Accueil
Envoyer à un ami
Version imprimable
Partager

Fasgiulon'valley

Eccu perchè ci vole à incuragisce a cultura di l'orti, piuttostu ch'è di cuntinuvà cù "la prime à la vache".



Fasgiulon'valley
Ùn saria micca ghjudiziosu chì l'Auropa aiutessi l'ortulani piuttostu ch'è i vaccaghji ? Un paragone rapidu ma obbietivu trà fasgiuloni è vaccine, ci dimostra chì i fasgiuloni, cusì anticogni ùn anu ancu persu a battaglia.

- I fasgiuloni ùn traversanu micca e strade, allora chì e vacche si lampanu sott'à e vitture
- messi à mogliu, i fasgiuloni doppianu di vulume allora chì una vacca in l'acqua si lascia affundà è basta.
- I fasgiuloni s'inturcineghjanu à i pali incù affezzione, e vacche voganu cum'è vagabonde addisperate
- I fasgiuloni si stanu appossu à un muru senza pruvà à cullà nantu o à distrughjelu, e vacche sciappanu tuttu (è in più manghjanu l'ortensià di Zia Pulina)
- Fiori di fasgiuloni attraenu ape è farfalle chì si carcanu di nettare, u culu di e vacche attira solu e mosche cavalline
- Per cogliesi dui fasgiuloni, basta à piglià u viottulu daretu à u campanile una sporta in manu, per andà appressu à e vacche ci vole à traccià una pista orribile à meza machja è fà fughje l'acelli cù un 4x4 sgangheratu.
- Ùn ci hè bisognu di purtà i fasgiuloni à u scannatoghju o di currompe un veterinariu per avè certi certificati
- I fasgiuloni stanu ghjurnate sane senza sciaccà un mughju, e vacche anu sempre a bocca aperta
- I fasgiuloni anu un bellu culore biancu giallicciu è sò sempre in cicca, invece chì e vacche sò brutte è sempre à mastucà cum'è sculari chì s'annoianu in fondu di a classa
- I fasgiu-lounge puderianu ancu seduce i becchifini di u mondu sanu è fà di i nostri pughjali una vera « fasgiulon' valley »

Avemu capitu, i fasgiuloni sò fratelli « slow food » di e cipolle di Siscu, di e castagne rustiche è di e mele muntagnole, e vaccacce sò surelle « fast food » di i maladetti « steack haché ». Stu paragone obbietivu a ci insegna.

u 2ndu di Farraghju 2015
Zenbucucciu



1.mandatu da aCiaccera u 02/02/2015 15:48
Chì v'hanu fattu e vacche ?!

2.mandatu da sardu u 02/02/2015 16:00 (da un teleffuninu)
Bisogna magnarle

3.mandatu da anto u 02/02/2015 16:07
Ié ma ,un tianu di carne vaccina ,cume i fasgioli "soisson" ,s'acconcia bè in cu un pezzu di panzetta,cume i pullastri venachesi dinù.

4.mandatu da ghjuvan'santu u 02/02/2015 16:55
e vacche e i porci so un scumpientu per i nostri paesi. sciappanu tuttu, certi paesi so purcili

colpa a i patroni

ma colpa a u sistema di e "primes à la vache" chi trasforma i nostri cow-boys in closce assistite

in tantu, l'orti, e lenze so abbandunate.

una prima à l'ortu cultivatu ? e perchè micca?

5.mandatu da aCiaccera u 02/02/2015 19:05
L'umanu hè un scumpientu per u mondu.

6.mandatu da maria juana u 02/02/2015 20:33
anu da finì pè dì chì u tufone di a couche d'ozone simu noi...Torna la Keurse!! puttanaccia

7.mandatu da luntanu u 03/02/2015 06:37
perchè i fasgiuloni si manghhenu allora chì e vacche corse ùn hanu chè osse è sò techje di vaccin.

8.mandatu da paisanu u 03/02/2015 21:03
"l'orti" ? inde noi si dice un ortu ma à u purale so "l'orte"

9.mandatu da paisanu u 03/02/2015 21:03
"l'orti" ? inde noi si dice un ortu ma à u purale so "l'orte"

10.mandatu da carnaval u 05/02/2015 00:37
Un si dice mica piuttostu, si dice piubacciu !!!

11.mandatu da guerrini u 05/02/2015 10:15
Ùn ci vole micca à diminticà a quantità cunsiderevule di gasu metanu -"le grisou"- ch'elle lentanu e vacche pitendu. Issu gasu cuntribuisce à aumintà a timperatura di l'atmusfera terrestra di a nostra pianetta Terra.

12.mandatu da Pasquale u 06/02/2015 22:50
ghjè vera o Guerri ma u gasu metanu ch'elle capianu e vacche , ghjè gasu "bio" !

Novu cumentu :


Seguitateci nant'à Facebook



Abbunatevi à a newsletter

Circà nant'à A Piazzetta