Accueil
Envoyer à un ami
Version imprimable
Partager

È noi, yes we can?

Mentre u mondu sanu saluta a presa di putere di Barrack Obama in America, a Corsica s'interrugheghja sempre...



È noi, yes we can?
Bernard Madoff, un fratellu?
Dopu u "miraculu" culturale di u sittanta, hè ghjuntu u disincantu di u novanta. A scumessa per a Corsica hè di sapè s'è a nostra generazione depressione di i 20-40 anni a farà à girà sta pagina, à mubilizà si è à mette in ballu un prugettu cullettivu sicuramente altru chè u PADDUC. Più chè a mubilisazione di u fronte contru à i sbaglii, e pazzie è i micchi macchi di stu prugettu è e minaccie di u FLNC, hè a crisa mundiale chì hà seppelitu stu prugettu. Paradossu supremu, sò i più capitalisti chì anu decredibilizatu a filusufia di stu cartulare. U troppu stroppia...

Un granu chì more, hè un granu chì sumena...
Ciò ch'omu aspetta, hè un rinnovu di i pulitichi. Dipoi u sittanta, u mondu hà giratu 15000 volte ma u paisaghju puliticu ferma sempre u listessu. Allora sì, ancu puru s'è a piramida isulana di l'età hè à capu in ghjò, una di e scumesse, serà a capacità di e varie furmazione pulitiche à azzicà l'impegnu di a ghjuventù. U parcu puliticu hè cambiatu pocu è u cuntrastu ideulogicu natu dopu a publicazione di u rapportu di l'Hudson hè turnatu listessu incù u prugettu di PADDUC. À chì si cerca una leghjittimità ind'è i fundamentali di u naziunalisimu, à chì a si la busca in quelli republicani, senza avvede si ne chì l'isula hè stata trasfurmata, chì dipoi 30 anni, à vulè la o à ùn vulè la, l'Europa s'hè custruita è, senza parlà di periculu giallu, u sviluppu di a China è di i tigri asiatichi hè un veru new deal, ancu per noi. Invece di guardà a luna, fighjemu u ditucciu...

A fine di i lamenti?
Mentre u mondu si sfoca incù a vittoria d'Obama, ci tocca oghje ghjornu à mette e mani in pasta. Basterà a biatitudine, quasi generale in pettu à i ciffri di a demugrafia, per inghjennà un sviluppu ecunomicu? Basteranu e critiche in pettu à u Padduc per inizià un alternativa? Basteranu l'incantazione nant'à l'integrazione per dà i mezi à i scalati di cunosce, di capisce a Corsica è via, d'esse corsi? Sicuramente nò... In tantu, nascenu l'azzuffi.

Una squadra, un metudu è un prugettu...
A Corsica abbisogna d'addunisce e so cumpetenze. Un partitu solu ùn la farà à piglià u putere. A feremu à travaglià inseme per una Corsica libera? A feremu à tace e lite persunale è à unisce ci daretu à un veru leader? Aiò chì l'anu fatta ancu l'Americani! Ramintemu ci quandu i fighjavanu, à l'epica di Bush, incù un ochju paternalistu... L'America hè cum'è a Corsica. Hà u megliu cum'è u peghju... Yes, we can! Basta à crede ci!

U New Deal?
L'elezzioni territuriali di u 2010 saranu una girata per a Corsica. À tutti i piani, culturali, linguistichi, ecunomichi, suciali, ambientali, u prugettu sceltu da i Corsi scambierà a faccia di l'isula è a so vita per i 25 o 30 anni à vene. Cum'ella a dice a canzona, "ùn ci hè più riscattu"... Speremu chì u rinnovu di l'omi s'accumpagni d'un accostu glubale di i prublemi è d'una mudernisazione di e suluzione...

Altrimente, invece d'impaghjellà, senteremu voceri è murtorii.

u 20 di Ghjenaghju 2009
Ahmed Zumar



1.mandatu da barakobama u 20/01/2009 13:59
Ma qale serà u vostru LEADER ? Angelini, NO. Simeoni, NO. Talamoni,NO.Mondoloni, NO Per mè pensu chi un certu Ahmed Zumar seria quellu à appacià è à mette à tutti à u passu, sopr'à tuttu chi l'anilisi ch'ellu face so più chè bone è ben viste, FORZA O AHMED chi u populu corsu ti fideghja IE ANCU NOI PUDEMU!!

2.mandatu da Piratella u 20/01/2009 17:28


Iè Ahmed Presidente!! A Piazzetta à l'Assemblea! Lingua corsa ufficiale!

Vodka è lasagne per tutti!

iè we campemu

3.mandatu da Un elettore u 20/01/2009 19:52
Hè vera ! Cio che no lighjemu nant'à piazzetta hè cio chi pensemu quasgi tutti. U megliu saria dunque Ahmed Zumar (chi ghj'hè issa casata Zumar ? Persana ? ).

Ahmed votu pè te. Ma t'aghju qualcosa da dumandati. So avà funziunariu sù u cuntinente (pè disgrazia), è vurria uttene una mutazione pè vulltamene in Corsica : mi poi aiutà ? Mi poi cuntattà à l'indirizzu che t'aghju lasciatu. L'affare hè seriu. Permetteria di fà cresce a pupulazione corsa senza risicu di culunizzazione.

Ahmed, yes you can !

4.mandatu da bastiacciu u 21/01/2009 05:58
Ié, la ci femu !

5.mandatu da site u cucinu di omar mollah ? u 13/02/2009 22:49
ie ahmed de neuhof rè di i corsi
ma chI diventera u so cuccinu omar mollah
omar m'ha tombu cu a salciccia corsa fatta cu i porchi chinesi
elezzione di 2010 saria cume l'elezzione di 1910 L'AVENTURA CLANISTA
tandu cum'ella dicia a mo minnana e megliu u sbarcamentu di i russi in corsica

Novu cumentu :