula di Pasquale Paoli è basta. U locu hè sacru : short arrabiati, glaquette di cugnatacci, T.Shirt Nicki Minaj o « I love Portovek » sò pruibiti.

6. U selfie nustralissimu (raru)

S'è vo infattate cantadori salvatichi incu i Meindl, a manu à l'orechja, à mezu à e filette, vicinu à una surghjente, cappiatevi. A scena hè abbastanza tìpica soprattuttu s'ellu ci hè un cursinu chì ghjace. Pudete cantà ancu voi. I selfie sò muti.

7. Bonus-track

S'è vo fate un selfie di gruppu, un « usie » cum'è si dice (micca un uzi !) verificate chì unu omancu di i/e vostri/e amichi/e ebbe un tattù « Natu per soffre », un t-shirt « Ùn simu micca zucche » o megliu un t-shirt di A Piazzetta.

Sò e parolle corse chì a li sciaccanu.

u 24 di Maghju 2015
Zenbucucciu



1.mandatu da guerrini u 24/05/2015 19:33
Sò nucente cum'è l'acqua , ma chì robba hè issu selfie?

2.mandatu da sardu u 24/05/2015 22:36 (da un teleffuninu)
Una merda

3.mandatu da sardu u 24/05/2015 22:37 (da un teleffuninu)
Chi credunu d avia invintatu l americani

4.mandatu da Azezu rancicu u 25/05/2015 17:38
Ma quantu hè goffa a faccia da "selfie"!

Novu cumentu :