Accueil
Envoyer à un ami
Version imprimable
Partager

Era un cinque di maghju...



Era un cinque di maghju...
Hè un bellu ghjornu di festa stu 5 di maghju di u 1992.

In Bastia l'estate hè ghjunta in avanzu. Face u caldu è ùn si parla chè di quessa. A frebba era digià cullata dapoi l'eliminazione di Toulouse, di Nizza in casa soia, è di Nancy.

A Corsica sana hè in Furiani pè sustene u chjuculettu Sporting chì hà riesciutu à alzassi sin'à a mezafinale di cuppa di Francia contr'à Marseglia. Semu cascati in l'anonimatu di la "Division 2" ma sta sera hè a nostra rivincita.

In cità sò bandere ogni locu, nant'à ogni vittura un frisgiu turchinu è biancu. Hè a moda tandu.

Hè un'ora. Più nimu pò aspettà. Andemu in Furiani. U bigliettu in Est, a tribuna a menu cara, costa 120 franchi. Ùn ci hè micca "demi-tarif". Ùn face nunda, hè l'OM, hè una mezafinale di cuppa. Semu in prima pagina di L'Equipe chì hà messu in tìtulu "Bastia-OM de feu". Ùn saperemu mai ciò ch'ella hè diventata a ricetta.

Sò duie ore, ci hè troppu mondu chì aspetta l'apertura di Furiani. E porte s'aprenu più prestu ch'è prevista. L'antica "Tribune Est" s'empie in quattr'è trè sette. Hè digià piena à tappu. L'attesa hà da esse longa.

Sò quattru ore. Face u caldu in "Est". Avemu fattu bè di vene prestu, a tribuna hè digià piena. Quelli chì ghjunghjenu avà i facenu cullà in cima di a "Nord", a tribuna custruita à posta pè u macciu.

Sò cinque ore. Ghjunghjenu Thierry Roland è Jean-Michel Larqué. Passeranu un bruttu mumentu.

Sò sett'ore è mezu avà. U stadiu sanu hè pienu à tappu. Ci sò stati l'azzuffi cù l'ultrà di l'OM, parchegiati da u cantu sud-ouest di u stadiu. Duranti un mese ci hè statu una pulèmica à u forum di RCFM per sapè s'elli avianu da avè biglietti per u macciu o nò. Finalmente sò quì.

Sò ottu ore menu un quartu. Ùn avemu micca vistu i ghjucadori entre, troppu fumigeni. I ghjucadori sò entrati pè u scaldamentu in un trostu d'infernu. Si pesa a nebbia, pocu à pocu i scupremu. Sò tutti quì : Mozer, Boli, Papin... Sò i campioni di Francia, finalisti annu passatu di a cuppa d'Auropa di i campioni, è noi ùn semu nunda. È ci sentimu più forti ch'è elli.

Più luntanu, sott'à a Ouest, si scaldanu i nostri : Mangione, Difraya, Valencony, Bianconi... Sapemu chì quandu Furiani hè cusì, l'altri ùn puderanu fà nunda. Mai più camperemu un'ambianza sìmile. Mancu Tapie pare tantu rassiguratu.

Sò ott'ore è diciottu. I Chjami Aghjalesi venenu di cantà unepoche di canzone chì anu fattu cresce torna appena di più l'ambianza. "Catena", "Populu Vivu"... era impressiunante cù tutte e bandere turchine è quelle bianche cù a testa di moru chì sventulavanu. Semu parechji à avè a carne pullina.

Sò ott'ore è vinti avà. Aspettemu. E duie squadre sò in i spugliatoghji. Chì dicerà René Exbrayat, l'intrenore di Bastia ? L'ambianza hè calata appena. U calmu nanz'à a timpesta. Aspettemu.

Era 24 anni fà.

Si sente un rimore inabituale. Cum'è un fischju d'una bomba chì si ne fala. Una parte di a tribuna pruvisoria stallata à posta pè a partita s'hè sprufundata. Era colma di ghjente. U core di a Corsica sana s'hè arrestatu di batte.

Avà, ùn ci hè più ch'è silenziu.

Era 24 anni fà. Hè u nostru dolu. Solu u nostru. Ci dicenu ch'ellu ùn hè micca quellu u futbol francese.


Publicatu a prima volta u 05/05/2014

u 5 di Maghju 2016



1.mandatu da Guelfucci u 05/05/2014 08:43 (da un teleffuninu)
È dipoi una stonda ci dicianu:" ne tapez pas des pieds pour des raisons de sécurité"... È noi cuntenti chè no eramu di participà à sta festa tamanta ci ne ridiamu, aspettendu u Diu vi salvi Regina di i chjami ....l''aspettavamu tantu.... Ma.......

2.mandatu da sardu u 05/05/2014 12:12
un grande abbraziu a tutte e famiglie di sti poveri zitelli...so commossu leghjendu quessa storia,ghja i bastiacci so presi di mira è ci mancava puru a catastrofi a fermavvi...un arendetevi MAI!

3.mandatu da guerrini u 05/05/2014 18:58
Cumu hè chì vo ùn ci parlate di i rispunsevuli di stu scumpientu ?
Fatalità ùn ci ne pò esse .

4.mandatu da u pichju u 05/05/2014 23:54
No fatalita un ci n'hè

Lascia corre, manghjeria, incumpetenza, servizi resi, scruccuneria...

Hè prestu fatta a lista di e respunsabilita

5.mandatu da incerca u 06/05/2014 09:41
ASSASSINI

6.mandatu da filippi u 06/05/2015 07:57 (da un teleffuninu)
Ghje 23 anni. Micca 22.

7.mandatu da luntanu u 10/05/2015 01:48
assassini in veru
quandu si vede l'emissione nant'à LCP chì tratta di st'affare c'hè da dumandassi cum'hè ch'ùn c'hè statu di più cundanne

8.mandatu da Ghjuvanluca u 06/05/2016 09:46
ù duvere di non sminticà stà tragedia.Ghje a sola manera pè da confortu e vicinanza a tutti i familiari.
Abbracci da Cagliari a Bastia tutta.

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta