E videò di l'annata nant'à Youtube

Ci vulia bè un ghjornu o l'astru ricumpensà a ghjente chì mettenu in linea i so filmati nant'à Youtube o Dailymotion, è chì facenu spessu esempiu di creatività... è d'oziu.

Per vede tutti i vincitori di l'annata, andate à vede quì, ma eccu ciò ch'ellu ci vole à ritene...

Miglior filmatu creativu : u tetris umanu...

Ci vulia à pensalla... Hè un svizzeru chì l'hà fatta. Eccu u celebre ghjocu di puzzle induve sò l'omi chì rimpiazzanu i pixel...

Miglior filmatu musicale : in qualchì mese, stu tippu hè diventatu una star d'internet

16 millioni di persone anu vistu st'americanu cantà u so canzona, "Chocolate Rain", chì amenta u razzisimu. In qualchì mese, di leia in leia, partitu di nunda, cù a so unica camerà, a so voce è so talentu Tay Zonday hè diventatu una celebrità mundiale per via di Youtube.

Di chè fà sunnià Jean Cuiconi, Augustin Planet, è Hubert Tempête, nò ?

Miglior filmatu testimuniale : U match di u seculu : u derby di a savana

À vede : u scontru d'una banda di buffuli contr'à una banda di lioni è un coccodrillu...
Qual'hè chì hà da vince ?

Miglior filmatu puliticu : contr'à a guerra di civilizazioni

Una videò indiata contr'à a frattura trà Oriente è Occidente... Sariamu cusì differenti ?