Accueil
Envoyer à un ami
Version imprimable
Partager

E "cougar" attaccanu

Si chjamanu "cougar" e donne trà 35 è 50 anni chì si cercanu giovani maschji d'almenu 10 anni di menu ch'è elle. Sortenu, beienu è draganu senza cumplessi. U fenòmenu ghjunghje in Corsica.



E "cougar" attaccanu
Cunnisciate u "cougar", sapete st'animale salvàticu, una spezia di puma. U "cougar" hè bunissimu predatore, sempre in ricerca di carne fresca ch'ella caccighjeghja a notte.

Ma noi trattemu di qualcosa d'astru. Ancu chì...

U cuncettu di a "donna cougar" hè ghjuntu in i media qualchì mese fà.

L'idea : a "cougar" (diceremu a cugara in corsu) hè una donna trà 35 è 50 anni, predatrice d'un omu più giovanu ch'è ella (almenu 10 anni di differenza).

A cugara hè una donna attiva, spessu divurziata, è indipendente finanziarmente.

Hà riesciutu a so vita prufessiunale. Si ritrova à posti impurtanti. Hè eletta, capu d'impresa o d'amministrazione.

Si n'impippa di a so età ma face attenzione à u look è ùn hà micca cumplessi. Sorte, beie, draga, beie torna è face a night anch'ella per seduce i giuvanotti.

L'idea avia principiatu cù e serie TV Sex and the city, Desperate Housewives. L'Americani n'anu fattu una seria Cougar Town cun Courteney Cox.

Sìmbuli di a donna cugara : Madonna è u so "toy boy" (30 anni di sferenza), Liz Taylor (u so nuvesimu maritu hà 30 anni di menu), Demi Moore è u so maritu Ashton Kutchern in Francia Claire Chazal (53 anni, cun Arnaud Lemaire 33 anni).

Puntu cumunu trà tutti sti "toy boy" : un corpu musculatu, un look d'adulescente è di siguru i sempiterni capelli ciuffuti cù a "mescia"...

Nanzu piattati è vergugnosi, sti coppii facenu avà a prima pàgina di i giurnali pippol.

I so lochi di caccia preferiti : a cugara giranduleghja ogni ghjorni è à tutte l'ore. Tutti i mezi sò boni per attaccà.

In Corsica a ritruvemu in i lochi à a moda (bars, resto, permanenze eletturale...) è mette i so ritratti nant'à Facebook. À l'apero caccighjeghja nant'à a Piazza Santi Niculà o à u LVP, sorte à L'Idéal è à u Zanzibar per mette a so buttiglia di Canarelli biancu o di Clos Teddi.

A cugara corsa face u so Power Plate à la salle. Viaghja in RAV4, in Smart o in Mini Cooper.

Aspetta l'apertura di l'Acapulco, di Via Notte ma dinù di tutte e cunnerie di l'estate : Porto Latino, Calvi on the Rocks, Festivale di a ghitarra di Patrimoniu...

È in Corsica ? Quale sò d'appressu à voi, ste cugare pronte à attaccà à ogni mumentu ?

E "cougar" attaccanu

u 15 d'Aprile 2010
Dea di u Mercà



1.mandatu da So eiu u 15/04/2010 07:32
Ci vole a dalli!!! Eiu so prontu

2.mandatu da Ghjuvan'Andria della Scagliola u 15/04/2010 12:15
Beuh, l'ultimi "Cougar" ch'o mi sò chjappu eranu quelli lance-grenade di i CRS. Queste quì e cugare e mi pigliu vulinteri in pettu !

3.mandatu da Tont'e Finu u 15/04/2010 16:46
Poca nutizia ! Face una bella stonda chi mi sò fattu manghjà !

4.mandatu da BBC u 15/04/2010 18:37
in aiacciu ci hè a cunsigliera generale è cunsigliera territuriale R......... chì si tene un giuvanotu. Dopu tuttu s'è no semu pà a parità è l'ugualità ghjè una cosa NATURALE di vede donne più chè fatte, cù i soldi, vulè giuvanoti freschi è tenneri.
L'omi sò centinai d'anni ch'elli a facenu.

5.mandatu da anto u 15/04/2010 21:07
Tempi fa si chjamavanu o pesci di fondu o cum'ellu dice u pinzutu :GPS (grosse pétasse siliconée ) e attenzione perchè si ponu piglia è maladiè dunque ,sempre cum'ellu si dice in Francia "si tu tire un coup gare !

6.mandatu da Spaventu u 16/04/2010 00:33
Marina Raibaldi???
Stéphanie Grimaldi???
ANNE MARIE NATALI!!!

7.mandatu da puma u 16/04/2010 11:13
Jocelyne Fazy?
Geneviève Moindrot?
Pascale Paumier??
Zittu zittu lasciemu corre

8.mandatu da Andria Pacou u 16/04/2010 18:51
Paul Giacobbi ?

9.mandatu da gay pard u 16/04/2010 18:53
Fanfan Vendasi?

10.mandatu da Andria Micca colpi.. u 16/04/2010 21:02
U merre di Marseglia..??

11.mandatu da Mala u 17/04/2010 01:20
Anto, è i masci di 50 o 60 anni chi si mettenu cun giovanotte, cume i chjami ? GPL ? Gros Pervers Libidineux ? Un annu micca maladie, po dassi ?
Demi Moore è Ashton Kutcher annu 15 anni di differenzia solamente, quantu cunniscite di masci chi annu 15 anni di piu chè a so moglia ? Tanti !

12.mandatu da malissima u 17/04/2010 09:45
brava o mala

13.mandatu da ghjuvan'paulu u 17/04/2010 16:53
un picculu rimpròveru, ùn si dice micca : " riesciutu a so vita prufessiunale" ma : " riesciutu in a so vita prufessiunale"...
U verbu riesce ùn si cungiunghje micca cù l'ausiliariu avè ma cum l'ausiliariu esse !

14.mandatu da Limpia u 17/04/2010 21:25
Eccu O Ghjuvan'Pà' ! Si pò dì chi tù, hai trovu i discorsi per fà fughje i Cougar (è tutte l'altre dinò...) ! lol

15.mandatu da ghjuvanpaulu II u 17/04/2010 23:59
dui picculi rimprovari, ùn si dice micca "prufessiunale" ma prufiziunale, è ùn si dice micca " ùn si cungiunghje micca" ma ùn si cunghjucheghja micca" .

Pensu dinò chì u verbu riesce si pò cunghjucà cù esse o avè sigondu ciò ch'omu vole dì:

Sò riesciutu à u bascigliè
Aghju riesciutu a me suppa

Dunque pensu chì "Hà riesciutu a so vita prufiziunale " hè ghjustu.
Cum'è "Hè riesciutu in la so vita prufiziunale".

Ciò chì conta hè ciò chì vene dopu: ditarminante (a) o prepusizione (à,in).

16.mandatu da ghjuvanpaulu III u 18/04/2010 11:15
nò, prufiziunale, nò. Prufessione face prufessiunale o prufissiunale, micca z

17.mandatu da Ghjustizia Ultrasbastiaccia u 18/04/2010 12:00
Cum'ellu dicia l'altru (in francese) : "Mais, dis moi ? Tu stampes un peu ?"

18.mandatu da volpe u 18/04/2010 20:45
cugara? cugara ghjè pè l'americani, so LOVIE indè noi !
s'elle so cugare,noi simu accaniti... attenti !!

19.mandatu da Peggy A Luviona u 18/04/2010 21:20
Qual'hè chi mi chjama qui ?

20.mandatu da Polo u 06/05/2010 19:10
Aghju lettu l articulu nanta i muvrini,e trovu chi site stati belli bravi, ci vole a fa qualchi tagliata piu fine, piu spiritosa pè u grupu di i pinzutti
a prestu e cuntinuate a facci rie...

Novu cumentu :