Accueil
Envoyer à un ami
Version imprimable
Partager

Esiliu pariginu : cose da fà, da vede è da manghjà

Perchè chì hè a capitale di l'oppressore, ma chì hè quantunque una bella cità.



Prufittate di a finale per passà a dumenicata in Parigi ? Eccu qualchì cunsigliu preziosu per sopravvive in un mezu ostile. È ùn esitate à publicà i vostri più belli ritratti nant'à Twitter cù u hashtag #TurchiniParigi.

Da vede è da fà : i clàssichi

U Louvre
Unu di i più grandi musei di u mondu è u più visitatu, ùn avemu micca da fà i bizzichi fini. Fate casu : ci hè a coda davant'à a Gioconda. Curagiu. Nentru e 460.000 opere (una grande parte sò state arrubbate, ma feremu cum'è s'è no ùn aviamu vistu nunda), ci ne serà omancu una chì vi piacerà. A mo preferita hè a Vittoria di Samothrace (arrubbata à i Grechi). È sì a cultura ùn hè micca per voi, ci hè a gallerìa di u Louvre (Carrousel du Louvre) ghjustu sottu. (ùn diceremu nunda ma vi ghjudicheremu in silenziu).

Orarii : Tutti i ghjorni da 9 à 6 ore di sera (e sale chjodenu à partesi da 5 ore è mezu). Apertura nutturna sin'à 9 ore è 45 u mercuri è u venneri.

Prezzi : 12€ per a mostra permanente, gratisi per i menu di 25 anni (è qualchì altru)

www.louvre.fr
Esiliu pariginu : cose da fà, da vede è da manghjà

A Torra Eiffel
Ùn ci hè più "cliché", ma hè sempre bellu. Di notte, spampigliuleghja tutte l'ore. Hè ancu di più bellu, è trippa pè i "clichés". U veru turistu colla in cima. Quellu chì hà a capaghjina si ne stà di sottu (sopr'à tuttu chì avà u primu pianu hè in plexiglas, dunque trasparente). A Torra Eiffel hà festighjatu i so 126 anni u 31 di marzu scorsu. Certi a trovanu guffissima, à mè mi ralegra ogni volta ch'o a vecu. Ah iè : da u latu di u Champ de Mars hè più bellu ch'è da u latu di u Trocadéro.

Orarii : Ascensori da 9 ore è mezu di mane à 11 ore è 45 di sera. Ultima cullata à 11 ore ds (pè a cima 10 ore è mezu ds). Scalini : 9 ore è mezu dm à 6 ore è mezu ds. Chjusura à 6 ore ds.

Prezzi : Segondu ch'è vo seppiite ghjovanu o vechju, da 11€ à 15.50€.

Per ùn avè à fà a coda : ticket.toureiffel.fr
Esiliu pariginu : cose da fà, da vede è da manghjà

Notre-Dame de Paris
U primu chì canta Il est venu le temps des cathédrales  serà subbitu subbitu assumigliatu à u turistu in sandale-calzette chì canta « Mammà Corsicà » quand'ellu fala da u battellu. È sì qualchissia vi lampa in a Senna, ùn veneremu micca à circavvi. Ci sò vulsuti 182 anni per custruiscela, guasi listessu ch'è pè u stadiu di Furiani. Notre-Dame, hè grande, hè bella, ci hè un bellu parcu in daretu è pudete cunfessavvi (un prete v'aspetta in settimana è u sabbatu da 10 ore dm à meziornu è mezu è da 2 ore è mezu à 7 ore è mezu ds, a dumenica da 3 à 7 ore ds). Pò sempre ghjuvà in casu di vittoria troppu festiva o di disfatta troppu amara.

L'entrata hè gratisi, è hè aperta da 8 ore dm à 6 ore 45 ds.

Pudete dinù visità e torre (387 marchje, curagiu). 8,50 € notre-dame-de-paris.monuments-nationaux.fr è a cripta crypte.paris.fr
Esiliu pariginu : cose da fà, da vede è da manghjà

A Basilica Saint-Denis
Fora da Parigi è vicina da u Stade de France, truverete à u core di u 9-3 (chjamatu dinù « neuf ter » o « ter ter » da l'amichi di i lochi) sta chjesa maiò d'architettura gòtica. Ci hè a chjesa, chì hè bella, è ci sò e tombe di i rè di Francia, cù i so ghjacenti (« gisants »). Sopr'à e tombe, e sculture di marmeru è di ghjessu di i rè francesi, da Dagobert à Luigi Piombu chì parenu guasi veri. Sott'à u vostru nasu, vidite sfilà tutta a storia di i rè di Francia. Bon d'accordu, ùn hè micca a nostra, ma a vista di stu locu cun tutti sti rè hè da veru impressiunante. Eppo pudete sempre circà di mette un appiccicatoghju "paese turchinu" in Saint-Denis.

Orarii : 10 ore dm à 6 ore 15 ds. A dumenica à partesi da meziornu.

Prezzi : 8.50 €, gratisi per i menu di 26 anni.

saint-denis.monuments-nationaux.fr
Esiliu pariginu : cose da fà, da vede è da manghjà

È dinù :

A Pagode
S'è vo vulete andà à u sinemà, andate à vede questu quì : una vera pagoda giappunese à u core di Parigi. Sì u filmu hè mozzu goffu, pudete sempre prufittà di a decurazione di a sala. Hè sempre più bellu ch'è e Halles o i Champs Elysées. Pè a prugrammazione, andate à vede u situ internet di a Pagode

Prezzi : 9,80€, da 4 à 8€ per quelli chì benefizieghjanu di riduzzioni.

È sì i filmi ùn v'interessanu micca, ci hè un giardinu giappunese chì face salottu di tè : hè bellu è in più di quessa ci hè un ghjattu. Prezzi : 4,50€ u tè, 2,80€ u caffè è 3,50€ u soda.
Esiliu pariginu : cose da fà, da vede è da manghjà

I « bateaux-mouches »
Classicu è « cliché », ma simpaticu è da fà una volta. Lasciate cascà u pranzu : caru è micca bonu.

bateaux-mouches.fr
bateauxparisiens.com
vedettesdupontneuf.com/accueil

U boscu di Boulogne
S’ellu face bellu tempu, hè rumanticu è piacente. Ci hè virdura, laghi, barcelle da appigiunà, ànatre è cumpagnia bella.

paris.fr/pratique/paris-au-vert/bois-de-boulogne/p6567
Esiliu pariginu : cose da fà, da vede è da manghjà

Invalides
S'è vo tenite à tutti i patti à salutà à Napuliò. O sinnò, ci hè u museu di l'armata per vede una bella mostra nant'à e duie guerre mundiale.

musee-armee.fr/accueil.html

U « conseil constitutionnel »
Pensemu à apre un cuncorsu di ritratti. Sempre cù u hashtag #TurchiniPariggi. Fateci ride.


E mostre

Sò tutte quì : sortiraparis.com/arts-culture/exposition


« Le zizi sexuel »: pè i zitelli (è i maiò) : cite-sciences.fr/fr/au-programme/expos-temporaires/zizi-sexuel/

Harry Potter : pè i fans (è i « moldus ») : citeducinema.org

Da manghjà

Infurmazioni capitale nant'à a capitale :

I prezzi sò sprupusitati. I bistrots ùn esiteghjanu micca à fatturà 8€ un tè, 4€ un caffè o 10€ un coca. Cù un supplementu s'è vo dumandate una rundella di limone (autenticu).

Fidighjate puru e carte nanzu di stallavvi (iè iè, quì ci vole à fà cusì, ùn passerete micca per un pumataghju). S'ellu hè troppu caru, andatevine : vi ne impippate, ùn vi cunnosce nimu quì. Sti lochi aspettanu un bravu catinu venutu da a pruvincia. Site un catinu baullu ? Nò : scappate.

Per manghjà hè listessa. Lampate un ochju à e carte, ch'o sinnò risicate di manghjà male (robba surghjalata) è carissima. Fidighjate sempre u situ Tripadvisor nanzu d'entre in un'osteria : in generale, i cummenti ùn sbaglianu.

I gyros 
Apollon – 24 rue Jean Nicot 75007

Trà Champ de Mars è Invalides, i gyros i più boni di Parigi – è puru di Grecia, d'appressu à mè. I gyros sò spezie di sandwich grechi, cun pane « pita », legumi, pomi fritti, carne o pulpette di legumi. V'arricummandu a versione vegetariana, cun pulpette di melenzane è di zucchini. Pigliate dinù un biscuttinu o una barcella di pomi fritti s'è vo site famiti. È s'è vo fate l'ippoglissemìa, un loukoum duveria davvi sei mesi di sopravvivita. S'è vo dite ch'è vo venite da a parte di Laura, à u tantu m'adottanu. Vale a pena di pruvà.

