Accueil
Envoyer à un ami
Version imprimable
Partager

E scuse di l'Italia à a Libia. È a Francia?

L'hà fatta Mouammar à ottene e scuse di u Statu talianu per via di a culunisazione passata di a Libia da l'Italia. 31 anni, da u 1911 finu à u 1942... Ma quandu hè ch'ella s'hà da scusà a Francia?



Mouammar u Corsu
Mouammar u Corsu
In più di e scuse, u Statu talianu ci deve investisce 200 milioni di dollari ogni annu durante 25 anni... Allora si pesa quì è cullà qualchì voce per dumandà s'ella conta ancu ella di fà e so scuse, a Francia?

Ùn hè vera chì in pettu à l'Italia, a Francia, n'hà fattu tant'è più durante a culunisazione. Ùn parlemu mancu di u statutu di l'indigenu, in Algeria, o di a guerra d'Indochina...

È in Corsica?

Di fatti, pare cusì ma a Francia s'hè digià scusata per e so malfatte in Corsica... Hè u PEI, u richjappu di u ritardu storicu...

Finitu u trinichellu in panna o chì mette 5 ore per fà u tremendu Aiacciu-Bastia, finiti l'inguerni chjappi in a nivaghja di a foce di Vizzavona, finite e serate sott'à l'acquate in Furiani, finiti l'ingorghi à ogni paisolu o giratondu, trà Bastia è Purtivechju... Cusì dicianu, in u 2002... Cusì cridiamu...

In fine, grazia à u PEI, ci avemu cridutu à a bravezza di a Francia. Avà, saremu menu niscentri, ùn ci cridimu più!

Tucchemu u Jackpot è femu tombula!

Allora, invece d'aspettà e scuse di a patri di i diritti di u Principe Sarkozy, avemu da mandà lettere à i Vandali, i Grechi, i Rumani, u Papa, i Pisani, i Genuvesi, l'Inglesi, i pumataghji è ancu i pippoli, da ch'elli ci fianu e so scuse! Incù tanti invasori, dui soldi, ci l'avemu da tuccà, ùn hè?

Cusì ùn ci hè penseru, quandu grazia à u PADDUC averemu vindutu tutti i nostri terreni, puderemu vende ancu a nostra storia...

u 10 di Sittembre 2008
Sbanditu



1.mandatu da GWM u 10/09/2008 15:57
certi capelli...

2.mandatu da Stavroguine u 10/09/2008 19:40
L'Italia si pò scusà pà una simplicia raghjoni : cù tutti i so difetti ùn hè più u Statu fascistu chì si vulia custruiscia un imperu. Hè passata à altri affari.

A Francia di a sculunizazioni, inveci, ùn si pò micca scusà. Parchì hè firmata a stessa. Hà sculunizatu par via ch'era ubligata, è parchì si facia metta fora da l'Indoscina o l'Algeria à calci in culu. Ma u rigimu hè firmatu u stessu, a sucità hè firmata a stessa, u pinsà di l'elitti hè firmatu u stessu.

A Francia ùn si hè mai libarata da a so mistica di putenza imperialista, ed hè par quissa ch'ùn si pò scusà di nudda.

3.mandatu da Stavroguine u 10/09/2008 19:44
Dopu, i scusi di l'Italia mi parini quantunca beddi calculati.

Ani da invistiscia 200 millioni di dollari tutti l'anni, certu, ma quantu ani da pudè tuccà in ritornu ? Chì marcatu l'hà da essa apartu ?

Ùn credu mancu appena à a filantruppia d'un Berlusconi, eu, devi avè calchì vulpi suttu à tiddu...

Novu cumentu :