Accueil
Envoyer à un ami
Version imprimable
Partager

Era ora : ùn hè più difesa di ghjucà incù a manghjusca

Ghjuntu l'inguernu (puru s'ellu hè tricaticciu) per sti paesi diserti, per ste piccule cità chì parenu addurmintate, si pò omu divertisce facilmente incù appena di spìritu è di galabatezza. Ci hè un ghjocu impurtaticciu chì puderia avè un certu successu.



Era ora : ùn hè più difesa di ghjucà incù a manghjusca
Si ghjoca piuttostu à bughju o di notte. Si po ghjucà in dui, in trè, in centu ma ci vole à fà parechje squadre (figlioli di tutte e mamme è di tutte e razze ponu participà).

Per terrenu di ghjocu, basta un' isula.

A regula hè semplice, ùn ci hè bisognu di pallò, pedine, carte o cubi : basta à ghjittà una bella parte d'un cibu tìpicu (fasgiuloni, cignale, cuscussu, baccalà, merguez, bortsch…) in un locu sceltu.

À u principiu, per esempiu, a squadra curtinese o quella di A Ghisunaccia ghjetta qualchì trippa di cignale in un locu di preghera musulmanu. Si pò imaghjinà a seguita.

Quandu ellu tocca à ellu, l'aversariu ficca una merguez in cima di u San Petrone. I Purtughesi dinù volenu ghjucà, ed eccu chì i fratelli di Ronaldo lampanu baccalà merzu in lavu di Melu. I Pulunesi rispondenu incù una suppa di bietarava chì arrussisce l'acqua di fiume Golu.

Ci campemu : ghjucà incù a nutritura ci rammenta a nostra cara zitellina.

I Rumani dinù elli, si sà ch'elli sò burlasconi, lampanu millaie di papanazzi (frittelle di casgiu frescu) in Furiani u ghjornu di a Nazione Corsa. I pinzuti scherzosiincoghjanu a statula di Pasquale Paoli incù rillettes du Mans è aligot de l'Aubrac.

I Taliani facenu cannelloni incù a bandera corsa. I Mericani hamburgerisanu i risturanti tradiziunali è i suscì stantareghjanu sopr'à u Paglia Orba. U ghjocu ci pare senza fine. 

U Bèlgicu Noël Godin, inspiratu da Laurel è Hardy avia inventatu l'attentatu pastizzeru è sfrumbulava e torte à a crema. Si sparghjenu avale l'attentati purcini è dumane l'attentati pizzaiuleschi, camembertacci, eccetera.

Ùn avemu micca finitu di ride.

u 20 di Ghjenaghju 2015
Zenbucucciu



1.mandatu da sardu u 20/01/2015 01:27 (da un teleffuninu)
Un aghju capitu micca esattamente cus'é quessa cosa...

2.mandatu da charly u 20/01/2015 07:53

3.mandatu da keurse u 20/01/2015 10:17
mi crepu di rise, l'affare dura dapoi un pezzu : si lampa risu à i matrimonii...

4.mandatu da sardu u 20/01/2015 14:14 (da un teleffuninu)
Grazie charly

5.mandatu da sardu u 20/01/2015 14:56 (da un teleffuninu)
Oh charly, chi centra a testa di cignale mozzatta contra u islam cù u ghjocu di banderole???

6.mandatu da aCiaccera u 22/01/2015 00:41
poveri animali, sempre vittimi di a cunneria umana

Novu cumentu :