Nant'à Tripadvisor
Esiliu pariginu : cose da fà, da vede è da manghjà

I falafels
L’As du falafel – 34 rue des rosiers 75004

I falafels sò pulpette di ceci servute in sandwich, in un pane « pita », cun pienu di legumi è di cose strane ma bunissime. Fate casu : in u listessu carrughju, ci hè L'As du falafel è pienu d'altri falafels. Francamente, ùn ci hè discussione, hè à L'As du falafel ch'ellu ci vole à andà. I cummercianti sò cusì simpatichi ch'è ind'è noi. S'elli i vi lampanu in faccia, manghjateli quantunque : hè troppu bonu.

Cunsigliu n°1 : sceglite da purtà è micca da manghjà sopr'à locu : sò veramente troppu antipatichi.
Cunsigliu n°2 : Hè chjosu u venneri sera è u sabbatu. Hè shabbat. Ùn fate micca cum'è mè, famita à u puntu di grattà à a porta, sperendu ch'elli mi tirinu una pulpetta.

Nant'à Tripadvisor
Esiliu pariginu : cose da fà, da vede è da manghjà

Caffè/salottu di tè vicinu di a Torra Eiffel
Le Kozy – 79 avenue Bosquet 75007

Caffè, tè, sodas, pastizzerie casane è canapés ammìllii à dui passi di a Torra Eiffel. Ùn hè forse micca u caffè di u seculu, ma a ghjente hè simpatica è vistu u quartieru di scrucconi, l'avemu casu mai sariate assiccati.

Nant'à Tripadvisor

Un tè rumanticu
Le Musée de la vie romantique - 16 Rue Chaptal 75009

U museu di a vita rumàntica hè a dui passi di i sex shops : pràticu. Senza ride, u museu ùn hà nunda di strasordinariu, ma si pò andà in u giardinu senza entre in u museu, è u salottu di tè à cantu hè bellucciu. L'ultima volta ch'o ci sò andata, servianu fiadone.

paris.fr/pratique/musees-expos/musee-de-la-vie-romantique/votre-visite/rub_5851_stand_11936_port_12984

I taglierini giappunesi
Sanukiya – 9 rue Argenteuil 75001

Un'osteria giappunese chì serve i taglierini udon – scambia di i sushis. Spessu, sunnieghju di u so « tofu » frittu. (Si tasta nanzu di dì « berk »).

Nant'à Tripadvisor
Esiliu pariginu : cose da fà, da vede è da manghjà

È sopr'à tuttu, ùn vi ne scurdate : i Parigini ùn ponu pate i turisti guasi quant'è noi, è noi simu tutti u turistu di qualchissia d'altru. Aspettemu i vostri ritratti #TurchiniParigi !

Bon viaghju !


Un articulu di Laura (pudete andà à visità u so blog).

u 7 d'Aprile 2015
Laura



1.mandatu da Atchum u 08/04/2015 09:11
Approntatevvi a fa a coda in ogni locu. viderete he un bellu piacè... Tastate ancu puru i "MacDo", e un. vi ne scurdate di spassighjavi in u Rer A, B et C, hé maravigliosa... un salutate a nimu, un ghjova à nunda.. e si i parigini in ponu micca pate i turisti, un li piacenu mancu i parigini stessi. Hé quantuque una bella cità, ma stanca assai. in tutti casi face bellu tempu, hé digia què. . scialatevi!

2.mandatu da sardu u 08/04/2015 11:14 (da un teleffuninu)
E da manghja francese?? Bé insegnatemi ancora un pocu di francese...chi vogliu andacci:)

3.mandatu da allez bastia u 08/04/2015 20:06
pensate à passà à France Television 7 esplanade Henri de France (15e) pè sciaccà un bellu sciambulone à Ruquier è soprattuttu currite 29 rue de chateaudun (8e) à salutà u nostru amicu Barbier !!!!!FORZA ZITELLI

4.mandatu da Lucia u 09/04/2015 00:06
si maanghja bè cuisine iranniene et indienne http://www.k-si.fr/

5.mandatu da sardu u 09/04/2015 11:11 (da un teleffuninu)
Ahahahah aió

Novu cumentu :