Accueil
Envoyer à un ami
Version imprimable
Partager

Festa ! A bandera corsa hè sbandita da l'Eurovision

A minaccia d'un novu "banderagate" pesa nant'à a Corsica. Avemu amparatu chì e bandere di e nazione chì ùn sò micca ricunnisciute da l'ONU sò difese pè a serata di l'Eurovision. Sapete chè ? Tantu megliu !



A nutizia hè cascata eri. L'organizatori di l'Eurovision anu fattu passà e so cunsigne pè u cuncorsu di canzone chì serà organizatu i 10, 12 è 14 di maghju in Stockholm. Sò accettati solu i striscioni scritti... in inglese. L'altre lingue fora !

Per ciò chì hè di e bandere, e nazione micca ricunnisciute da l'ONU sò pruibite. Sò citate e bandere di u Kosovo, di u paese bascu... è di Daesh.

Di u colpu, i Baschi sò cuntenti.


A bandera corsa ùn hè micca mintuvata (ùn anu mancu pensatu à noi malgradu a tamanta storia di l'annu passatu...), ma si pò pensà chì i Corsi chì si renderanu in Stoccolma cù a so testa di moru seranu sbanditi.

(ma speremu sopr'à tuttu chì nisun Corsu ferà u viaghju per quessa...)


Di siguru, a nutizia ùn hè micca piaciuta è hè stata cummentata assai nant'à e rete suciale.

Serà u principiu d'un'epica nova, induve seranu pruibiti e bandere è striscioni troppu cuntestatarii ?

Chì ne serà per l'Euro ? I Ghjochi olimpichi ? I macci di Champion's League ? È perchè micca e partite organizate da a LFP è di a FFF ? Sapiamu chì u futbol ùn avvicina micca i populi, in fine di contu, l'Eurovisio non più.

Ma dinù, chì ne serà di u slippu corsu ? Troppu suvversivu, anch'ellu ?
Festa ! A bandera corsa hè sbandita da l'Eurovision

Purtantu, s'ellu si riflette bè, hè quantunque una bunissima nutizia. Eccu perchè :

A Corsica fora di l'Eurovision, hè a glassa

L'Eurovision hè u prugramma televisiu u più anticognu, u più kitsch, u più "ringardu" di u mondu. Iè, hè a grossa lose. Quale pò suppurtà trè ore d'emissione induve un canterinu lituanianu canta in tiruliana dopu à essesi abbuchjati una canzona disco in iugoslavu.

Nimu fideghja què.
Lituania, 2010
Lituania, 2010

Nimu và à l'Eurovision cù una bandera corsa

Francamente, cunniscite un Corsu capace d'andà à vede què ? Almenu di cunfonde l'Eurovision è l'Euro di futbol, ùn truvemu micca.

Ch'avemu da fà à mezu à stu carnavale ?
Moldavia 2011
Moldavia 2011

Perchè era Dave chì presentava l'Eurovision

Marc-Olivier Fogiel, Dave, Stéphane Bern, Laurent Ruquier, Michel Drucker, Cyril Hanouna... anu presentatu l'Eurovision.

Hè quessa ch'è vo vulete ? A ricunniscenza di questi quì ?
Festa ! A bandera corsa hè sbandita da l'Eurovision

Per carità, franchemuci un novu "banderagate"...

À noi altri Corsi ci piacenu i simbuli. Pocu impreme tutte l'agressione chì ci toccanu (disimpiegu, precarità, speculazione, maffie, lingua è cultura à caternu...), per a nostra bandera, semu pronti à entre in guerra.

Serebbe bè di passà à qualcosa d'altru.
Festa ! A bandera corsa hè sbandita da l'Eurovision

Perchè ùn avemu micca gruppi di metal corsu

In u 2006, u gruppu finlandese Lordi vincia l'Eurovision cù a so canzona "Hard-Rock Hallelujah".

Ma dumane, quand'è no seremu indipendenti, à quale manderemu pè rapresentà a Corsica à l'Eurovision ? Hein ? Ci avete pensatu à quessa ?

Ùn avemu mancu un gruppu di metal in lingua nustrale, è sarebbe ora d'avenne unu.


u 29 d'Aprile 2016



1.mandatu da Un tipu u 29/04/2016 18:45
Ùn avemu mancu un gruppu di metal in lingua nustrale ?
E Vindetta allora ?
https://www.youtube.com/watch?v=GbDioFn3_AA

Novu cumentu :