Accueil
Envoyer à un ami
Version imprimable
Partager

Di chì cumplessu si tratta o sgiò duttò ?

O cumu cumpurtassi per parè rispittevuli di pettu à u « pinsà bè » à modu francese ?



À i media francesi s’ellu ùn hè per tuccane duie parolle à a sera à « Tout le Sport », i cumpurtamenti razzisti schjetti o i saluti à a gloria di stu puzzapè d’Hitler, ùn li garbanu tantu.

Ma da chì si tratta di u Sporting, l’affare pò piace, è ancu purtalli à scatinassi.

Senza cascà in a vittimizazione, ùn si pò dì ch’ella sia qualcosa chè no scuprimu avale, trà u « Carrughju drì » à l’ « affare Chimbonda », a c’avianu ghjà fatta !

Tandu ùn ci n’hè più chì per sti Corsi, oghji razzisti dopu ad esse stati corcii, vili è vigliacchi (chì ghjè colpa nostra s’elli anu persu per Sedan, Verdun o ancu puru in quella sera di l’82 in Sevilla), banditi è maffiosi !

Eppò a si provanu ad intellettualizà l’affare ! L’hà detta Carlier à France 2 Foot : “Sti mulizzi si sò ghjuvati d’una insulta aduprata assai ind’i stadii per piattà è tramandà u so missaghju razzistu da veru” !... È ci sciaccanu in più l’umufubbia… è di a LICRA noi ùn ne vulemu…ecc, ecc…


Bastia capitale aurupea di u ricusu di l’altru

Stu striscione cascava à tappu per l’intelligenzia parigina : ancu s’ellu ùn c’hè un suppulu di razzisimu ind’è u so cuntinutu, sò quantunque ghjunti à fanne l’offesa strema à u cusidettu umanisimu francese chì a Lica di ballò si vole d’incarnà.

S’hè cusì svigliatu un battaglione di ghjurnalisti, d’associi anti razzisti è di capizzoni di e stituzioni di u ballò à u livellu francese è aurupeu per spiicà à a ghjente chì u prublema ghjera Bastia è i so sustenidori.

A disinfurmazione hè viaghjata per u megliu. Per fà nice d’argumintà c’anu fattu un imbuleghju trimende. S’hè riparlatu di Chimbonda ancu s’ellu hè statu messu in risaltu chì u tippu hè un piantapuzza di prufissione è chì i ghjucadori bastiacci ci dicenu ch’ellu s’era à l’epica invintatu tuttu è chì l’accuse di razzisimu ùn valianu nunda.

In diretta nantu à a televisione publica francese, ci casca cume u casgiu nantu à e lasagne, un missaghju di a LICRA, chì s’indegna di l’attitudine di a squadra bastiaccia. Saria a sola di Francia è di Navarra à ùn aiutalla micca in a so santa cruciata contru à u razzisimu è… l’antisemitisimu, chì à credene u so nome ùn saria micca à stessa affare, o di a stessa impurtanza.

Infine, Michele Platini, prisidente di l’UEFA cunsidera di più grave u striscione contru à Kébé in Bastia chè l’affari accaduti in Metz, vale à dì insulte caratterizate, canti è gesti à a gloria di u terzu Reich tedescu…


In Corsica dinù : « runcata » generale !

Avariamu pussutu pinsà ch’in Corsica e riazzioni sianu state più riflittute è l’analise più raziunali. Manc’appena !

Dirigenti è ghjurnalisti sò partuti tutti, pigliendusi per a manu, in pelegrinaghju per Canossa.

Fù una bella suttumissione generale à u discorsu ufficiale nanzu chì pocu à pocu sottu à l’influenza soprattuttu di i sustenidori cumincionu à rilativizà l’affare… per una parte…

I sustenidori anu pigliatu u contu : imbecili, ghjente chì si n’impippa di u Sporting è ch’ùn hà mai fattu nulla per ellu (!) ecc…

Nimu o guasgi per ricunnosce chì u striscione s’ellu era insultante (eppò ghjera u scopu) ùn t’avia nulla nè di razzistu nè d’umofobbu ; nimu o guasgi per ramintà ch’ùn c’hè nisuna certitudine in quantu à l’affare Kébé I è chì i pochi sustenidori di a spalluzzera prisenti anu nigatu l’accuse ; nimu o guasgi per mette e stituzioni di u ballò di pettu a e so rispunsabiltà : elle chì sciaccamanavanu à u ritiru di puntu à Bastia è chì finu ad avale ùn si sò più intese. I soli atti razzisti d’Auropa vinarianu dunque da Bastia ? Chjibba !

E cumunicazioni di Bastia 1905 è di l’anziani Testa Mora avaranu chjarificatu l’affare è ghjè una bona. Ma ferma à i media corsi à pruvà di staccassi di u pinsà parigginu, è a lampà à u sprufondu ogni cumplessu, di u culunizatu o di u « pinsà bè ».

Di e volte, invece di vulè « fà tace i sumeri » cum’è dettu in l’ultimu numaru di u sittimanale Arritti è chì traduce per u megliu u parè di a maiò parte di i media corsi, saria megliu di piantà cum’ellu dice u francese d’ « hurler avec les loups ».

À quelli, è per stà in l’animalescu, li ramintemu chì « i ronchi di sumeri ùn collanu un celu ».

u 2ndu di Marzu 2008
Mazzone



1.mandatu da GWM u 02/03/2008 22:19
iè...allora chi fà ?

2.mandatu da estrimei u 02/03/2008 22:26
un so micca un passiunatu di ghjocu à ballo e di sicuru un piacera so ch'o dicu,ma mi pare chi a Corsica 'un ha bisognu di squadre prufeziunale: per a majo parte i ghjucatori 'un so micca corsi e ch'omu vinca o ch'omu perdi benefizii un ci n'he.so ancu un contr'esempiu per a giuventu.

3.mandatu da Mazzone u 03/03/2008 12:32
Hè verità, ma sè no pigliemu a tracunnisciuta squadra di u Barça, si vede chì c'hè una idintificazione forte di a sucietà catalana a sta stituzione. Hè ancu l'incarnazione di a Nazione catalana... senza mancu un catalanu chì ci ghjoca (o guasgi...).
Hè vera ch'a stu contu quì preferiscu a pulitica spurtiva di Bilbao ch'ùn face ghjucà cà baschi.
Postu chì l'unu è l'altru ùn ponu cunvene : nimu ùn vole di squadra senza corsi, è si pò cuncipì difficilmente una squadra cumposta solu di corsi.
Tandu sarà pussbule di pruvà à cuncilià e duie uzzioni ?

Sorte di u sughjettu di l'articulu ma e quistione d'impurtanza.
Avale tocca à media libari cum'è a piccula piazzetta à mette in risaltu e cuntradizioni di i gran gruppi francesi è ancu puru ghjurnali corsi chì si lacanu piglià da u sinsaziunale è u "pinsà bè"...

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta