Accueil
Envoyer à un ami
Version imprimable
Partager

Fasgianu sempre vivu

U sumere appena azezu di Cartalavonu chì ùn vulia fassi carrizzà da i turisti hè statu durante un certu tempu dichjaratu tombu. In fine di contu, hè sempre vivu.



Fasgianu sempre vivu
In u 1817, Salvatore Viale scrivia a so opera a più cunnisciuta, a Dionomachia : a storia d'una baruffa trà i paesi di U Borgu è di Lucciana per via d'un sumere mortu.

Guasi duie cent'anni dopu, torn'appena è a Corsica cunniscia un "revival" di a Dionomachia.

A storia si passa sta volta in a furesta di U Spidali. L'avete tutti seguitata cun assai attenzione è hè stata cummentata nant'à e rete suciali. Un sumere ribellu chì ùn vulia fassi carrizzà da i turisti hà rializatu u sognu secretu chì parechji Corsi anu : mursicà i turisti.

Serà statu per vindicà i so cumpagni chì finiscenu in saucisson d'âne ?

In fatti, Corse-Matin ci ampara ch'ellu s'era pigliatu un rastellu : "il aurait mal supporté le fait d'être éconduit par l'ânesse qui partageait son enclos. D'où la fuite, l'agressivité et les morsures."

Nant'à Facebook è Twitter, a storia di u sumere azezu crea u buzz. Sin'à un tweet di Corse-Matin chì annunzia chì u sumere hè statu tombu. A storia chì facia surride à tuttu u mondu (ùn mancavanu più chè i cummunicati di cundanna di l'omi pulitichi è una cacciata di Valls nant'à a viulenza sumerina) diventava un scandalu naziunale.

Una petizione hè subbitu creata per impedisce l'inghjustizia.

In fine di contu, s'ampara oghje chì Fasgianu di Cartalavonu, sumere in libertà pè e machje di U Spidali, quellu chì ùn vulia sottumettesi à u turìsimu è chì ùn dumandava chè à campà tranquillu in i so lochi, era sempre vivu (ci dice Corse-Matin).

Certi annunzianu ancu a so presenza à e Ghjurnate di Corti.

u 2ndu d'Aostu 2013
U Webmaestru



1.mandatu da pseudo u 02/08/2013 23:06
FaJeanjean ?

2.mandatu da bastiacciu stortu u 03/08/2013 00:00
Micca paura , Fasgianu !!! mancu di u GIGN ... qu'elli venghinu...!!!!

3.mandatu da Fasgianu Forever u 03/08/2013 00:22 (da un teleffuninu)
Torna una storia di culu a l''iniziu.

4.mandatu da mammone u 03/08/2013 07:18
Quale so i sumeri ?...l'animali chi un dumandanu a vive a so vita d'animali o i turisti niscentri chi credenu che i sumeri sianu animali in piluzzu nati per essere allisciadi e pigliadi in foto.

5.mandatu da lombardo u 03/08/2013 07:19
Viva u Fronte , FLNS ! (fronte di liberazione naziunale di i sumeri)

6.mandatu da Pasympa u 03/08/2013 08:38
E cusi si ricunosce tutt'a so impurtanza a Corse-matin.
Cert'azzezi dicenu chi stu "quotidien régional" un ghjiove a nulla... À ringraziavi o sgjio Tapie, i soli di u statu, i nostri, un sò micca stati persi: avviamu l'ore di l'intarri chi eranu u solu interressu ma avà incu stu "scoop" u premiu di u ghjiurnalisimu e in la so stacca.

7.mandatu da tont''e finu u 03/08/2013 09:14
Dopu à "Cujo" cu u so canacciu, dopu à u cignale arrabiattu di "Razorback", u screu puzzicu di "Chrstine" ecu a seguita di "Les dents de la Mer" : LES DENTS DU SU-MERE

8.mandatu da babbo u 03/08/2013 11:21
Tintu Fasgianu,ubligatu a manghjassi duii turisti per cacciassi a fame,chi miseria !!!!

9.mandatu da Leandri u 03/08/2013 11:32
ok per salvà u sumere è pruibisce i turisti.
Ma quandu vegu 2500 firme per un animale è nisuna azzione cullettiva per 25 assassinii, mi dumandu quantunque.

10.mandatu da asinus imbastatus u 05/08/2013 16:15
Leandri, ai a ragiò: petizione per u sumere chì si piglia per un cane, d'accordu; petizione per stu cane aiaccinu marturiatu, d'accordu.
30 cristiani tombi in un annu è stu silenziu meravigliosu ... Ma ditemi à pena, simu nant'à a luna?

11.mandatu da babbo u 05/08/2013 20:32
inno ,ind'u paese di i sumeri !!!!

12.mandatu da bastiacciu stortu u 06/08/2013 10:43
L'assassinati , o l'assassini anu sceltu di campa o di morè cusi ... u sumerè un a sceltu nunda ....

13.mandatu da Petru Andria u 06/08/2013 12:46 (da un teleffuninu)
Gloria a te Fasgianu si u sumere u piu astutu di u nostru paese ci vole a spera ch''ellu avera avutu u tempu di riproducesi cu ista sumeraccia chi li ha messu una rastellata

14.mandatu da ANTO u 07/08/2013 07:25
Cume in dè a canzona Fasgianu un hè mortu ,ma un avia miccaventi trè anni !!

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta