Accueil
Envoyer à un ami
Version imprimable
Partager

E scimie avanzanu, l'omi beienu



E scimie avanzanu, l'omi beienu
A saperete avà, noi altri di A Piazzetta, simu spessu impenseriti.

L’altru eri, pè cambià appena l’idee (è postu ch’ellu c'era stu calore di u Diavule), tutta a squadra di u blog hà decisu d’andà à u sinemà per fidighjà un filmu catastrofa, cum’è i Mericani ne sanu fà tantu è tantu. Era un bellu spetaculu : Rise of the Planet of the Apes, chì si puderebbe traduce à la lestra “A mossa di u pianeta di e scimie”.

À principiu, sò simpatichelli, quelli animalotti, ricchi di spressioni umane. Ma dopu, per via di una medicina chì face cresce l’ingeniu è u ghjudiziu, s’annerbanu è sciappanu tuttu è tutti. È ghjè l’invasione.

Sta volta, ùn si tratta micca di i Pinzuti, di l’Arabi o di i Chinesi. A minaccia nova sò e scimie. Un nimicu di più pè l’industria di u filmu, diceriste. U prublema hè chì forse l’affari incù e scimie so digià in francese (tandu, ùn sapemu micca sì e scimie parlanu francese, pò esse). Vulemu dì chì e scimie anu principiatu à richjappà u so pretesu ritardu :

- Pochi mesi fà, una scimia hà riesciutu à pigliassi in fottò
- Una altra hà pigliatu à mitragliate parechji suldati in Africa à colpi d’AK-47
- In stu ducumentariu Ape Genius , ci prisentanu Koko, un gurillu di 120 kg chì parla a lingua di i segni, Azy, un urangutanu chì risolve prublemi di matematica è ancu Kanzi, chì capisce 3000 parolle d’inglese.

Allora, a fine per l’umani ? Per avà, mancu. Un sapiente spezialistu di i primati ci permette di spenseracci ; segondu ellu, ùn risichemu nunda di e scimie perchè malgradu e so qualità, anu parechji difetti spiumbati : ùn anu nisunu sensu di a cumunità, sò ghjelosi trà d'elli, si lacanu purtà da i so affetti, sò viulenti, impulsivi è vinditteri.

Hè vera, nunda à chì vede incù l’umani, simu salvi !

u 14 di Sittembre 2011
BOBZ



1.mandatu da Scimia u 15/09/2011 11:31
Face un pezzu chè no sapemu chì e scimie sò inteligente, parechje volte sò elle chì cunducenu e vitture par purtaci in casa dapu à una sborgna

2.mandatu da campana u 15/09/2011 11:55
A me m"hannu dettu chi ghjè una scimia chi ghjè patrona di a Piazzetta e face marchjà i corsi à a "baguetta" !
Un vole micca falla sapè cume certi corsi chi mettenu ghjente cume patroni ma un sò che omi di paglia.

3.mandatu da o scrianzat'malalevat' u 15/09/2011 12:09
ci vole à mefidassi u più di e scimie nere
pare ch'elle sò e più pessime

4.mandatu da ANTO u 15/09/2011 14:22
Cum'ellu dice Tavagna :attenti à schimia !

5.mandatu da barbebleue u 15/09/2011 16:53
ci vulerebbe à fà un articulu nanta e scimie corse chi facenu i filmi, chi si piglianu per artisti di sinemà, e chi si techjanu di "subventions"

cumu si dice "un nanard" in corsu ?

6.mandatu da u miumese u 17/09/2011 20:31
N'avemu digià una di scimia chì ci guverna : chjucu, sempra in traccia di move e spalle, dice tante cunnerie, di diritta, è chì pare tuttu un "chimpanzé". Ùn vidite micca ?

7.mandatu da estri toii u 17/09/2011 20:33
Currezzione

- Una altra hà pigliatu à mitragliettate parechji suldati in Africa à colpi d’AK-47
- In stu ducumentariu Ape Genius , ci prisentanu à Koko, un gurillu di 120 chg chì parla a lingua di i segni, à Azy, un urangutanu chì risolve prublemi di matematica è ancu à Kanzi, chì capisce 3000 parolle d’inglese.


Novu cumentu :