Accueil
Envoyer à un ami
Version imprimable
Partager

E tradizione corse di Natale d'oghje

Natale, una festa tradiziunale, di spartera è di famiglia. Face un bellu pezzu allora.



Ah e "tradizione corse di Natale" ! U so preseppiu, a famgilia unita chì si ritrova, u ceppu di Natale...

Iè ma quessa, era nanzu.

Imaginate chì un antropologu ghjunga per studia e tradizione corse di Natale di u 2014. Chì truveria ?

È cum'ellu ùn si trova mancu più un chjinchjì di farina pisticcina per fassi una spulendata, eccu ciò ch'ellu si puderia truvà.

1. U caddie pienu

L'elementu nùmeru unu di Natale ùn sò nè u preseppiu, nè e ghirlande, nè u ghjallicu decuratu, nè a bûche.

U caddie pienu face cumplettamente parte di e nostre tradizione nove. I tempii di a distribuzione ùn mancanu in Corsica è nimu a si puderà francà.

Attenti quantunque à a tratichjina.


2. U selfie à u rond-point

Bon l'avemu fattu tutti l'anni allora quist'annu ùn a feremu più. Ma dapoi anni è anni, e municipalità corse facenu macinà i so cerbelli per fà di i so giratoghji di Natali i più belli. In u 2009 aviamu fattu stu filmettu, in u 2012 un altru.

E gattive lingue diceranu chì i giratoghji di Natale sò u Disneyland di u poveru. I servizii di e municipalità dicenu chì hè una manera di purtà appena di magia di Natale è chì i zitelli sò felici.

In tutti i casi una cosa hè certa : u merre corsu di l'anni 2000 deve decurà u so giratoghju. S'ellu ùn face nunda, i so elettori diceranu ch'ellu hè ràncicu.

Eccu una vera tradizione corsa d'oghje.


Quist'annu, in Biguglia, anu fattu forte. U tema era "Vincentellu d'Istria di Natale hè u più forte è fracassa i 4x4".

E tradizione corse di Natale d'oghje

E tradizione corse di Natale d'oghje

Ritratti : France 3 Corse

Speremu ch'ellu ùn ci sia nunda di grave per quellu chì hà avutu l'accidente.

3. L'ochju

A sapete, e preghere di l'ochju s'amparanu a sera di Natale, à mezanotte. Hè cusì ch'ella si deve fà a trasmissione.

Bon, per avà ùn avemu ancu vistu publicità di stu gèneru :

E tradizione corse di Natale d'oghje

Ma c'emu da ghjunghje. Viderete !

Sin'à induve anderà u marketing identitariu ?

4. I rigali vinduti nant'à internet

Tutti l'anni crescenu. Passatu Papa Noël, i rigali chì ùn sò piaciuti sò messi in vendita nant'à eBay.

"Iè ma quessa hè un affari di pinzuti è noi ùn simu micca cusì !" Pensate appena... Survegliate e pagine corse di Le Bon Coin, Priceminister è eBay, viderete voi...

5. E decurazione

Tutte e municipalità facenu i sforzi per decurà. Cun più o menu successu.

E tradizione corse di Natale d'oghje

Ne vidite d'altre ? Aspettemu i vostri cummenti.

u 21 di Dicembre 2014



1.mandatu da sardu u 21/12/2014 22:24 (da un teleffuninu)
A farina pasticcina strangera...

2.mandatu da girandulò u 23/12/2014 14:07
Ci vole à prupona l'ultima photo pà u "salon de l'érotisme".. Ancu què hà da vena ind´e noi

Novu cumentu :