Festighjemu puru u nostru 14 lugliu !

Hè in Castagniccia ch'ella principiò a corta storia di a Nazione Corsa indipendente (14 anni). Da u 13 à u 16 lugliu 1755, una cunsulta addunita in Sant'Antone di A Casabianca pruclamò un giovanu Merusaglincu à u capu di u Statu : Pasquale Paoli.

Bon, ùn hè micca pè favvi a murale è cunniscite tutti a vostra storia. Vi risparmieremu a solita lezzione "mentre chì a Francia n'era sempre à i tempi di i Rè, a Corsica inventava a demucrazia..."

Vi rammintemu chì Pasquale Paoli fù statu elettu da i rapresententi di 16 pievi solu (nant'à 64) è chì Mario Emmanuele Matra, numicu di Paoli, si fù eleghje anch'ellu da listessu titulu un mese dopu (ma da 6 pievi solu...)

Ma quantunque, à mezu à tutta sta frenesia di flonflons, di Marseillaise è di legiunarii chì sfilanu à u ritimu di a musica militare, li pudemu risponde chì ancu stu paese hà un passatu riccu, è chì a nostra storia ùn hè micca inferiore à a soia...