Dopu à u .com u .corsica ?

Ci sò state 1930 dumande di "nomi di duminii" nove. Sin'avà eranu abbastanza pochi.

Cunniscite u "puntu com", u "puntu net", u "puntu org"... ci serà forse da quì à pocu u "puntu corsica".

Hè un organisimu americanu, l'Icann, chì s'occupa di quessa. Nant'à u so situ si pò vede e dumande di nomi novi. Costa piuttostu caru : 185 000 dòllari !

Micca tuttu ognunu puderà cumprassi u nome di u so paese. Imaginate un situ chì finisce in .venacu, in .linguizzetta o in .casalabriva...

E dumande venenenu sopr'à tuttu da e grosse sucetà. L'Oréal hà fattu dumande pè 14 nomi (.loreal, .garnier ecc...). Ma ci hè dinù u .pizza, u .bzh pè a Brittania, u .paris, .alsace...

L'interessu hè di dà una visibilità à un indirizzu internet. Bon, hè sopr'à tuttu un affare di marketing è di publicità. Avete da vede, anu da fiurisce l'indirizzi cum'è camping.corsica, hotels.corsica, charcuterie.corsica, lonzu.corsica ecc...

Risposta in u 2013 pè sapè sì a dumanda serà accettata da l'Icann. È s'è no puderemu vede l'indirizzi www.residence-secondaire.corsica, www.achetez-facile.corsica è www.speculation-immobiliere.corsica.