Accueil
Envoyer à un ami
Version imprimable
Partager

Fora i zitelli da e nostre piazze !



O ghjente, ogni ghjocu hè difesu in piazza à issa risidenza.

Fora i zitelli da e nostre piazze !

Difesu à quale ?
À i zitelli, bene intesu !

Soca e strite di u criaturame, e nostre l’orechje ùn le supportanu più.
Eccu ind’è no ne semu oghje chì hè oghje in Corsica. In Aiacciu, in Bastia, in tutte e nostre cità.
Un fattu solu conta : a santissima pace di i risidenti. Dunque fora i zitillacci, fora da e piazze, da e scale o da i puntini quandu ellu piove. Ognunu in casa soia.

Un psiculogu qualunque, spizializatu inde i fatti zitillini, vi spiigarà chì u ghjocu hè a cundizione nicissaria è assuluta di u sviluppu di a criatura ; ch’ellu si ghjoca prima da per sè, dopu in cumpagnia ; ch’ellu hè un fattu di primura pè a intilligenza è u sintimentu d’armunia interiore.

Or bella, quand’è vo andate avà ind’è un pediatru, in la sala d’attesa ci scuprite tamanti affissi chì vi prisentanu e manere di svizzà i nostri figlioli da l’usu di i screni, di e playstation è altri attrazzi d’issu genaru. Ma chì vulete ch’elli fianu oramai postu chì u ghjocu in cumpagnia hè pruibbitu ?

Senza cascà in la nustalgia piinghjulosa, bisogna à ricurdassi chì prima e corte di l’immobbuli -è di e risidenze- eranu piene à voce alegre di criaturi, zitilletti è di le volte zitilloni. Chì e mamme curavanu inseme i so figlioli innasgiulati è chì i vicini cunsigliavanu o liticavanu quandu ella nascia quella malfattella.

Ci era una forma d’educazione amparata in la stretta, par isse piazze di e risidenze, par isse corte di l’immobbuli da i zitelli tutti quanti elli eranu, è qualunque fussi a so origine suciale. Bene intesa, e cagnette esistianu ancu tandu. Ma ci era dinò una forma d’educazione di u populu, da u populu.

Oghje a fraquenza cù l’altri da chjuchi, u incontru cuttidianu infurmale cù tutta a capacità criativa ch’ellu parmittia hè statu mandatu via. Ognunu in casa soia, allevu inchjustratu ed annivesarii cù l’amicucci scelti, cù una catasta di rigali chì ùn ghjuvaranu à tanti affari, à parte ingurgà i nostri ruminzulagghji zuffi…

O ghjente, ùn circate più cumu ellu vene à cresce l'individualisimu. Avete siguramente trovu quì un principiu di risposta...

u 18 di Lugliu 2015
L'Azezu



1.mandatu da buzz a saetta u 18/07/2015 22:31
Ghjè cum'è quelli chì anu fattu piantà l'avè Maria di 7 ore perchè chì u cioccu di e campane i discitava.

2.mandatu da J G u 20/07/2015 11:48
I zitelli chi ghjocanu , chi stridanu , chi côrenu , chi riidenu hé una vèra gioia , ma oghje , c'hé troppu ghjente azeza , ancu in i paesi hé cusi , l'azezi basta ! ! !

3.mandatu da J G u 20/07/2015 11:59
A l'ora di a siesta , d'estate , cu a sciappittana , in i tempi , si ghjocava a china a u frescu in una stretta o sottu a un arburu piazza di a chjesa , tutti inseme , o chi belli ricordi ! ! !

4.mandatu da Duttore stroppiasani u 20/07/2015 14:20
Ma forse ch'ellu si pò sempre ghjucà à fà u duttore... O ci vole à esse più maiò ?

5.mandatu da J G u 24/07/2015 05:22
U mondu di u silenziu venera anch'ellu a à so ora ,
Intantu , chi i nostri zitelli si possanu ghjocà fora !
Quelli chi avite l'orecchje dilicate
Tenite e vostre purtelle serate !

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta