Accueil
Envoyer à un ami
Version imprimable
Partager

È dicenu chì Lupinu hè goffu...

Si cunnosce u disprezzu per quelli chì stanu in stu grande quartieru pupulare di Bastia. Quand'ellu si dice "Lupinaghju", hè rara ch'ellu sia detta di manera pusitiva è fora di i casali è di l'HLM, ùn si ritene nunda. Saria ora di vedelu astrimenti. U Lupinu hè dinù un fiume piattatu è smintincatu, ma purtantu hè cusì bellu...



In Bastia, ci sò duie cità : Bastia (da Toga à San Ghjisè) à u nordu, è à meziornu i quartieri pupulari (Lupinu, Paese Novu, Montesoru) chì cuncentranu a magiurità di l'abitanti.

Ste duie cità si giranu u spinu. À Bastia u prestigiu di a cità storica, di i munumenti, i belli lochi, i caffè à a moda, i cummerci di lussu, di i palazzi di l'epica ghjenuvese, di e numerose chjese è cappelle di stile baroccu.

À "l'altra" cità u disprezzu : si parla di "lupinaghji", i Bastiacci di u centru ùn vanu mai in Lupinu (ch'elli ùn cunnoscenu micca).

Purtantu Lupinu hà dinù una storia è un passatu ch'ellu saria ora di vede altrimenti. Passatu San Ghjisè c'eranu i giardini chì l'urbanizazione di l'anni 60 hà sguassatu.

Ferma sempre qualchì traccia di stu passatu : quì un fornu à calcina, quallà un'aghja, un palmentu, una casetta, un mulinu, una funtana, una muraglietta in petra... Basta à apre l'ochji.


Pezzu di u Plan Terrier
Pezzu di u Plan Terrier

Ma oghje interessemuci à u fiume. Perchè à l'orìgine "Lupinu" era u nome di u fiume chì nasce nant'à e pendite di u Pignu è chì si lampa in mare nant'à ciò si chjama avà u "Front de mer".

Quale sà chì nant'à stu fiume c'eranu nove mulini ?
È dicenu chì Lupinu hè goffu...

Sò appena piattati, ma ci sò sempre...


I scalini per andà à un mulinu sott'à A Falcunaghja :
È dicenu chì Lupinu hè goffu...

È sì oghje ci hè più cimentu ch'è machja (ben ch'ellu sia sempre u nome di locu di "U Machjò..."), fermanu sempre lochi induve u fiume pare avè tenutu u so aspettu naturale.
È dicenu chì Lupinu hè goffu...

Ùn pare micca, ma simu quì in piena cità...
È dicenu chì Lupinu hè goffu...

In ste pozze i sgaiuffi bastiacci si ciuttavanu...
È dicenu chì Lupinu hè goffu...


D'accordu ci vuleria à puliscelu appena. Ma ùn saria bè di prutege è di mette in valore sti lochi ?
È dicenu chì Lupinu hè goffu...

Ci hè un pezzu di Bastia chì s'assumiglia (appena) à a Ristonica.

A sapiate ch'elli si ponu truvà castagni in Bastia ? Si trovanu in Lupinu, vicini di a gara di u Chjichju.

Toccu u mese di ghjugnu, sò intramati è si portanu ancu megliu ch'è quelli di Castagniccia...


Tutti i Bastiacci ùn a sanu micca, ma Bastia hè bella. È in Lupinu ci saria tanti lochi à mette in valore è priservà.

Ferma un travaglione di memoria à fà. Ma hè dinù una quistione di rispettu per quelli chì campanu quì. Saria una bona di rendeli i so lochi, è appena di fiertà.

Aiò chì Lupinu hè bellu !
È dicenu chì Lupinu hè goffu...


Signalateci puru s'elli ci sò sbagli, o precisioni da aghjustà.

S'ella v'interessa...

Per cuntinuvà :

Una carta di i chjassi di Bastia

I chjassi di Bastia

Publicatu pè a prima volta u 21/03/2017
Aghjurnatu u 25/03/2019

u 25 di Marzu 2019



1.mandatu da Ghjunghjiticcia u 11/08/2017 08:51
Piccatu, sò troppu luntana da Bastia usinnò avariu suvitatu tutti sti chjassi cù piacè.

Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta