Accueil
Envoyer à un ami
Version imprimable
Partager

Elezzione : a lege di u più forte



"Suspresa, vittoria storica, terramotu"

Sò numerose e parolle aduprate da mintuvà l'elezzione di i naziunalisti per e legislative.

Da Capicorsu à Bunifaziu, ùn si parla più ch'è di què.

"N'anu fattu trè, i naziunalisti. Anu ancu fattu cascà à Camille" si pò sente in ogni scornu di a Corsica.
Solu u circondu d'Aiacciu, ellu, ùn hè cascatu. Resiste quant'è "un village d'irréductibles gaulois". Ma aldilà di isse vittorie storiche è simboliche, à chì ne simu puliticamente in Corsica?


È unu


Una dinamica chì ùn hè ancu à piantà

I naziunalisti anu fattu tombula, ma nant'à i banchi di l'assemblea naziunale seranu forse ubligati à ghjucà à a china da passà u tempu.
Averanu pocu l'occasione di fassi sente, chì per parlà ci vole à custituisce un gruppu, è per cunstituisce un gruppu ci vole à esse 15 eletti.
Hà da esse cumplicata.

Ma st'elezzione era impurtantissima per elli.
Prima perchè ch'ella marca u principiu per l'elezzione territuriale di dicembre.
Eppo ghjera una manera di fà un test di pupularità dui anni dop'à avè presu u pudere à l'assemblea di Corsica.
È ciò chì si pò dì, ghjè chì a dinamica ùn hè ancu à piantà !

I sciffri ne testimognanu. Per u sicondu giru di l'elezzione legislative i candidati "Per a Corsica" anu ottenutu 54182 voti.

Vale à dì di più chì a lista "Per a Corsica" a u sicondu giru di l'elezzione territuriale (52839), allora chì sta volta i candidati naziunalisti eranu prisenti solu nant'à 3 circuscrizzione, è chì a participazione hè di più debbule.

Elezzione : a lege di u più forte

È dui

U muvimentu naziunale viaghja quant'è una multinaziunale

Allora i naziunalisti vinceranu forse e prossime elezzione territuriale perchè chì u muvimentu naziunale ùn hè micca duvintatu a prima forza pulitica di l'isula ma a SOLA forza pulitica di l'isula.

Colp'à a dinamica, colpa dinù à una mancanza di cuncurenza chì i partiti tradiziunali ùn si la sò fatta à adattà u so discorsu.
U muvimentu naziunale pare una fiumara chì si piglia tuttu, fendu trimà sin'à l'eletti chì sò in piazza dapoi seculi è seculi.
Chì da quì à trè anni ci seranu l'elezzione municipale.

I merri anu a scelta:
Sia raghjunghjenu l'andatura di a magiurità territuriale. Sia piglianu u risicu d'avè un candidatu naziunalistu nant'à a so cumuna.
È l'elezzione scorse anu mustratu chì qualsiasi u candidatu, basta ch'ellu fussi naziunalistu, per pudè vince in ogni locu. Ancu puru qualchissia chì ùn hà manc'appena di sperienza in pulitica. A saperà Camille de Rocca Serra.
È certi l'anu diggià capita, anu raghjuntu à u più prestu l'andatura. Eppuru parechji eranu falati à dui mani nant'à i naziunalisti sti pochi 50 anni.

U muvimentu naziunale viaghja quant'è una multinaziunale chì cumpreria piccule strutture per fà cresce a so intrapresa è fà sparisce a cuncurenza.

Cusì, ci puderemu truvà da quì a cinqu'anni cù una sola classa pulitica isulana. Quella à prò di l'autunumia cù, viaghja cù i so pedi, parechje ideulugie sfarente indrentu. Cum'ella hè u casu in Catalogna per esempiu.
Què sì chì puderia fà u pesu di pettu à Pariggi.

U cambiamentu pare in marchja.

Avà ferma à travaglià.

È trè

u 20 di Ghjugnu 2017
Fiumurbacciu


Novu cumentu :