Accueil
Envoyer à un ami
Version imprimable
Partager

Hè esciutu U Zazu !

Cumu si dice "mots croisés" in corsu ? "Incrucittimi" ! Hè esciutu u nùmeru 1 di U Zazu, u primu giurnale di ghjochi di parolle in lingua corsa.



Hè esciutu U Zazu !
Dop'à U Vagabondu, hè natu un giurnale novu in lingua corsa ! Fà un giurnale di ghjochi (incrucittimi è imbuleghji) in corsu, hè l'idea appena scema di Jérémy, dettu U Zazu. L'avemu postu qualchì dumanda per avè u so parè. 2.80 € ogni mese, in vèndita in u mondu sanu è in Corsica dinù.

Cumu t'hè venuta l'idea di fà stu giurnale ?
Quand'eru più giòvanu, faciu e stagione d'istate in i caffè è quand'ùn c'era nimu, per passà u tempu, mi socu messu pocu à pocu à pruvà di fà e griglie di u Corse-Matin. À u princìpiu ùn truvavu chì 2 o 3 parolle, ciò chì m'annerbava assai, ma à rombu d'andà à vede e suluzione è di circà in i dizziunari, aghju cumminciatu à capisce i "còdici" di u ghjocu è socu riesciutu, via via, à compie e mo griglie. Aghju amparatu tante cose à nantu à a lingua francese è a cultura generale. Tandu, mi socu dettu chì stu ghjocu saria un vettore educativu maiò per a nostra lingua e a nostra cultura. Di più, dopu à esse diventatu un assu di l'incrucittimi, mi socu avvistu ch'ùn vinciu mai i rigali di i cuncorsi è ch'ùn c'era mai vincitori in Corsica (senza vulè fà a linguaccia), eppuru n'aghju mandatu SMS è ticchetti di risposta... Di u colpu, aghju cumminciatu à riflette à una specia di "Télé 7 jeux" in lingua nustrale incù belli rigali è rùbriche in più.

Chì vole dì "u zazu" ?
Nunda, hè solu u numìgnulu chì m'hà datu u mo fratellu quand'eramu zitelli ma pensu chì manc'ellu ùn ne cunnosce u sensu... Forse sarà un "zézé" cursizatu (cusì mi chjamavanu i maiò à l'èpica).

Chì sò i to prugetti per i prussimi nùmeri ?
Stabilisce livelli di ghjocu è manere di ghjucà sigondu à i cummenti di i ghjucatori, pruvà di fà altri ghjochi in corsu (anagramma, induvinella...), aghjunghje ci altre rùbriche, fà pìccule griglie facìule per i zitelli incu disegni per definizione... Ma prima ci vole à passà l'istate dibattendu tutti inseme di e parolle utilizate per chì tuttu ognunu poschi capisce è ghjucà da Bunifàziu à Macinaghju... N'aghju digià a pena in capu ! Ma, incu a so vulintà, spergu di riesce à fà ghjucà è cumunicà tutti i corsi trà di elli à traversu u ghjocu.

Ch'ai manghjatu à meziornu ?
Cum'è ogni ghjornu : una bella fetta di dizziunàriu è un pezzu di clown ma ti vuliu dumandà d'invità mi à manghjà ind'è tè chì u tòiu mi pare megliu !

u 9 di Ghjugnu 2011
U Sgaiuffu



1.mandatu da intantu u 09/06/2011 20:24
L'aghju compru u librettu ancu s'è ùn tantu praticu cù ste rete à empie (corsu o francese ch'ellu sia), ma n vole dì rispundimu à a sfida.

E publicità ci volenu da fà campà u travagliu di sta squatra, ma s'eranu pussuti francà di fà di a cuprendula una publicità.

NB: Ma chì vulete in Corsica ùn si pò fà nulla senza esse criticatu (eiu socu u criticone di l'ora).

2.mandatu da CULOMBA u 10/06/2011 02:20


a più bella iniziativa pè a lingua corsa dipoi anni

cumprate, ghjucate, aiutate sta sfida tamanta è cusì simpatica è ghjuvativa

3.mandatu da Casata u 10/06/2011 08:42
heu o culomba caccia a tva !

e a piazzetta allora, un he a piu bella iniziativa dipoi anni?

longa vita a u zazzu

4.mandatu da Da l'incantu u 10/06/2011 09:01
Hè un lampu di geniu s'idea di librettu di ghjocchi. Riflittendu, circhendu e parolle ghjuste, si campa omu amparendu. À leghje è sparte senza guastassi u piacè !

5.mandatu da dumè u 10/06/2011 09:43
un ghjè micca "griglia"? perchè vecu chì nantu à a pagina ci hè scrittu "grilglia"...?

6.mandatu da KÜG u 10/06/2011 11:18
"a più bella iniziativa pè a lingua corsa dipoi anni "

ho! HO !

7.mandatu da azezzudinatura u 10/06/2011 11:23
cumplimenti a u "zazu"

8.mandatu da ANTO u 10/06/2011 19:55
piu ci n'hè e megliu hè !

9.mandatu da Romanacce u 11/06/2011 20:23
In Oletta ùn lu vendenu micca....N'aghju parlatu,volenu sapè cume si pò fà per avè lu....

10.mandatu da U ZAZU u 11/06/2011 20:40
Socu passatu in san fiurenzu ("presse centrale" è e 2 stazione Vito) ma ùn socu cullatu sin'à Oletta. Possu cullà in a settimane chì vene s'ellu c'hè un puntu di vèndita chì u vole vende... Dite mi induve si trova.

11.mandatu da Grossu panzutu u 14/06/2011 11:24
Curragiu e forza!! Bella mossa!

12.mandatu da Renosu u 14/06/2011 15:03
O' U ZAZU !
Longa vita a u to giurnale !
U compru sta sera !

13.mandatu da gaz u 14/06/2011 17:51
l'aghju compru, hè appena difficiule ma l'iniziativa hè tremenda.

cuntinuvate !

longa vita à U Cazu.

Novu cumentu :


Seguitateci nant'à Facebook


L'articuli

Abbunatevi à a newsletter

Circà nant'à A Piazzetta